ស្លៀកឈុតអាវធំ ពាក់ក្រវ៉ាត់ក និងស្បែកជើងស្បែក បុរស​មក​ពី​ជប៉ុន​​ឡើង​​កំពូល​ភ្នំ​ដែល​មាន​កម្ពស់ ៤០៩៥ ម៉ែត្រ

លោក Nobutaka Sada ស្លៀក​ឈុត​អាវ​ធំ​ឡើង​ភ្នំ Kinabalu ប្រទេស​ម៉ាឡេស៊ី។ រូបភាព៖ Straitstimes

នៅពេលដែលអ្នកធ្វើដំណើរ ឬឡើងភ្នំ ជ្រើសរើសសម្លៀកបំពាក់ដែលស័ក្តិសមពិតជាសំខាន់ណាស់ ត្រូវត្រៀមមុនពេលចេញដំណើរ ដូចជាអាវក្រៅ ស្រោម​ដៃ ឬស្បែកជើងកីឡាជាដើម។ ទោះជាយ៉ាងណា តើអ្នកធ្លាប់គិតចង់ស្លៀក​ឈុត​អាវ​ធំ និង​ស្បែក​ជើង​ស្បែក​ដែរ​ទេ? បុរសមកពីជប៉ុនម្នាក់បានធ្វើអោយមនុស្សជាច្រើនភ្ញាក់ផ្អើលពេលឃើញដំណើរឡើងភ្នំរបស់គាត់។

យោងតាម Straitstimes លោក Nobutaka Sada អាយុ ៤៩ ឆ្នាំ ជាជាងកាត់ដេរនៅប្រទេសជប៉ុន។ គាត់ឡើងភ្នំ Kinabalu ដែលមានកម្ពស់ ៤០៩៥ ម៉ែត្រនៅប្រទេសម៉ាឡេស៊ី ហើយស្លៀកឈុតអាវធំ និងពាក់ស្បែកជើងស្បែក។

វីដេអូដែលត្រូវបានចែករំលែកលើបណ្តាញសង្គមបង្ហាញថា គាត់ដើរឆ្លងកាត់ផ្លូវតូចដោយស្លៀកឈុតអាវធំ និងស្បែកជើងស្បែក ដៃកាន់​កា​បូប​សម្រាប់​បុគ្គលិក​ការិយា​ល័យ។

រូបភាពដែលចែករំលែកលើបណ្តាញសង្គមបង្ហាញអោយឃើញថា លោក Sada កំពុងឈរនៅលើជម្រាលភ្នំ Kinabalu ដោយ​រីក​រាយ​នឹង​ទេស​ភាព​ភ្នំ។

ពេលឃើញឈុតសម្លៀកបំពាក់របស់គាត់ និងកាបូប គាត់សមថាទៅធ្វើការជាជាងឡើងភ្នំ។ យ៉ាងណានៅទីបំផុត គាត់​បាន​បញ្ចប់​ដំណើរ​ឡើង​ភ្នំ​ដែល​ខ្ពស់​បំផុតរបស់ម៉ាឡេស៊ី ជាមួយនឹងឈុតសម្លៀកបំពាក់ដ៏ពិសេសនេះ។

គាត់បានចែករំលែកលើបណ្តាញសង្គម Twitter របស់ខ្លួនថា “ខ្ញុំនៅក្នុងតង់ក្រោមផ្ទៃមេឃដែលពោរពេញដោយផ្កាយ ព្រះច័ន្ទ។ ពិត​ជា​ពិសេស​ខ្លាំង​ណាស់” ។

ឈុតស្លៀកបំពាក់របស់លោក Sada ជួយឱ្យគាត់មានអារម្មណ៍កក់ក្តៅ ក្រោមអាកាសធាតុត្រូពិចសើម ទាំងមេឃភ្លៀង​ផង​នោះ។ គាត់ថែមទាំងនិយាយលេងថា ខ្លួនឡើងប្រជុំលើកំពូលភ្នំទាន់ពេលនៅឡើយ។

អ្នកលើកអីវ៉ាន់សួរ​ថា​គាត់​មក​ពី​ណា? គាត់ឆ្លើយបែបកំប្លែងថា “ខ្ញុំមកពីជប៉ុន ខ្ញុំមានកិច្ចប្រជុំអាជីវកម្មមួយនៅ​លើ​កំពូល​ភ្នំ Kinabalu” ។

មនុស្សជាច្រើនភ្ញាក់ផ្អើលចំពោះការធ្វើដំណើរឡើងភ្នំដែលមានកម្ពស់ ៤០៩៥ របស់លោក Sada ទាំងស្លៀក​ឈុត​អាវ​​ធំ និង​​ក្រវ៉ាត់​​ក​​។

“តើនរណាប្រគល់អាសយដ្ឋានបន្ទប់ប្រជុំអោយគាត់ខុសឬ?” នេះជាភស្តុតាងជាក់ស្តែងចំពោះការខិតខំប្រឹងប្រែង​… អ្នក​ប្រើ​បណ្តាញសង្គមបាន​បញ្ចេញ​មតិ។ យ៉ាង​ណា​មិញ នេះ​មិន​មែន​ជា​លើក​ទី​មួយ​ឡើយ ដែល​បុរស​រូប​នេះ​ស្លៀក​ឈុត​​អាវ​​ធំ​​ទៅ​​កន្លែង​​ពិសេសៗ​​នោះ​​ទេ។

គាត់ធ្លាប់ស្លៀកឈុតអាវធំទៅមុជទឹកនៅសមុទ្រ Genkai ឡើងភ្នំ Shirouma ដែលជាប់ចំណាត់ថ្នាក់លេខ ២៦ នៅជប៉ុន ជិះ​ស្គី​ទឹក​កក​នៅ Hokkaido ឬរត់ម៉ារ៉ាតុងនៅ Tokyo ផងដែរ។

ភ្នំ Kinabalu នៅលើកោះ Borneo (ប្រទេសម៉ាឡេស៊ី) មានកម្ពស់ ៤០៩៥ ម៉ែត្រពីលើនីវ៉ូទឹកសមុទ្រ ជាកន្លែងដែលទាក់ទាញភ្ញៀវ​ទេស​​ចរណ៍​ត្រូវបាន​អង្គ​ការ​យូណេ​ស្កូ​ទទួល​ស្គាល់​ជា​តំបន់បេតិកភណ្ឌពិភពលោកក្នុងឆ្នាំ ២០០០ ។

នៅទីនេះមានរុក្ខជាតិខៀវស្រងាត់ និងសត្វប្លែកៗជាច្រើនប្រភេទដែលមិនមាននៅកន្លែងផ្សេង។ នៅ​ជុំវិញ​តំបន់​នោះ​​មាន​​សម្ភារៈ​​បរិក្ខារ​​ជា​​ច្រើន​​ដូច​​ជា​ទឹក ភ្លើង​នៅ​កន្លែង​បោះ​ជំរំ​កណ្តាលភ្នំសម្រាប់បម្រើដល់ភ្ញៀវទេសចរណ៍។

ប្រភព៖ Skydoor