បុរសវ័យ ៦០ ឆ្នាំម្នាក់ត្រូវបញ្ជូនចូលមន្ទីរពេទ្យព្រោះតែហូបច្រឡំស្លឹកពុលមួយប្រភេទ

ថ្ងៃសៅរ៍ 22/04/2023 | 8:00 ព្រឹក

កាលពីថ្ងៃទី ១៧ ខែមេសា បុរសអាយុ ៦០ ឆ្នាំម្នាក់ នៅខេត្ត Miyagi បានហូបច្រឡំស្លឹកពុលមួយប្រភេទ និងត្រូវបញ្ជូនចូលមន្ទីរពេទ្យដោយមានរោគសញ្ញាដូចជាឈឺពោះ ក្អួតចង្អោរ ។ល។

បុរសរូបនេះត្រូវបានបញ្ជូនទៅមន្ទីរពេទ្យក្នុងទីក្រុង Shiogama ជាសំណាងគាត់ត្រូវបានជួយសង្គ្រោះទាន់ពេលវេលា ហើយចេញពីមន្ទីរពេទ្យប៉ុន្មានថ្ងៃក្រោយមក។

ដោយផ្អែកលើលទ្ធផលពិនិត្យរបស់វេជ្ជបណ្ឌិត ទំនងជាបុរសនោះបានហូបស្លឹកពុលមួយប្រភេទដែលមានឈ្មោះថា “Baikeisou” ដោយច្រឡំនឹងបន្លែ “Urui” ។ សារធាតុពុលក្នុងស្លឹក “Baikeisou” មិនអាចរលាយបាត់ព្រោះតែដាំឆ្អិននោះទេ។

ពិបាកនឹងបែងចែករវាង “Baikeisou” និង “Urui” ណាស់។ ប្រសិនបើហូបច្រឡំ “Baikeisou” អ្នកអាចនឹងមានរោគសញ្ញាដូចជារាគ ក្អួត ស្ពឹកដៃជើង ចំពោះករណីធ្ងន់ធ្ងរអាចបណ្តាលឱ្យសន្លប់ ឬបាត់បង់ជីវិត។