បំណែកកប៉ាល់ SS Montevideo Maru ដែលលិចកាលពីជាង ៨០ ឆ្នាំមុនត្រូវបានរកឃើញ

ថ្ងៃចន្ទ 24/04/2023 | 11:18 ព្រឹក

បំណែកកប៉ាល់ជប៉ុន SS Montevideo Maru ដែលត្រូវវាយពន្លិចអំឡុងសង្គ្រាមលោកលើកទី ២ ជាមួយនឹងអ្នកទោសជាង ១០០០ នាក់ត្រូវបានរកឃើញនៅសមុទ្រចិនខាងត្បូង។

កប៉ាល់ Montevideo Maru ។ រូបភាព៖ Australian War Memorial

យោងតាមសារព័ត៌មាន CNN កប៉ាល់ Montevideo Maru ត្រូវបានគេប្រទះឃើញនៅសមុទ្រកោះ Luzon នៃប្រទេសហ្វីលីពីន ក្នុងជម្រៅជាង ៤.០០០ ម៉ែត្រនៅសមុទ្រចិនខាងត្បូង។

ព័ត៌មាននេះត្រូវបានបញ្ជាក់ដោយឧបនាយករដ្ឋមន្ត្រីអូស្ត្រាលី Richard Marles ក្នុងវីដេអូដែលគាត់បានបង្ហោះកាលពីថ្ងៃទី ២២ ខែមេសា នៅលើគណនី Twitter ។ ឧបនាយករដ្ឋមន្ត្រីបាននិយាយថា ការរកឃើញនេះបានបញ្ចប់នូវសោកនាដកម្មធំបំផុតក្នុងប្រវត្តិសាស្ត្រដែនសមុទ្រនៃប្រទេសអូស្ត្រាលី។

កាលពីជាង ៨០ ឆ្នាំមុន នៅថ្ងៃទី ១ ខែកក្កដា ឆ្នាំ ១៩៤២ កប៉ាល់ Montevideo Maru ដែលកំពុងដឹកអ្នកទោសសង្រ្គាមចំនួន ១.០៦០ នាក់ទាំងអស់ ១៦ ប្រទេស ក្នុងនោះមានសមាជិកយោធាអូស្ត្រាលី ៨៥០ នាក់ ពីអតីតទឹកដី New Guinea ចាស់របស់អូស្ត្រាលីដល់កោះ Hainan ដែលជប៉ុនកាន់កាប់នៅពេលនោះ ស្រាប់តែត្រូវនាវាមុជទឹកអាមេរិកបាញ់ពន្លិច។ កប៉ាល់នេះមិនត្រូវបានសម្គាល់ថាកំពុងដឹកអ្នកទោសសង្គ្រាមឡើយ។

លោក Marles បាននិយាយថា៖ “បើមិនអាចកំណត់រកកប៉ាល់ Montevideo Maru នៅទីណា នឹងធ្វើឱ្យក្រុមគ្រួសារដែលមានសាច់ញាតិស្លាប់មិនអាចបញ្ចប់រឿងនេះ” ។

អាជ្ញាធរអូស្ត្រាលីបានសរសើរអ្នកដែលចូលរួមការស្វែងរកកប៉ាល់នេះ ក្នុងនោះមានក្រុមអ្នកជំនាញស្ទាបស្ទង់ជម្រៅសមុទ្រ និងសមាជិកកងកម្លាំងប្រដាប់អាវុធអូស្ត្រាលី ដោយអរគុណពួកគេដែលបានជួយបញ្ចប់រឿងនេះ សម្រាប់អ្នកដែលបាត់មនុស្សជាទីស្រលាញ់រយៈពេល ៨១ ឆ្នាំកន្លងមក។

ឧត្តមសេនីយទោ Simon Stuart អគ្គសេនាធិការកងទ័ពអូស្ត្រាលីបាននិយាយថា៖ “ខ្ញុំចង់ថ្លែងអំណរគុណដល់ក្រុម Silentworld និងក្រុមស្រាវជ្រាវដែលបានខិតខំប្រឹងប្រែង រួមទាំងក្រុម Unrecovered War Casualties នៃកងទ័ព ជាអ្នកដែលមិនធ្លាប់បោះបង់ក្តីសង្ឃឹមក្នុងការស្វែងរកកប៉ាល Montevideo Maru ។ ការខាតបង់បែបនេះមានរយៈពេលរាប់ទសវត្សរ៍ ហើយរំឭកយើងទាំងអស់គ្នាចំពោះការលះបង់ជីវិតពេលមានជម្លោះ កុំបំភ្លេចអោយសោះ” ។

នាយករដ្ឋមន្ត្រីអូស្ត្រាលី លោក Anthony Albanese បានសរសេរថា៖ “កិច្ចខិតខំប្រឹងប្រែងដ៏អស្ចារ្យនៅពីក្រោយការរកឃើញនេះ សំដៅលើការប្តេជ្ញាថ្នាក់ជាតិរបស់អូស្ត្រាលីដែលតែងតែចងចាំ ផ្តល់កិត្តិយសដល់អ្នកដែលបានជួយប្រទេសរបស់យើង” ។

ប្រភព៖ CNN