ម្ចាស់​ភោជនីយ​ដ្ឋាន​ជប៉ុន​ផ្ដល់​អាហារ​ហ្វី្រ​ក្នុង​មួយ​សប្ដាហ៍ម្ដងដល់ Single-Parent

ជារៀងរាល់ថ្ងៃសៅរ៍ នៅ Nagoya ប្រទេសជប៉ុន Single-Parent (ឳពុក ឬម្ដាយជាអ្នកចិញ្ចឹមកូន) អាចទទួល​ទាន​អាហារ​ពេល​ល្ងាច​​ដោយ​ឥត​គិត​ថ្លៃ​នៅ​ភោជនីយ​ដ្ឋាន​សាច់​អាំង Yakiniku Awaza ។

មតិរិះគន់របស់ភ្ញៀវជាកម្លាំងជម្រុញដល់ម្ចាស់ហាងលោក Katsumi Kito ។ រូបភាព៖ Sanami Kato/Mainichi

បើតាម The Mainichi ចំពោះការបំផុសគំនិត “អាហារឥតគិតថ្លៃ” របស់ម្ចាស់ភោជនីយដ្ឋានលោក Katsumi Kito ក្នុង​គោល​បំណង​ជួយ​ដល់​អ្នកដែលជួបការលំបាកដោយសារជំងឺរាតត្បាតកូវីដ ១៩ ។

បច្ចុប្បន្នចំនួនភ្ញៀវក្នុងភោជនីយដ្ឋានមិនសូវល្អដូចកាលមុនជំងឺរាតត្បាតឡើយ ប៉ុន្តែម្ចាស់ហាងដែលមានវ័យ ៦៣ ឆ្នាំរូបនេះនៅតែសប្បាយចិត្តពេលឃើញគ្រប់គ្នារីករាយ។ លោកសង្ឃឹមថា Yakiniku Awaza នឹងក្លាយជាកន្លែង​​​ដែល​​មាន​ភ្ញៀវ​ចូលច្រើននៅថ្ងៃឈប់សម្រាក។

នៅឆ្នាំ ២០១០ លោក Katsumi Kito លាឈប់ការងារដែលទទួលបានប្រាក់ខែ ដើម្បីបើកហាងសាច់អាំង។ នៅតំបន់​នេះ​មានហាងសាច់អាំង yakiniku ច្រើន ការប្រកួតប្រជែងខ្ពស់ ប៉ុន្តែសាច់គោដែលឆ្ងាញ់បំផុតក្នុងភោជនីយ​ដ្ឋាន​របស់​លោក Kito ទាក់​ទាញ​ភ្ញៀវ​យ៉ាង​ច្រើន។

បន្ទាប់មក ដូចជាកន្លែងដទៃទៀតដែរ ភោជនីយដ្ឋានរបស់លោក Kito រងផលប៉ះពាល់ដោយសារជំងឺរាត​ត្បាត។ ដោយ​គោរព​តាមបទប្បញ្ញត្តិកាត់បន្ថយរយៈពេលបើកហាង គាត់អាចបន្តអាជីវកម្មតាមរយៈមូលនិធិជំនួយ​ពី​រដ្ឋាភិបាល។

ក្នុង​អំឡុង​ពេល​នេះ គាត់បានស្គាល់ហាងដែលជួយដល់ Single-Parent ។ ហើយក៏ចង់រួមចំណែក​ជួយ​ដល់​ពួក​គេដែរ កាលរដូវក្តៅឆ្នាំ ២០២០ លោក Katsumi Kito បានសម្រេចចិត្តរៀបចំតុអាហារដោយឥតគិតថ្លៃរាល់យប់ថ្ងៃសៅរ៍ វេលាម៉ោង ៥ កន្លះដល់ម៉ោង ៧ ។ ភ្ញៀវដែលមានសំណាងនឹងទទួលបានឈុត “Awaza Set” ក្នុង​តម្លៃ ២.៥០០ យ៉េន​ម្នាក់។ ជា​ធម្មតា ឈុត​អាហារ​នេះ​មាន​តែ​នៅ​ថ្ងៃ​ធ្វើ​ការ​ប៉ុណ្ណោះ។

ស្រ្តីមេម៉ាយអាយុ ៣៥ ឆ្នាំ និងកូន ២ នាក់កំពុងទទួលទាននៅហាង Yakiniku Awaza ។ រូបភាព៖ Sanami Kato/Mainichi

សកម្មភាពដ៏មានអត្ថន័យនេះបន្តបាន ១ ឆ្នាំក៏ផ្ទុះជំងឺរាតត្បាតកូវីដ ១៩ ដោយបង្ខំឱ្យភោជនីយដ្ឋានត្រូវបិទជាបណ្តោះអាសន្ន។ កាលពីខែធ្នូ ឆ្នាំ ២០២២ ភោជនីយដ្ឋាន Yakiniku Awaza បើកឡើងវិញ។

ដោយរងផលប៉ះពាល់ដោយសារជំងឺរាតត្បាត និងទំនិញឡើងថ្លៃ ចំនួន​ភ្ញៀវថយ​ចុះ ២០% បើ​ធៀប​នឹងកាលពីមុន។ ទោះជាយ៉ាងណា ការសរសើរថា “ខ្ញុំមិនធ្លាប់ហូបសាច់ដែលទន់បែបនេះទេ” ឬ “ពិតជាឆ្ងាញ់ណាស់ សូមអរគុណ” របស់​​ភ្ញៀវតែង​តែ​លើកទឹកចិត្តគាត់។

កាល​ពី​ចុង​ខែ​មុន ក្មេង​ប្រុស​អាយុ ១២ ឆ្នាំ​ម្នាក់​លើក​ម្រាម​ដៃជាសញ្ញា Like ហើយ​លាន់​មាត់​និយាយថា “នេះជាមុខម្ហូបដែលឆ្ងាញ់បំផុត” ពេលកំពុងបរិភោគអាហារជាមួយម្តាយ និងបងស្រី។ នៅពេលដែលមុខម្ហូបនីមួយៗត្រូវបានលើក​ឡើង ម្តាយ​កូន ៣ នាក់​រីក​រាយ និងនិយាយខ្សឹប​ប្រាប់​គ្នា​ថា “យូរណាស់មកហើយទើបយើងចេញក្រៅហូប” ។

លោក Kito បានចែករំលែកថា “យើងទទួលបានភាពរីករាយ និងក្លាហានជាច្រើនពីអតិថិជន។ ដរាបណាភោជនីយ​ដ្ឋាន​នៅ​តែ​បើក​ទ្វារ យើង​នឹង​បន្ត​ការ​ងារ​នេះ” ។

កាល​ពី​ខែ​កញ្ញា​កន្លង​ទៅ សហព័ន្ធ​សុខុមាលភាព​ជប៉ុន​បាន​ស្ទង់​មតិ​ Single-Parent ចំនួន ៥៤៧ គ្រួសារ​ដែល​មានកូន​ក្រោម​អាយុ ២០ ឆ្នាំ។ លទ្ធផល​បាន​បង្ហាញ​ថា ក្រោមឥទ្ធិពលជំងឺកូវីដ ១៩ ឪពុកម្តាយចំនួន ១៣% គ្មាន​ការ​ងារ​​ធ្វើ និង ៤២% ត្រូវកាត់បន្ថយការងារ។

Single-Parent ៤១% ត្រូវប្រឈមនឹងជីវភាព “កាន់តែពិបាក” និង ៥៣% មានអារម្មណ៍ថាគ្រប់យ៉ាង “កំពុង​តែ​ពិបាក​ទៅៗ” ។

ចំណាយលើជីវភាព ឬការសិក្សាក៏ជាបញ្ហាប្រឈមដ៏ធំមួយចំពោះ Single-Parent ផងដែរ។

Hiroe Yamamoto អគ្គលេខាធិការ​សហព័ន្ធ​ចំពោះបញ្ហា Single-Parent និងសុខុមាលភាពកុមារថ្នាក់ខេត្តបានចែករំលែកប្រាប់ Mainichi Shimbun ថា៖ “មនុស្សជាច្រើនកំពុងតែមានបន្ទុកធ្ងន់នៅពេលដែលប្រាក់ខែមិនមានស្ថេរភាពដូចពីមុន ហើយការចំណាយប្រចាំថ្ងៃកើនឡើង។ ស្ថាន​ភាព​​នេះ​ប៉ះពាល់​ដល់​ Single-Parent ដែលទ្រទ្រង់ជីវភាពម្នាក់ឯង។ ទោះ​ជា​យ៉ាង​ណា មនុស្សមួយចំនួន​មិន​អាច​ចែក​រំលែក​បញ្ហា​​របស់​​ខ្លួន​​បាន។ ដូច្នេះហើយ ការដែលគ្រប់គ្នារួមកម្លាំងជួយដល់ពួកគេសំខាន់ណាស់” ។

ប្រភព៖ The Mainichi