ប៉ូលិសជប៉ុនប្រើបញ្ញាសិប្បនិម្មិត AI ដើម្បីកំណត់ព័ត៌មានការផលិតអាវុធ

ថ្ងៃពុធ 19/04/2023 | 17:22 ល្ងាច

ប៉ូលិសជប៉ុនបានសម្រេចចិត្តប្រើបញ្ញាសិប្បនិម្មិត (AI) បង្កើនការត្រួតពិនិត្យលើបណ្តាញអុីនធឺណេត ដើម្បីស្វែងរកព័ត៌មានទាក់ទងនឹងកាំភ្លើង និងគ្រឿងផ្ទុះដែលផលិតដោយខ្លួនឯង។

ទីភ្នាក់ងារនគរបាលជាតិគ្រោងនឹងដាក់ឱ្យប្រើបច្ចេកវិទ្យាដែលគេហៅថា វិភាគភាសាធម្មតា ដើម្បីវិភាគឃ្លា និងប្រមូលខ្លឹមសារដែលអាចបង្កគ្រោះថ្នាក់ធ្ងន់ធ្ងរដល់អាយុជីវិតមនុស្ស។

ចាប់តាំងពីខែកុម្ភៈ ទីភ្នាក់ងារនេះបានស្នើឱ្យអ្នកគ្រប់គ្រងគេហទំព័រលុបខ្លឹមសារដែលបង្ហាញពីរបៀបផលិតកាំភ្លើង និងគ្រឿងផ្ទុះ។

បច្ចេកវិទ្យាដែលបានរៀបរាប់ខាងលើនឹងអនុវត្តចំពោះការបង្ហោះនៅលើ Twitter និង YouTube ។ ទីភ្នាក់ងារនេះសង្ឃឹមថា AI នឹងរកឃើញខ្លឹមសារគ្រោះថ្នាក់ ច្បាស់ជាជាងមធ្យោបាយបញ្ចូលពាក្យគន្លឹះ និងស្វែងរកដោយដៃ។

ប៉ូលីសបានងាកទៅតាមដានខ្លឹមសារលើអុីនធឺណេតយ៉ាងតឹងរ៉ឹង ក្រោយករណីអតីតនាយករដ្ឋមន្ត្រី លោក Abe Shinzo ត្រូវបុរសម្នាក់បាញ់សម្លាប់ដោយកាំភ្លើងផលិតដោយខ្លួនឯងកាលពីខែកក្កដាឆ្នាំមុន។

ចំពោះករណីមួយផ្សេងទៀតកាលពីថ្ងៃសៅរ៍ បុរសជនសង្ស័យបានគប់វត្ថុដែលហាក់ដូចជាគ្រឿងផ្ទុះផលិតដោយខ្លួនឯងដាក់នាយករដ្ឋមន្ត្រី លោក Kishida Fumio ប៉ុន្តែយ៉ាងណា នាយករដ្ឋមន្ត្រីមិនរងរបួសអ្វីឡើយ។

ប្រភព៖ NHK