ជប៉ុន​ត្រៀម​ដាក់​ចេញ​ប្រភេទ​សំបក​កង់​ដែល​មិន​ចាំ​បាច់​សប់​ខ្យល់

Bridgestone ជាម៉ាកយីហោសំបកកង់ឈានមុខគេនៅជប៉ុនបានអោយដឹង ពួកគេកំពុងសាកល្បងសំបកកង់ដែលមិនចាំបាច់សប់ខ្យល់។ បើតាមអ្នកផលិត សំបកកង់ប្រភេទនេះប្រើវត្ថុធាតុដើមជ័រសំយោគ resin ជា​​មួយនឹង​រចនា​​សម្ព័ន​​ពិសេស​ជួយ​បង្កើន​ភាព​ធន់ និង​គ្រប់​គ្រង​ចលនា​ខាង​ក្នុង​សំបក​កង់​ដោយ​ភាព​បត់​បែន។

ម្យ៉ាងវិញទៀត Bridgestone បានបន្តថា សំបកកង់ដែលមិនចាំបាច់សប់មានគុណសម្បត្តិច្រើនដូចជាមិនបែក​កង់ ឬ​ផ្ទុះ។ វា​​អាច​​ជួយ​ទ្រ​ទម្ងន់​​តួ​រ​ថយន្ត និង​ស្រូប​យក​កម្លាំង​ប៉ះទង្គិច ដោយអង្រួនទ្រង់​ទ្រាយ​បន្ទះប្លាស្ទិកពិសេស​ដែលនៅ​ជុំវិញ​សំបក​កង់។

ជាងនេះទៅទៀត សំបកកង់ប្រភេទនេះក៏រួមចំណែកក្នុងការដោះស្រាយបញ្ហាបរិស្ថានផងដែរ ព្រោះសំបកកង់ខាងក្រៅ​អាច​ប្តូរ​បាន​ច្រើន​ដង មុន​​ពេល​​សំបក​​កង់​​ខូច​​ធ្ងន់ និង​កែ​ច្នៃ​ឡើង​វិញ។

Bridgestone បានសហការគ្នាជាមួយក្រុមហ៊ុន Idemitsu Kosan ដើម្បីដាក់សំបកកង់មិនចាំបាច់សប់ខ្យល់នេះក្នុង​ការ​​សាក​ល្បង​លើ​រថយន្ត​អគ្គិសនី។

លោក Akira Oishi នាយកគ្រប់គ្រងទូទៅរបស់ Idemitsu Kosan បាននិយាយថា៖ “យើងជឿជាក់ថា គំនិតបង្កើតសំបកកង់មិនចាំបាច់សប់​ខ្យល់​របស់ Bridgestone មានភាពស្និទ្ធស្នាលនឹងបរិស្ថាន។ មិនបែកសំបកកង់អាចជួយកាត់បន្ថយហានិភ័យឈប់នៅកណ្តាលផ្លូវ ហើយត្រូវបានគេរំពឹងថា នឹងបង្កើនភាពងាយស្រួលសម្រាប់អ្នកបើក​បរ​នា​ពេល​អនាគ” ។

ប្រភព៖ Bridgestone