ជប៉ុនផ្តល់សិទ្ធិជ្រកកោនដល់ស្ត្រីស្រឡាញ់ភេទដូចគ្នាជនជាតិអ៊ូហ្គង់ដា

ថ្ងៃសុក្រ 21/04/2023 | 6:00 ព្រឹក

ទីភ្នាក់ងារអន្តោប្រវេសន៍ជប៉ុនបានផ្តល់សិទ្ធិជ្រកកោនដល់ស្ត្រីជនជាតិអ៊ូហ្គង់ដាម្នាក់ដែលជាអ្នកស្រលាញ់ភេទដូចគ្នា បន្ទាប់ពីតុលាការចេញសេចក្តីសម្រេចគាំទ្រស្រ្តីនោះ។

ស្ត្រីរូបនេះបានទទួលវិញ្ញាបនបត្រទទួលស្គាល់ជាជនភៀសខ្លួន និងប័ណ្ណស្នាក់នៅនៅការិយាល័យអន្តោប្រវេសន៍ប្រចាំតំបន់ Osaka កាលពីថ្ងៃពុធ។

ស្រ្តីជនជាតិអ៊ូហ្គង់ដាវ័យ ៣០ ឆ្នាំបាននិយាយថា នាងត្រូវប៉ូលិសអ៊ូហ្គង់ដាចាប់ខ្លួនព្រោះជាអ្នកស្រលាញ់ភេទដូចគ្នា និងទទួលរងអំពើហិង្សា ដែលបណ្តាលអោយនាងរងរបួសធ្ងន់។ នាងបានភៀសខ្លួនទៅប្រទេសជប៉ុនកាលពី ៣ ឆ្នាំមុន។

យ៉ាងណាមិញ សំណើសុំសិទ្ធិជ្រកកោនរបស់នាងត្រូវបដិសេធ ហើយនាងត្រូវស្នើឱ្យចាកចេញពីប្រទេសជប៉ុន។ ក្រោយមក នាងបានដាក់ពាក្យប្ដឹងដើម្បីទទួលបានសិទ្ធិ។

កាលពីខែមុន អង្គចៅក្រម Osaka បានស្នើឱ្យរដ្ឋាភិបាលជប៉ុនទទួលស្គាល់នាងជាជនភៀសខ្លួន។

តុលាការបានអោយដឹង ដោយសារជាក់ស្តែងប្រទេសអ៊ូហ្គង់ដាមានច្បាប់ព្រហ្មទណ្ឌដាក់ទោសអ្នកស្រឡាញ់ភេទដូចគ្នា ដូច្នេះអាចសន្និដ្ឋានបានថា បើនាងត្រឡប់ទៅប្រទេសនឹងត្រូវដាក់ទោស ឬឃុំខ្លួន។

រដ្ឋាភិបាលមិនបានជំទាស់ ដូច្នេះសេចក្តីសម្រេចរបស់តុលាការជាស្ថាពរ។

ឆ្លើយតបនឹងសារព័ត៌មាន ស្ត្រីរូបនេះបាននិយាយថា នាងមានអារម្មណ៍សប្បាយរីករាយ ដែលពេលនេះនាងអាចគិតពីអនាគតភ្លឺស្វាង។ នាងបានអោយដឹងថា នាងចង់អរគុណជាថ្មីដល់អ្នកដែលបានគាំទ្រនាងអំឡុងពេលនោះ។

ប្រភព៖ NHK