ឈប់​សម្រាក​លំហែ​មាតុ​ភាព​មាន​ប្រាក់​ខែ ហេតុ​អ្វី​បាន​ជា​បុរស​ជប៉ុន​នៅ​តែ​បារម្ភ​មិន​ចង់នៅផ្ទះមើលថែទាំកូន?

បុរសជាឪពុកនាំកូនដើរលេងក្នុងសួនដែលមើលទៅរំលឹកដល់ទិដ្ឋភាព “ikumen” ជប៉ុន ឬអាចនិយាយបានថាជាបុរសល្អម្នាក់។

ច្រើនទសវត្សរ៍កន្លងមកនេះ រដ្ឋាភិបាលជប៉ុនបានព្យាយាមពង្រឹងពាក្យ “ikumen” ដើម្បីទប់ទល់​នឹង​ស្ថានភាពភ្លេច​បាយ ភ្លេច​ទឹក​របស់​បុរស ដែលបណ្តាលឱ្យពួកគេគ្មានពេលសម្រាប់ថែទាំគ្រួសារ ជាពិសេសលើកកម្ពស់អត្រាកំណើត​នៅ​ប្រទេស​ជប៉ុន។

បុរស​ជប៉ុន​មិន​ហ៊ាន​ឈប់​សម្រាក​លំហែមាតុភាពទេ ​ព្រោះ​ខ្លាច​ប៉ះពាល់​ដល់​ការងារ។ រូបភាព៖ Asahi Shimbun

សារព័ត៌មាន CNN បានអោយដឹងថា ដើម្បីផ្លាស់ប្តូរស្ថានភាពនេះ នាយករដ្ឋមន្ត្រីជប៉ុនលោក Kishida Fumio ថ្មីៗ​នេះ​បាន​ប្រកាស​គោល​នយោ​បាយ​​ជា​​បន្ត​បន្ទាប់ដូចជាបន្ថែមជំនួយក្នុងការចិញ្ចឹម​កុមារ ដោយសន្យាផ្តល់ឱ្យកម្មករ​បុរស​ចំនួន ៥០% ឈប់សម្រាកលំហែមាតុភាពនៅឆ្នាំ ២០២៥ និងកើនឡើង ៨៥% នៅឆ្នាំ ២០៣០ ធៀបនឹង​អត្រា​បច្ចុប្បន្ន ១៤% ។

ទោះជាយ៉ាងណា ប្រជាជន​ជប៉ុន​ជាច្រើន​នៅ​តែ​មានការសង្ស័យចំពោះ​ប្រសិទ្ធភាព​នៃ​គោលនយោបាយ​ថ្មី ដោយ​សារ​តែ​ប្រទេស​នេះ​កំពុង​ប្រឈម​មុខ​នឹងអត្រាកំណើតទាប និងចំនួនប្រជាជន​ចំណាស់រយៈពេល​យូរ​មក​ហើយ។

បង Makoto Iwahashi ដែលជាសមាជិក POSSE សហជីពការងាររបស់យុវជនបាននិយាយថា ថ្វីត្បិតតែរដ្ឋាភិបាល​​មាន​​បំណង​ល្អ ប៉ុន្តែ​បុរស​ជន​ជាតិ​ជប៉ុន​នៅ​តែមិនហ៊ានឈប់សម្រាក ព្រោះពួកគេខ្លាចប៉ះពាល់ដល់ការឡើង​ឋាន។

យោងតាមសេចក្តី​ព្រាង​ច្បាប់​ដែលសភា​ជប៉ុន​អនុម័ត​ក្នុង​ឆ្នាំ ២០២១ បុរសមានសិទ្ធិទទួលបានការឈប់សម្រាកលំហែមាតុភាព ៤ សប្តាហ៍ និងទទួល​បាន​ប្រាក់​ខែ ៨០% ។ ប៉ុន្តែជាក់ស្តែង បុរសជប៉ុននៅតែខ្លាចមិនហ៊ាន​ឈប់​សម្រាក ព្រោះ​ខ្លាច​ប៉ះ​ពាល់​ដល់​ការ​ឡើង​ឋាន ឬត្រូវផ្ទេរតំណែងផ្សេងដែលមិនសូវមានឳកាសឡើងឋាន។

បង Iwahashi និយាយថា “ការផ្លាស់ប្តូររបបឈប់សម្រាកលំហែមាតុភាពក៏មិនបានជួយឱ្យអត្រាកំណើតទាបប្រែប្រួល​នោះ​ដែរ” ។

លោក Hisakazu Kato សាស្ត្រាចារ្យផ្នែកសេដ្ឋកិច្ចនៅសាកលវិទ្យាល័យ Meiji ក្នុងទីក្រុងតូក្យូ បាននិយាយថា ជាច្រើន​ឆ្នាំ​កន្លង​មក​នេះ ក្រុម​ហ៊ុន​ធំៗ​បាន​ទទួល​យក​ការ​ឈប់សម្រាកលំហែមាតុភាពរបស់បុគ្គលិក ប៉ុន្តែក្រុមហ៊ុនតូចៗនៅតែស្ទាក់ស្ទើរ។

លោក Kato បន្តទៀតថា “ក្រុមហ៊ុន​តូចៗ​ខ្លាច​ប្រឈម​នឹង​កង្វះ​កម្លាំង​ពលកម្ម​ដោយសារ​បុគ្គលិក​ឈប់​សម្រាក​មើលថែទាំកូន ហើយរឿងនេះបានដាក់សម្ពាធទៅលើបុរសជាឪពុកចង់ឈប់សម្រាកមើលថែទាំកូននាពេលអនាគត” ។

ឱកាស​ចុងក្រោយ

ក្នុងឆ្នាំ ២០២២ លើកដំបូងចំនួនទារកចាប់កំណើតនៅជប៉ុនធ្លាក់ចុះក្រោម ៨០ ម៉ឺនចាប់តាំងពីឆ្នាំ ១៨៩៩ ។ ថ្មីៗនេះ នាយករដ្ឋមន្ត្រីលោក Kishida ក៏បានដាក់ចេញសេចក្តីប្រកាសថា “រយៈពេល ៦ ទៅ ៧ ឆ្នាំខាងមុខជាឱកាសចុង​ក្រោយ​ដើម្បី​ផ្លាស់​ប្តូរ​អត្រា​កំណើត​ទាប” ។

សាស្ត្រាចារ្យ Stuart Gietel-Basten នៅសាកលវិទ្យាល័យវិទ្យាសាស្រ្ត និងបច្ចេកវិទ្យាហុងកុងបាននិយាយថា “ការលើក​កម្ពស់​គោល​ការណ៍​ឈប់​សម្រាក​លំហែមាតុ​ភាព​ជា​រឿង​ល្អ។ វានាំមកនូវអាកប្បកិរិយាវិជ្ជមានទាំងបុរស និងស្ត្រី។ ទោះ​ជា​យ៉ាង​ណា បើមិនផ្លាស់ប្តូរវប្បធម៌ និងអាកប្បកិរិយា ផល​ប៉ះ​ពាល់​នៃ​គោល​នយោបាយនេះ​អាច​នឹង​មានកំណត់” ។

រយៈពេលធ្វើការយូរធ្វើអោយបុរសជប៉ុនគ្មានពេលសម្រាប់គ្រួសារ។ រូបភាព៖ Bloomberg

បុរសម្នាក់ឈ្មោះ Riki Khorana អាយុ ២៦ ឆ្នាំ ដែលមានគម្រោងរៀបការជាមួយមិត្តស្រីនាខែមិថុនាខាងមុខនេះ បាន​​និយាយ​​ថា ការ​ចំណាយ​លើ​​ជីវភាព​​កាន់​តែច្រើនជាកង្វល់ដ៏ធំបំផុតសម្រាប់អ្នកកសាងគ្រួសារ។

ក្នុងនាមជា​វិស្វករ​​នៅ​សាជីវកម្ម​ធំ Khorana យល់ថា ខ្លួនរកចំណូលបានច្រើនគួរសម។ ទោះជាយ៉ាងណា គាត់កំពុង​រស់​នៅជា​មួយ​ឪពុក​ម្តាយនៅ Yokohama ដែលជាទីក្រុងធំទីពីររបស់ជប៉ុននៅភាគខាងត្បូង Tokyo ។

ក្រោយពេលរៀបការ Khorana នឹងរើទៅនៅផ្សេង ប៉ុន្តែបន្តនៅទីក្រុង Yokohama ដោយសារតម្លៃជួលនៅ Tokyo ខ្ពស់។ បើ​តាម​ក្រុមហ៊ុន​ប្រឹក្សា​ Mercer របស់អាមេរិក Tokyo ជាប់ចំណាត់ថ្នាក់លេខ ៩ ទីក្រុងដែលមានការចំណាយខ្ពស់លើពិភពលោក។

បច្ចុប្បន្ន Khorana មាន​គម្រោង​បង្កើត​កូន​ពីរ​នាក់ យ៉ាងណាបាននិយាយថា នឹង​ពិចារណា​មាន​កូន​បន្ថែម​ទៀត ប្រសិន​​បើ​​រដ្ឋាភិបាល​​មាន​​គោល​នយោបាយ​​ជំនួយ​ដែល​​មាន​​ប្រសិទ្ធភាព​​ជាង​​នេះ។

សព្វថ្ងៃអត្រាកំណើតនៅជប៉ុនគឺ ១,៣ កុមារ/ស្ត្រី ក្រោមកម្រិត ២,១ កុមារ/ស្ត្រី ដើម្បីធានាបាននូវស្ថិរភាពចំនួនប្រជាជន។

ប្រភព៖ Skydoor