តើអ្នកដឹង​ទេ​ថា​ផ្កា​​សាគូរ៉ា​​ភាគ​ច្រើន​​នៅ​ជប៉ុន​សុទ្ធ​តែ​ត្រូវ​បាន​បង្កាត់ និង​មាន DNA ដូច​គ្នា?

ប្រហែលជាអ្នករាល់គ្នាដឹងហើយថា ផ្កាសាគូរ៉ាជាប្រភេទផ្កាដែលតំណាងឲ្យ​ប្រទេសជប៉ុន។ អ្នកអាចគយគន់ទេស​ភាព​ផ្កាសាគូរ៉ា​នៅ​តំបន់​ជា​ច្រើន​ចាប់​ពី​ចុង​ខែ​មីនារហូតដល់ខែមេសា។ ដូច្នេះតើអ្នកដឹងទេថាពួកវាភាគច្រើនត្រូវ​បាន​បង្កាត់ និងមាន DNA ដូច​គ្នា​ដែរទេ? 

តាមពិតទៅ បច្ចេកទេសបង្កាត់ត្រូវបានបង្កើតឡើងតាំងពីសម័យសាមូរ៉ៃមកម្ល៉េះ។ ផ្កាដ៏ស្រស់ស្អាតទាំងនេះធ្វើឲ្យ​មនុស្ស​​គ្រប់​​គ្នា​មានអារម្មណ៍ថា និទាឃរដូវកំពុងមកដល់ បន្ទាប់ពីរដូវរងាកន្លងផុត និងធ្វើឲ្យ​អារម្មណ៍របស់ពួក​​គេ​​រីក​​រាយ​​ជាង​​មុន។

មិនថាមនុស្ស ឬរុក្ខជាតិ ជាទូទៅជំនាន់ក្រោយបង្កើតឡើងដោយការរួមបញ្ចូលរវាងឈ្មោល និងញី។ រាងកាយថ្មីត្រូវបាន​បង្កើត​ឡើង​ពី DNA ទាំងពីរ ដូច្នេះ​ហើយ​ឪពុក​ម្តាយ និង​កូន​មាន DNA ខុសគ្នា។

ប៉ុន្តែផ្កាសាគូរ៉ាជប៉ុនភាគច្រើនមាន DNA ដូចគ្នា ដោយសារតែគ្រាប់ពូជនៃដើមផ្កាសាគូរ៉ាមិន​អាច​បង្កើតជំនាន់​ក្រោយ​​តាម​ធម្មជាតិ​បាន។

ជប៉ុន​ជា​ប្រទេស​​ដាំ​ផ្កា​សាគូរ៉ាច្រើន ប្រហែលជាបំផ្លើសដែលនិយាយថា ផ្កាសាគូរ៉ានៅជប៉ុនទាំងអស់សុទ្ធតែត្រូវបានបង្កាត់ ប៉ុន្តែអាចនិយាយបានថាដើមសាគូរ៉ា Somei-yoshino ដែលគ្រប់គ្នាមើលឃើញនៅប្រទេសជប៉ុនសុទ្ធតែត្រូវបាន​បង្កាត់។

ដើមសាគូរ៉ា Somei-yoshino ត្រូវបានបង្កាត់ពូជដោយប្រភេទផ្កាសាគូរ៉ា Oshima-zakura និង Edo-higan នៅសម័យ Edo ជា​ពេល​ដែល​សាមូរ៉ៃ​គ្រប់​គ្រង​ប្រទេស។

មិនដូចជាបច្ចេកវិទ្យាបង្កាត់នាពេលសព្វថ្ងៃនេះដែលបញ្ជា DNA ដោយមីក្រូទស្សន៍នោះទេ ប៉ុន្តែត្រូវចំណាយពេល​យ៉ាង​ច្រើន​សម្រាប់​បង្កាត់​​​ប្រភេទ​​ផ្កា​​ទាំង​​ពីរ​​ឲ្យ​ក្លាយ​​ទៅជាផ្កាដែលល្អឥតខ្ចោះ។

ប៉ុន្តែលទ្ធផលនៅពេលដែល Somei-yoshino ចេញពន្លកបែរជាខ្វះខាតខាងផ្នែកជីវសាស្រ្ត ដោយសារពួកវាមិនអាច​​បង្កើត​ជំនាន់​ក្រោយ​ទៀត​បាន។ យ៉ាងណាមិញ ព្រោះតែចង់រក្សាដើមសាគូរ៉ា Somei-yoshino ស្រស់ស្អាតទាំងនេះ មនុស្ស​សម័យ​មុនប្រើ​បច្ចេកទេសដែលហៅថា កាត់មែក ផ្សាំ​មែក​ឈើ។

កាត់មែកជាវិធីសាស្រ្តកាត់មែកឈើកប់ក្នុងដី ហើយថែទាំបន្តិចម្តងៗរហូតដល់ចេញឫស។

រីឯការផ្សាំមែកឈើជាវិធីសាស្រ្តផ្សាំ​មែកឈើមួយលើដើមមួយផ្សេងទៀត។

ជាការពិតណាស់ ភាវៈដែលបង្កាត់ពូជដោយវិធីសាស្ត្រនេះមាន DNA ដូចគ្នា។ ប្រសិនបើពិបាកយល់ អ្នកអាចសាក​ល្បង​ស្រមៃ​ថា បើវិធីសាស្ត្រនេះត្រូវបានអនុវត្តចំពោះមនុស្ស នោះច្បាប់ចម្លងទាំងអស់របស់មនុស្សម្នាក់សុទ្ធតែមានមុខដូចគ្នា។

នៅជប៉ុនគេនិយាយថា ដើម Somei Yoshino មានប្រមាណ ១០ លានដើម។ ដូច្នេះបើប្រៀបទៅនឹងមនុស្ស មានចំនួន ១០ លាននាក់នៅជប៉ុនមានមុខដូចគ្នា។

Abe Kengo