មក​ស្គាល់ពី​ពាណិជ្ជករ​​វ័យ​ក្មេង​ធ្វើ​​យ៉ាង​ណា​បានក្លាយ​ជា​មហាសេដ្ឋី​ថ្មី​​ថ្មោង​របស់​​​ជប៉ុន

លោក Shunsaku Sagami អាយុ ៣២ ឆ្នាំ ជាម្ចាស់ក្រុមហ៊ុនឈ្មួញកណ្តាល និងសាជីវកម្មបានក្លាយជាមហាសេដ្ឋីថ្មីរបស់​ជប៉ុន។

លោក Shunsaku Sagami ដែលជាស្ថាបនិក និងនាយកប្រតិបត្តិរបស់ M&A Research Institute Holdings ។ ភាគ​ហ៊ុន​ក្រុម​ហ៊ុន​​របស់​គាត់​កើន​ឡើង​ច្រើន​ជាង ៣៤០% ចាប់ពីពេលចុះបញ្ជីកាលពីខែមិថុនាឆ្នាំមុន។ ចំណុចនេះធ្វើឱ្យ ៧៣% ភាគហ៊ុនរបស់លោក Sagami បច្ចុប្បន្នមានតម្លៃជាងមួយពាន់លានដុល្លារ ដោយផ្អែកលើតម្លៃ​បិទ​កាល​ពី​ថ្ងៃ​ទី ២៨ ខែ​មេសា​នោះ​គឺ ១០.០៩០ យ៉េន (៧៤,៣៦ដុល្លារ) ក្នុង​មួយ​ហ៊ុន។

M&A Research Institute ត្រូវបានបង្កើតឡើងនៅឆ្នាំ ២០១៨ ដោយប្រើប្រាស់បញ្ញាសិប្បនិម្មិតដើម្បីភ្ជាប់ទំនាក់ទំនងរវាងអ្នកទិញសក្តានុពលជាមួយក្រុមហ៊ុនដែលប្រឈមនឹងហានិភ័យបិទទ្វារ មិនថាចំណេញ ប៉ុន្តែម្ចាស់មាន​វ័យ​ចំណាស់ ហើយ​រក​មិន​បានអ្នកស្នងតំណែង។

ក្រុមហ៊ុនរបស់លោក Sagami មានជំនាញខាង​សម្រេច​ប្រតិបត្តិ​ការ​អាជីវកម្ម ដោយចំណាយពេលជាមធ្យមជាង ៦ ខែ​ប៉ុណ្ណោះសម្រាប់បញ្ចប់​ប្រតិបត្តិ​ការ​អាជីវកម្មមួយ បើធៀបនឹងរយៈពេលជាមធ្យមក្នុងវិស័យនេះនៅជប៉ុនចំណាយ​​ពេល ១ ឆ្នាំ។ អំឡុងពេល ៣ ខែចុងក្រោយក្នុងឆ្នាំ ២០២២ ពួកគេសម្រេចបាន ៣៣ ប្រតិបត្តិការអាជីវកម្ម និង​ប្រតិបត្តិការ​អាជីវកម្ម​ចំនួន ៤២៦ ផ្សេងទៀតកំពុងដំណើរ។

លោក Shunsaku Sagami ជាស្ថាបនិក និងនាយកប្រតិបត្តិរបស់ M&A Research Institute Holdings ។

សកម្មភាពទិញលក់ និងសាជីវកម្ម (M&A) កំពុងកើនឡើងយ៉ាងខ្លាំងនៅក្នុងប្រទេសជប៉ុន ដោយប្រតិបត្តិការអាជីវកម្ម​ឈាន​ដល់​កម្រិត​ខ្ពស់​បំផុត ៤.៣០៤ ក្នុងឆ្នាំ ២០២២ នេះ​បើ​តាម​ក្រុមហ៊ុន​តាមដាន​ទីផ្សារ Recof ។ ទាំងនេះរាប់ចាប់ពីប្រតិបត្តិការមានតម្លៃខ្ពស់រហូតដល់ប្រតិបត្តិការមានកម្រិតទាបដែលក្រុមហ៊ុនរបស់លោក Sagami កំណត់​គោល​ដៅ។

ឧទាហរណ៍ប្រតិបត្តិការអាជីវកម្មពីមុនរបស់ M&A Research Institute ដូចជាលក់ក្រុមហ៊ុនបច្ចេកវិទ្យាព័ត៌មានដែលមានប្រាក់ចំណូល ២០០ លានយ៉េន ដោយគ្មានអ្នកស្នងតំណែងទៅឱ្យដៃគូប្រកួតប្រជែងប្រាក់ចំណូល ១,៥ ពាន់​លាន​យ៉េន​ដែល​កំពុង​ចង់​ពង្រីក។

លោក Sagami sinh កើតឆ្នាំ ១៩៩១ បានបញ្ចប់ការសិក្សាពីសាកលវិទ្យាល័យ Kobe ។ គាត់ចាប់ផ្តើមអាជីពរបស់ខ្លួនក្នុងវិស័យផ្សាយពាណិជ្ជកម្ម និងមិនមានជំនាញខ្ពស់ផ្នែកហិរញ្ញវត្ថុឡើយ។ កាលពីខែកញ្ញា ឆ្នាំ ២០១៣ គាត់ចូលរួម MicroAd ដើម្បីទទួលបន្ទុកបង្កើតក្បួនដោះស្រាយប្រព័ន្ធផ្សាយពាណិជ្ជកម្ម។ រហូតដល់ខែវិច្ឆិកា ឆ្នាំ ២០១៥ គាត់បានចាប់ផ្តើមអាជីវកម្មផ្ទាល់ខ្លួនដោយបង្កើតក្រុមហ៊ុនប្រព័ន្ធផ្សព្វផ្សាយម៉ូដដែលមានឈ្មោះថា Alpaca ក្រោយ​មក​លក់​ទៅ​ឱ្យ​ក្រុម​ហ៊ុនទំនាក់ទំនងសាធារណៈ Vector ហើយប្តូរឈ្មោះជា Smart Media ។

នៅពេលនោះ លោក Sagami ទើបតែមានអាយុជាង ២០ ឆ្នាំប៉ុណ្ណោះ ដោយជួយក្រុមហ៊ុនសម្រេចប្រតិបត្តិការអាជីវកម្មជាច្រើនទៀត។ ដោយសារមូលហេតុ​នេះ គាត់បានរកឃើញចំណុចខ្សោយធ្វើឱ្យប្រតិបត្តិការអាជីវកម្មគ្មានប្រសិទ្ធភាព។ ទន្ទឹមនឹងនោះ ដោយមើលឃើញថា ជីតារបស់គាត់ត្រូវបង្ខំចិត្តបិទអាជីវកម្ម ព្រោះគ្មានអ្នកស្នងតំណែង លោក Sagami គិត​ចង់​ជួយ​ដល់សហគ្រាសធុនតូច និងមធ្យមនៅ​ប្រទេស​ជប៉ុន។

យោងតាមក្រុមហ៊ុនស្រាវជ្រាវហិរញ្ញវត្ថុ Teikoku Databank ជាង ៩៩% ក្រុមហ៊ុននៅជប៉ុនជាសហគ្រាសធុនតូច និង​​មធ្យម ហើយប្រហែល ២ ភាគ ៣ នៃក្រុមហ៊ុនទាំងនោះគ្មានអ្នកស្នងតំណែងបន្តអាជីវកម្ម។ ដូច្នេះហើយ M&A Research Institute ត្រូវបានបង្កើតឡើងក្នុងខែតុលា ឆ្នាំ ២០១៨ ។ ការចាប់ផ្តើមនេះអនុវត្តប្រព័ន្ធប្រៀបធៀបដែល​ផ្តល់​ដោយ AI ដើម្បីស្វែងរកអ្នកទិញសក្តានុពលសម្រាប់អាជីវកម្មដែលម្ចាស់ចង់លក់។

លោក Sagami បាននិយាយថា “នៅប្រទេសជប៉ុនសព្វថ្ងៃ អាយុជាមធ្យមរបស់ម្ចាស់អាជីវកម្មកាន់តែចាស់ទៅៗ ហើយអាជីវកម្មខ្នាតតូច និងមធ្យមកាន់តែច្រើនគ្មានអ្នកស្នងតំណែង ដូច្នេះត្រូវបញ្ឈប់អាជីវកម្ម ចំណុចនេះកំពុង​ក្លាយ​ជា​បញ្ហា​សង្គ​ម” ។

ក្រុមហ៊ុនយកថ្លៃសេវានៅពេលដែលប្រតិបត្តិការអាជីវកម្មសម្រេចប៉ុណ្ណោះ។ លោក Sagami បាននិយាយថា ប្រព័ន្ធកំណត់តម្លៃដែលងាយស្រួលសម្រាប់អតិថិជន និងមធ្យោបាយស្វែងយល់ដោយផ្អែកលើ AI បានជួយឱ្យក្រុមហ៊ុនរបស់​គាត់មានប្រៀបជាងគូប្រជែង។ ជាមួយនឹងសន្ទុះជោគជ័យ គាត់បានចុះបញ្ជីក្រុមហ៊ុននៅលើផ្សារហ៊ុនតូក្យូកាល​ពី​ខែមិថុនាឆ្នាំមុន មិនដល់ ៤ ឆ្នាំបន្ទាប់ពីបង្កើតក្រុមហ៊ុន។

M&A Research Institute បានរាយការណ៍ពីប្រាក់ចំណេញសុទ្ធចំនួន ៧,១ លានដុល្លារលើប្រាក់ចំណូលចំនួន ១៥,៧ លានដុល្លារសម្រាប់ត្រីមាសសារពើពន្ធដែលបញ្ចប់កាលពីខែធ្នូ ឆ្នាំ ២០២២ ។ ប្រាក់ចំណូលប្រចាំឆ្នាំរបស់ក្រុមហ៊ុនបានកើនឡើងជិត ២០០% បើ​ធៀប​នឹង​រយៈពេល​ដូច​គ្នា​កាល​ពី​ឆ្នាំ​មុនមានចំនួន ២៨,៨ លានដុល្លារក្នុងឆ្នាំសារ​ពើ​ពន្ធ​ដែល​បញ្ចប់​នៅ​ខែ​កញ្ញា ឆ្នាំ ២០២២ ។ 

ប្រាក់ចំណេញកើនជិត ៤ ដង ឡើងដល់ ៩,៨ លានដុល្លារក្នុងអំឡុងពេលដូចគ្នា។ ចំនួនប្រតិបត្តិការអាជីវកម្មដែលក្រុមហ៊ុនប្រឹក្សាក៏កើនឡើងទ្វេដង​ផង​ដែរ រហូតដល់ ៩០ កាលពីចុងខែធ្នូ។ ឥឡូវនេះដោយមើលឃើញថា អតីតម្ចាស់​​កំពុង​​ត្រូវ​ការ​ដំបូន្មាន​អំពី​របៀបប្រើប្រាស់ប្រាក់បន្ទាប់ពីលក់ក្រុមហ៊ុន លោក Sagami បានពង្រីកខាងផ្នែកគ្រប់​​គ្រង​ទ្រព្យ​សម្បត្តិ។

ប្រភព៖ Forbes