វីរបុរស​បាល់​ទាត់​ជប៉ុន​លោក Kazuyoshi Miura បង្ហាញ​ខ្លួន​ជា​ថ្មី​ក្នុង​វ័យ ៥៦ ឆ្នាំ

កីឡាករបាល់ទាត់ជប៉ុនអាយុ ៥៦ ឆ្នាំ លោក Kazuyoshi Miura បានចេញប្រកួតឱ្យ Oliveirense កាលពីថ្ងៃសៅរ៍។

កីទ្បាករវ័យចំណាស់ជាងគេ Kazuyoshi Miura បានផ្លាស់មកចូលរួមជាមួយនឹងក្លិបលីគ ២ របស់ព័រទុយហ្គាល់ Oliveirense ក្នុង​លក្ខខណ្ឌ​ខ្ចីជើងពីក្លិប Yokohama FC រហូតដល់បញ្ចប់រដូវកាលនេះ។ ខណៈដែលខ្សែប្រយុទ្ធសញ្ជាតិ​​ជប៉ុន​ដែល​មាន​វ័យ ៥៦ ឆ្នាំរូបនេះបានចំណាយពេលអស់ ៣៨ ឆ្នាំ នៅលើវិស័យបាល់ទាត់មួយនេះ។

រូបភាព៖ Kyodo

វីរបុរសបាល់ទាត់ជប៉ុន Kazuyoshi Miura ដែលអ្នកគាំទ្រឱ្យឈ្មោះថា “King Kazu” បានចាប់ផ្តើមលេងបាល់លើកដំបូងនៅក្នុងក្លិប Santos របស់ប្រេស៊ីល កាលពីឆ្នាំ ១៩៨៦ មកម្ល៉េះ។ ទោះជាយ៉ាងណា លោក Kazuyoshi Miura ធ្លាប់​លេងឱ្យ​ក្លិប​ធំៗ​​ក្នុងតំបន់អឺរ៉ុបមួយចំនួនដូចជា Genoa របស់​អុីតាលី ចន្លោះពីឆ្នាំ ១៩៩៤ ដល់ ១៩៩៥ និង Dinamo Zagreb របស់ក្រូអាត នៅឆ្នាំ ១៩៩៩ ជាដើម។

រូបភាព៖ CUR

លោក Kazuyoshi Miura បានលេងឱ្យក្រុមជម្រើសជាតិជប៉ុន ៨៩ ដង ដោយបានឈ្នះពានរង្វាន់ Asian Cup ក្នុងឆ្នាំ ១៩៩២ និងជាអ្នកស៊ុតបញ្ចូលទីច្រើនជាងគេបំផុតទីពីររបស់ប្រទេសរហូតដល់ ៥៥ គ្រាប់ បន្ទាប់មកបានចូលនិវត្តន៍ពីក្រុមជម្រើសជាតិនៅឆ្នាំ ២០០០ ។ ជាមួយគ្នានេះកីទ្បាករ Kazuyoshi Miura បាននិយាយថា​៖ «លោកមាន​បំណង​លេង​បាល់​ទាត់​រហូត​ដល់​អាយុ ៦០ ឆ្នាំឯណោះ» ។

លោក Kazuyoshi Miura កើត​ថ្ងៃ​ទី ២៦ ខែ​កុម្ភៈ ឆ្នាំ ១៩៦៧ នៅ​ទីក្រុង Suzuka លោក​បាន​ចាប់ផ្ដើម​បាល់ទាត់​ដំបូង​​ក្នុង​កម្រិត​យុវជន​នៅ​ឆ្នាំ ១៩៨២ រហូតដល់​ឆ្នាំ ១៩៨៦ ទើប​ចាប់ផ្ដើម​ក្លិប​អាជីព​ដំបូង​ជាមួយ​ក្លិប Santos ដែល​​ជា​​ក្លិប​ល្បី​នៅ​លីគ​ប្រេ​ស៊ីល និង​ជា​បន្តបន្ទាប់ លោក​បាន​ផ្លាស់ប្ដូរ​ក្លិប​ចំនួន ១៥ ដង ទាំង​ក្លិប​ក្នុង និង​ក្រៅ​ប្រទេស។

ប្រភព៖ CNA, Japan Times