ប៉ូលិសក្រុងតូក្យូនាំខ្លួនជនសង្ស័យឆបោកតាមទូរស័ព្ទចំនួន ១៩ នាក់ទៅប្រទេសវិញ

ថ្ងៃអង្គារ 11/04/2023 | 10:26 ព្រឹក

ជប៉ុនបានបញ្ជូនក្រុមអ្នកស៊ើបអង្កេតមកព្រះរាជាណាចក្រកម្ពុជាដើម្បីនាំខ្លួនជនជាតិជប៉ុនចំនួន ១៩ នាក់ដែលត្រូវបានចាប់ខ្លួនពីបទឆបោកតាមទូរស័ព្ទ ដែលធ្វើសកម្មភាពក្នុងប្រទេសកម្ពុជា ហើយផ្ដោតលើប្រជាជននៅជប៉ុន។

នៅព្រឹកថ្ងៃច័ន្ទ ក្រុមស៊ើបអង្កេតប្រហែល ៥០ នាក់បានចាកចេញពីអាកាសយានដ្ឋាន Haneda ទីក្រុងតូក្យូមកដល់ទឹកដីនៃព្រះរាជាណាចក្រកម្ពុជា ហើយប៉ូលិសជប៉ុនគ្រោងនឹងនាំខ្លួនជនសង្ស័យទៅប្រទេសវិញនៅព្រឹកថ្ងៃអង្គារនេះ ដើម្បីអនុវត្តទោសតាមផ្លូវច្បាប់ ។

នាយកដ្ឋានប៉ូលិសក្រុងតូក្យូទទួលបានដីកាចាប់ខ្លួនមនុស្ស ១៩ នាក់ ដែលមានអាយុចន្លោះពី ២៥ ទៅ ៥៥ ឆ្នាំ បន្ទាប់ពីជនសង្ស័យទាំងនេះត្រូវបានចោទប្រកាន់ថាបោកប្រាស់ប្រាក់ប្រហែល ២៥០.០០០ យ៉េន (១,៩០០ ដុល្លារ) ពីអ្នករស់នៅទីក្រុងតូក្យូម្នាក់ដែលមានវ័យ ៦០ ឆ្នាំ ។

សមាជិកក្រុមនេះត្រូវបានគេជឿថា បានធ្វើប្រតិបត្តិការចេញពីបន្ទប់សណ្ឋាគារមួយកន្លែងក្នុងក្រុងព្រះសីហនុកាលពីខែមករា ខណៈដែលក្នុងប្រតិបត្តិការនោះ សមត្ថកិច្ចកម្ពុជាក៏បានរកឃើញបញ្ជីឈ្មោះពលរដ្ឋជប៉ុនដែលគេជឿថា ជាមុខសញ្ញាសម្រាប់ជនសង្ស័យទាក់ទងទៅឆបោក និងទូរសព្ទមួយចំនួនធំពីបន្ទប់សណ្ឋាគារ រីឯវត្ថុតាងទាំងនោះសមត្ថកិច្ចកម្ពុជាក៏បានប្រគល់អោយភាគីជប៉ុនហើយផងដែរ។

ប្រភព៖ NHK