រថយន្ត​​ហោះ​​ដំបូង​​គេ​​នៅ​ជប៉ុន​បើក​ការ​បញ្ជា​ទិញ​ក្នុង​​តម្លៃ​ ១,៥ លាន​​ដុល្លារ

ក្រុមហ៊ុន​ជប៉ុនបើក​ការ​បញ្ជា​ទិញ​រថយន្ត​ហោះ​មានកន្លែងអង្គុយពីរសម្រាប់បុគ្គលឯកជន រថយន្តមានតម្លៃ ១,៥ លាន​​ដុល្លារ​ ដែល​ដឹក​​ជញ្ជូន​នៅ​ឆ្នាំ ២០២៥ ។

គំរូដើម SD-05 របស់ SkyDrive ។ រូបភាព៖ SkyDrive

យោងតាម Japan Times បានអោយដឹង ក្រុមហ៊ុនផលិតរថយន្តហោះ SkyDrive ទទួលបានការបញ្ជាទិញដំបូងពីបុគ្គលឯកជន។ ផលិតផល​​ដែល​​ដាក់​​លក់​​គឺ​​ម៉ូដែល SD-05 មានកន្លែងអង្គុយ ២ លក់ក្នុងតម្លៃ ១,៥ លាន​ដុល្លារ។ អ្នកបញ្ជាទិញលោក Kotaro Chiba ដែល​ជា​អ្នក​បើក​យន្ត​ហោះ​មាន​អាជ្ញា​ប័ណ្ណ​នៅ​ជប៉ុន។ លោកក៏ជាម្ចាស់យន្ត​ហោះឯក​​ជន​នៃ​ក្រុម​ហ៊ុន HondaJet ផង​ដែរ។

លោក Chiba បានបង្ហោះនៅលើ Twitter ថា “ខ្ញុំជាម្ចាស់ដំបូងរបស់ SkyDrive SD-05 ។ ផ្ទៃមេឃជប៉ុននឹងបើកទូលាយសម្រាប់រថយន្តហោះ” ។ តាមពិតទៅ អ្នកបើកយន្តហោះខាងលើក៏ជាវិនិយោគិនម្នាក់ខាងវិស័យអាកាស​ចរណ៍​​ឯក​ជន​ផង​ដែរ។

លោកកាន់តំណែងជាស្ថាបនិក និងជាអ្នកគ្រប់គ្រងដៃគូមូលនិធិប្រថុយប្រថាន ដែលផ្តោតលើផ្នែកយន្តហោះគ្មានមនុស្ស​បើក។

ម៉ូដែល SD-05 ក្នុងបន្ទប់ធ្វើតេស្តនៃទីភ្នាក់ងារអាកាសចរណ៍ជប៉ុន។ រូបភាព៖ SkyDrive

មុននោះ SkyDrive ផ្តោតលើសាជីវកម្មប៉ុណ្ណោះ​ យ៉ាងណាក្រុមហ៊ុនទើបតែបើកលក់សម្រាប់បុគ្គលឯកជនកាល​ពី​សប្តាហ៍​​មុន។ បើតាមគម្រោងផលិតរថយន្តហោះដំបូងនឹងចេញពីរោងចក្រនៅឆ្នាំ ២០២៥ ។ តម្លៃ ១,៥ លានដុល្លារខាង​​លើ​មិន​​រាប់​​បញ្ចូល​​ការ​ថែទាំ និង​ប្រតិបត្តិ​ការ​នោះ​ទេ។

លោក Tomohiro Fukuzawa នាយក SkyDrive បាននិយាយថា ពួកគេទទួលបានសំណើជាច្រើនពីបុគ្គលឯកជន និងសាជីវកម្ម។ “យើងនឹងអភិវឌ្ឍយន្តហោះស្វ័យប្រវត្តិនាពេលអនាគត ចំណុចនេះជម្រុញដល់ទិដ្ឋភាពគ្រប់គ្នា​បើក​រថយន្ត​ហោះ​ប្រចាំ​ថ្ងៃ” លោក Fukuzawa បាននិយាយ។

ថ្នាក់ដឹកនាំខាងវិស័យរថយន្តជប៉ុនបានអោយដឹងថា រថយន្តហោះជាអនាគតឧស្សាហកម្មយូរអង្វែងក្នុងប្រទេស​ជប៉ុន។ ម៉ូដែល SkyDrive SD-05 ប្រើម៉ូទ័រអេឡិចត្រិច និងការហោះឡើងបញ្ឈរដូចឧទ្ធម្ភាគចក្រ។ ចំណុចនេះជួយកាត់​បន្ថយ​បញ្ហា​កក​ស្ទះ​នៅ​ព្រលាន​យន្ត​ហោះ។

រដ្ឋាភិបាល​ជប៉ុន​ក៏​កំពុង​ធ្វើ​សេចក្តី​ព្រាង​ច្បាប់​បន្ថែម​សម្រាប់​រថយន្ត​ហោះ។ ក្រុមប្រឹក្សានៃក្រសួងដឹកជញ្ជូនជប៉ុនទើបតែប្រកាសរបាយការណ៍បណ្តោះអាសន្នស្តីពីបទប្បញ្ញត្តិដំឡើងឧបករណ៍តាមដាន អាជ្ញាប័ណ្ណអ្នកបើកបររថយន្ត​ហោះ។ យាន​ជំនិះ​នេះ​ត្រូវ​គេ​រំពឹង​ថា​នឹងដំណើរការនៅឆ្នាំ ២០២៥ ។

ក្រៅ​ពី​រថយន្ត​អគ្គិសនី វិស័យរថយន្តហោះត្រូវបានគេរំពឹងថានឹងពេញនិយមនាពេលប៉ុន្មានឆ្នាំខាងមុខ។ ក្រុមហ៊ុន teTra Aviation ដែល​មាន​មូល​ដ្ឋាន​នៅ​ទីក្រុង Tokyo បានធ្វើតេស្ដសាកល្បងយន្តហោះគ្មានមនុស្សបើកបរ ជា​មួយ​នឹង​អ្នក​បើក​យន្ត​ហោះនៅ​ក្នុង​ផ្ទះ។ ក្រុមហ៊ុនផលិតគ្រឿងបន្លាស់រថយន្ត Denso បានសហការជាមួយ Honeywell International ដើម្បី​អភិវឌ្ឍ​គ្រឿង​បន្លាស់​សម្រាប់​រថយន្ត​ហោះ​ហើរ។

បណ្តាក្រុមហ៊ុននៅប្រទេសលោកខាងលិចក៏ចូលរួមក្នុងវិស័យនេះដែរ។ Volocopter នៃប្រទេសអាល្លឺម៉ង់ និងក្រុមហ៊ុន​អាកាស​ចរណ៍​អង់​គ្លេស​កំពុង​ព្យាយាម​ផ្សព្វ​ផ្សាយ​យាន​ជំនិះ​នេះនា​ពេល​ខាង​មុខ។

ប្រភព៖ Japan Times