ក្រុមហ៊ុនជប៉ុនបង្កើតបច្ចេកវិទ្យា AI ជួយបោសសម្អាតមីន

ថ្ងៃសុក្រ 31/03/2023 | 17:52 ល្ងាច

ក្រុមហ៊ុនអេឡិចត្រូនិកជប៉ុន NEC បានបង្កើតបច្ចេកវិទ្យាបញ្ញាសិប្បនិម្មិត (AI) ដែលអាចជួយស្វែងរកកន្លែងកប់មីន

បុគ្គលិកកាកបាទក្រហមអន្តរជាតិបោសសម្អាតមីននៅប្រទេសអុីរ៉ាក់ក្នុងឆ្នាំ ២០១៧ ។ រូបភាព៖ Kyodo

បច្ចេកវិទ្យា AI នេះអាចជួយបោសសម្អាតមីនយ៉ាងមានប្រសិទ្ធភាព និងកាត់បន្ថយចំនួនអ្នកស្លាប់ប្រចាំឆ្នាំដោយសារគ្រឿងផ្ទុះក្រោមដី។ ក្រុមហ៊ុនជប៉ុនបានអោយដឹងថា ពួកគេកំណត់គោលដៅផ្គត់ផ្គង់សេវាកម្មព្យាករណ៍មីនដែលដំណើរការដោយ AI ដល់រដ្ឋាភិបាល និងអង្គការអន្តរជាតិនៅខែមីនា ឆ្នាំ ២០២៤ ខាងមុខនេះ។

ក្នុងការសាកល្បងដែលធ្វើឡើងកាលពីខែមេសាដល់ខែតុលា ឆ្នាំ ២០២២ នៅតំបន់សង្រ្គាមជុំវិញអាស៊ី ក្រុមហ៊ុន NEC បានទទួលជោគជ័យក្នុងការព្យាករណ៍កន្លែងបង្កប់មីនតាមតំបន់មួយចំនួន ក្រោយពេលប្រើទិន្នន័យសណ្ឋានដីបើកចំហ ជាមួយនឹងមូលដ្ឋានយោធាដែលផ្គត់ផ្គង់ដោយកាកបាទក្រហមអន្តរជាតិ រួមទាំងព័ត៌មានរបស់ប្រជាជន។

ក្រុមហ៊ុន NEC បានអោយដឹងថា ពេលប្រើបច្ចេកវិទ្យា AI នេះ រយៈពេលស្វែងរក ៨០០ កន្លែងបង្កប់មីនអាចត្រូវបានកាត់បន្ថយ ពីរាប់ឆ្នាំមកសល់ត្រឹមប៉ុន្មានម៉ោង។ ថ្វីត្បិតតែត្រូវការអ្នកកំណត់ទីតាំងបង្កប់មីនដោយប្រើឧបករណ៍ យ៉ាងណា NEC សង្ឃឹមថា បច្ចេកវិទ្យា AI របស់ពួកគេនឹងកាត់បន្ថយដំណើរការដោះមីន។

ក្រុមហ៊ុនក៏មានបំណងកែលម្អល្បឿន និងកម្រិតរកឃើញខ្ពស់នៃបច្ចេកវិទ្យា AI ព្យាករណ៍ទីតាំងបង្កប់មីន ដោយរួមបញ្ចូលប្រភពព័ត៌មានផ្សេងៗគ្នា ឧទាហរណ៍ទិន្នន័យដែលបានរកឃើញដោយយន្តហោះបើកស្វ័យប្រវត្តិ និងផ្កាយរណបដែលប្រមូលបាន។

យោងទៅតាម NEC ក្នុងឆ្នាំ ២០២១ សំណល់សង្រ្គាមដូចជាមីន និងគ្រាប់បែកចង្កោមបានសម្លាប់មនុស្សយ៉ាងហោចណាស់ ៥.៥៥៤ នាក់នៅលើពិភពលោក ដែលភាគច្រើនជាប្រជាជនធម្មតា។

ប្រភព៖ NHK