វីដេអូផិតក្បត់​របស់​ប្រពន្ធ និង​អតីតស្វាមី​ត្រូវ​បុរស​ជា​ប្តី​ចាក់​ផ្សាយ​ក្នុង​ថ្ងៃ​មង្គល​ការ​កូន​ស្រី

ពិធីមង្គលការរបស់ Momoka ត្រូវបំផ្លាញដោយសារវីដេអូផិតក្បត់របស់ឪពុកម្តាយ។ ចំណែកអ្នកដែលបង្ហាញឃ្លីប​គឺ​ជា​ឪពុក​​ចុង​របស់​នាង​ឈ្មោះ Yuta ទៅវិញ។

ប្តីបង្ហាញឃ្លីប​ប្រពន្ធ​ផិតក្បត់ក្នុង​ពិធី​មង្គលការ​កូនស្រី​។

បើតាម Mothership ក្នុងពិធីមង្គលការ អ្នកដឹកនាំកម្មវិធីបាននិយាយថា លោក Yuta អាយុ ៣៧ ឆ្នាំបានរៀបចំរឿង​ដែល​គួរ​អោយ​ភ្ញាក់ផ្អើល​សម្រាប់​កូន​ក្រមុំ ហើយស្នើឱ្យភ្ញៀវក្រឡេកមើលអេក្រង់ក្នុងសាលអាពាហ៍​ពិពាហ៍។

មិននឹកស្មាន អារម្មណ៍រំភើបរបស់ Momoka ប្រែទៅជារន្ធត់ និងអស់សង្ឃឹមភ្លាមៗ នៅពេលដែលវីដេអូលើអេក្រង់​បង្ហាញ​ពី​រូប​ភាព​ម្តាយ​នាង Hiroko មានទំនាក់ទំនងស្នេហាលួចលាក់។

បន្ទាប់មក លោក Yuta កាន់មីក្រូហ្វូន ហើយនិយាយថា៖ “មនុស្សពីរនាក់នេះក្បត់ខ្ញុំ” ។

បុរសក្នុងឃ្លីបនោះគឺ Satoshi អតីតស្វាមីអ្នកស្រី Hiroko ហើយក៏ជាឪពុកបង្កើតរបស់ Momoko ផងដែរ។ លោកក៏​​កំពុង​ចូល​​រួម​​ពិធី​​មង្គល​ការដែរ បន្ទាប់មកបានចាកចេញក្រោយពេលមើលវីដេអូ។

កូនក្រមុំស្រក់​ទឹក​ភ្នែក ​ហើយ​និយាយ​ថា ប៉ាម៉ាក់បានបំផ្លាញពិធីមង្គលការរបស់ខ្ញុំ។

ពិធីមង្គលការរបស់កូនស្រីត្រូវបំផ្លាញដោយសារ​ដោយសារវីដេអូផិតក្បត់របស់ឪពុកម្តាយ។

ជាច្រើនឆ្នាំមុន អ្នកស្រី Hiroko និងលោក Satoshi លែងលះគ្នាដោយ​សារ​តែ​បំណុលរបស់លោក Satoshi ក្រោយអាជីវកម្ម​​​បរាជ័យ។ ពួក​គេ​ទើប​តែ​ជួប​គ្នា​ឡើង​វិញក្រោយពេលពិភាក្សារឿងរៀបការកូនស្រី ហើយ​ក៏​ចាប់​ផ្ដើម​មាន​ទំនាក់​ទំនង​​ស្នេហា​​តាំង​​ពី​​ពេល​​នោះ​មក​ដែរ។

អ្នកស្រី Hiroko បានសារភាពថា “យើងលែងលះគ្នាមិនមែនដោយសារអស់ស្រលាញ់នោះទេ ឥឡូវនេះគាត់បានក្លាយ​​ជា​បុរស​ដែល​ជោគ​ជ័យ​​ម្នាក់ ស្នេហា​របស់​ខ្ញុំ​ចំពោះ​គាត់មានឡើងវិញ ហើយខ្ញុំបានចាប់ផ្តើម​ស្នេហា​មួយនេះ” ។

អ្នកស្រីបាននិយាយថា “ស្នេហា W” (អក្សរ W បញ្ចេញសំឡេងស្រដៀង “double” ក្នុងភាសាជប៉ុន) ព្រោះអតីតស្វាមីរបស់​អ្នក​ស្រី​ក៏​បាន​រៀបការជាថ្មីដែរ។

ទំនាក់ទំនងស្នេហាលួចលាក់បានប៉ុន្មានខែក៏បញ្ចប់ នៅពេលដែលលោក Satoshi បារម្ភខ្លាចប្រពន្ធដឹង និងពិធីមង្គល​​ការ​របស់​កូន​ស្រីជិតមកដល់។

អ្នកស្រី Hiroko បាននិយាយថា “គាត់ដាច់ចិត្តច្រានខ្ញុំចេញ រំលឹកថាខ្ញុំមានប្តីហើយ ចំណែកអ្វីដែលបានកើតឡើងគ្រាន់តែជាកំហុសក្នុងជីវិតរបស់ពួកយើងប៉ុណ្ណោះ” ។

ថ្វីត្បិតតែឈឺចាប់ យ៉ាងណា អ្នកស្រី Hiroko នៅតែគិតថាជីវិតរបស់ខ្លួននឹងត្រឡប់មកធម្មតាវិញពេលគ្រប់យ៉ាងបញ្ចប់ ទោះ​បី​ជា​អ្នក​ស្រី​យល់​ថា​​បរិយាកាស​​ក្នុង​ផ្ទះ​មានការផ្លាស់ប្តូរក៏ដោយ។

“ខ្ញុំគួរតែគិតដល់រឿងនោះ នៅពេលដែលប្តីរបស់ខ្ញុំនិយាយថា គាត់មានរឿងគួរអោយភ្ញាក់​ផ្អើល​ចង់​ប្រកាស​ក្នុង​ថ្ងៃមង្គល​ការ។ ទាំងទំនាក់ទំនងរបស់គាត់ និងកូនស្រីរបស់ខ្ញុំមិនសូវល្អផងនោះ។ ប៉ុន្តែមិននឹកស្មានថា គាត់បែរជាធ្វើបែបនេះ​ក្នុង​ថ្ងៃ​មង្គល​ការ​របស់​កូន​ស្រី​ខ្ញុំ” ។

ចាប់តាំងពីពេលនោះមក អ្នកស្រី Hiroko បាត់បង់គ្រប់យ៉ាងព្រោះតែអំពើផិតក្បត់របស់ខ្លួន។

អ្នកស្រី Hiroko បានអោយដឹងថា “កូនស្រីឈប់រាប់រកខ្ញុំ ខ្ញុំត្រូវប្តីបណ្តេញចេញពីផ្ទះ និងត្រូ​វបង់ប្រាក់ឧបត្ថម្ភក្រោយ​​ពេល​​លែង​​លះ។ ខ្ញុំ​ត្រូវ​ស្នាក់នៅ​ផ្ទះ​សំណាក់ ហើយ​ពិត​ជា​ពិបាក​រកការងារធ្វើនាពេលនេះ” ។

ប្រភព៖ Skydoor