តារាកំប្លែងជប៉ុន Tonikaku Akarui Yasumura បង្ហាញ​​ខ្លួន​​នៅ​លើ​ឆាក Britain’s Got Talent ២០២៣

ថ្មីៗនេះ ក្នុងកម្មវិធីស្វែងរកអ្នកមានទេពកោសល្យរបស់អង់គ្លេស Britain’s Got Talent រដូវកាលទី ១៦ តារាកំប្លែង Tonikaku Akarui Yasumura បានបង្ហាញខ្លួនដោយបង្កការភ្ញាក់ផ្អើលយ៉ាងខ្លាំង។ គាត់​បាន​ធ្វើ​ឱ្យ​ទស្សនិកជន​ស្រឡាំងកាំងដោយស្លៀកតែខោក្នុងប៉ុណ្ណោះ។

ភ្លាមៗនោះ គណៈកម្មការ Bruno Tonioli បានស្រែកឡើងថា “អូ ទេ” រីឯគណៈកម្មការស្រីពីរនាក់ Amanda Holden និង Alesha Dixon គ្រវី​ក្បាល ដោយ​បង្ហាញ​ពី​ទឹក​មុខ​ច្របូកច្របល់ ខ្មាសអៀន។

នៅពេលដែលតន្ត្រីបន្លឺឡើង លោក Tonikaku Akarui Yasumura ទាក់ទាញចំណាប់អារម្មណ៍ជាមួយនឹងការសម្តែង​បែប​កំប្លែង​ពិសេស។ តារាកំប្លែងបង្ហាញពីស្ទីលជាច្រើនដែល​ធ្វើ​ឱ្យ​មហាជន​គិត​ថា​គាត់មិន​បានស្លៀក​សម្លៀក​​​បំពាក់។ រាល់​​ពេល​ប្តូរ​ចលនា​ម្តងៗ គាត់​តែងតែនិយាយថា៖ “សុំគ្រប់គ្នាកុំបារម្ភ ខ្ញុំកំពុងតែស្លៀកពាក់” ។

តារា​កំប្លែងជប៉ុន Tonikaku នៅលើឆាក Britain’s Got Talent

អំឡុងពេលសម្តែង លោក Tonikaku បាន​ធ្វើ​ឱ្យ​អ្នក​ទស្សនា​សើច​ដោយ​បង្ហាញពីចលនាមួយចំនួនរបស់កីឡាករ​បាល់​ទាត់ អ្នក​​ជិះ​​សេះ ការ​​សម្ដែង​​ដ៏​​ល្បី​​របស់ James Bond និង Spice Girls ។

រាល់ពេលសម្តែង គាត់តែងតែបញ្ជាក់ថា៖ “ខ្ញុំកំពុងស្លៀកខោ” ។ ការសម្តែងបានធ្វើឱ្យគណៈកម្មការ និងទស្សនិក​ជន​មាន​ការ​ងឿង​ឆ្ងល់ និង​ភ្ញាក់​ផ្អើល។

គណៈកម្មការបានឆ្លើយតបជាវិជ្ជមានចំពោះការសម្តែងរបស់លោក Tonikaku ។ គណៈកម្មការស្រី Alesha Dixon បាននិយាយថា៖ “អ្នក​ប្រហែល​​ជា​បេក្ខជន​ដែល​ខ្ញុំ​ចូល​ចិត្ត​បំផុតតាំងពីដើមរដូវកាលរហូតមកទល់ពេលនេះ” ។ Simon Cowell បាននិយាយថា៖ “អ្នកកំប្លែងណាស់។ អ្នកនាំមកឱ្យខ្ញុំភាពភ្ញាក់ផ្អើលជាច្រើន” ។ បន្ទាប់មក តារាកំប្លែងទទួល​បាន​ការ​យល់​ព្រម​ពី​គណៈ​កម្មការ យកបានសំបុត្របន្តទៅវគ្គបន្ទាប់។

បន្ទាប់ពីកម្មវិធីត្រូវបានចាក់ផ្សាយ ការសម្តែងរបស់លោក Tonikaku ទាក់ទាញអ្នកទស្សនាជាង ៤,៤ លាននាក់ និងការបញ្ចេញមតិរាប់ពាន់។ ការបង្ហាញពីចលនា និងការលើកឡើងដែលថា “ខ្ញុំកំពុងស្លៀកពាក់” របស់តារាកំប្លែង​បាន​ធ្វើ​ឱ្យ​​ទស្សនិក​ជន​​ចាប់​អារម្មណ៍។

ប្រភព៖ Metro