សិក្ខាកាម​ដែលធ្លាប់ត្រូវតុលាការកាត់ទោស​ដោយ​សារ​បោះ​បង់​ចោល​សាក​សព​កូន​ទទួល​បាន​សេចក្តី​សម្រេច​គ្មាន​ទោស

ម្សិលមិញ នៅថ្ងៃទី ២៤ ខែមីនា តុលាការ​កំពូល​ជប៉ុនបាន​បដិសេធ​សាលក្រម​កាត់​ទោស​លើក​ទី​ ២ មុននោះ និងប្រកាស​គ្មាន​ទោស​ចំពោះ​សិក្ខាកាម​ឈ្មោះ Le Thi Thuy Linh អាយុ ២៤ ឆ្នាំ។

កាលពីខែវិច្ឆិកា ឆ្នាំ ២០២០ សិក្ខាកាម Linh បានសម្រាលកូនមិនគ្រប់ខែនៅអន្តេវាសិកដ្ឋានរបស់ក្រុមហ៊ុននៅ Ashikita ខេត្ត Kumamoto ។ ជាអកុសល កូនភ្លោះប្រុសទាំងពីរនាក់បានស្លាប់ក្នុងផ្ទៃម្តាយ។ ក្រោយមក នាងយកប្រអប់​​ក្រដាស​កាតុង​​ដាក់​​សាក​​សព​​ទារក​ប្រុស​ទាំង​ពីរ​យកទៅមន្ទីរពេទ្យ ហើយរាយការណ៍ប្រាប់គ្រូពេទ្យ។

សិក្ខាកាម Linh ត្រូវប៉ូលិសចោទប្រកាន់ ព្រោះពួកគេគិតថា នាងបោះបង់ចោលសាកសពកូនរបស់ខ្លួន។ ក្នុងតុលា​ការ​ដំបូង​នៅ Kumamoto កាល​ពី​ខែ​កក្កដា ឆ្នាំ ២០២១ តុលាការបានកាត់ទោសនាងឱ្យជាប់ពន្ធនាគារ ៨ ខែ និង​ព្យួរ​ទោស​​រយៈ​​ពេល ៣ ឆ្នាំ​សម្រាប់​ការចោទប្រកាន់ Linh បាន​បោះ​បង់​ចោល​សាក​សព​ទារក។

ចំណុចដែលបង្កចម្រូង​ចម្រាស់អំឡុងពេលកាត់ក្តីគឺថា តើការដាក់សាកសពកូនក្នុងប្រអប់ក្រដាសកាតុង បន្ទាប់​មក​បិទ​ស្កុត​ជា​ទង្វើ “បោះបង់ចោល” ដែរ​​ឬ​ទេ? Linh បាន​​បដិសេធ និង​អះអាង​ថា​ខ្លួនគ្មាន​កំហុស ដោយ​សារ​គោល​​បំណង​ដំបូងរបស់នាង​ចង់​​បញ្ចុះ​​សព​​កូន។

ក្នុង​តុលា​ការ​ឧទ្ធរណ៍​នៅ Fukuoka កាលពីខែមករា ឆ្នាំ ២០២២ កម្រិតទោសរបស់ Linh ត្រូវ​បាន​កាត់​បន្ថយ​មកជាប់ពន្ធនាគារ ៣ ខែ និង​ព្យួរ​ទោស ២ ឆ្នាំ។ តុលាការ Fukuoka បានអោយដឹង “ថ្វីត្បិតតែពេលទារកស្លាប់ក្នុងផ្ទៃរហូតដល់រកឃើញសាកសពត្រឹម​ ១ ថ្ងៃ ៩ ម៉ោង ប៉ុន្តែទង្វើបង្កការលំបាកមិនអោយអ្នកដទៃរកឃើញសាកសពជាទង្វើ​បោះ​បង់​ចោល” ។

សិក្ខាកាម Linh បន្តដាក់ពាក្យបណ្តឹងទៅកាន់តុលាការកំពូលជប៉ុន។ កាល​ពី​ខែ​មុន តុលាការកំពូលបានធ្វើការពិ​ភាក្សា (នីតិវិធី​ចាំបាច់សម្រាប់ការផ្លាស់​ប្តូរ​សេចក្តី​សម្រេច) ហើយ Linh បាននិយាយថា “សិក្ខាកាមបច្ចេកទេសកំពុង​​តែ​​រង​​ទុក្ខ ព្រោះ​ពួក​គេ​មិន​អាច​ប្រាប់​នរណា​ពេល​ខ្លួន​មាន​ផ្ទៃពោះ ហើយបង្ខំចិត្តសម្រាលកូនម្នាក់ឯង។ ខ្ញុំ​សង្ឃឹម​​ថា ​សាល​ក្រម​គ្មានទោសនឹងផ្តល់ជូនស្រ្តីទាំងអស់​ដែល​គ្មាន​ជម្រើស​ត្រូវធ្វើបែបនេះ” ។

នៅក្នុងសេចក្តីសម្រេចចុងក្រោយ តុលាការកំពូលបានអោយដឹងថា “ទោះបីជាចុងចោទបង្កការលំបាកដល់អ្នកដទៃមិនអាចរកឃើញសាកសព ប៉ុន្តែ​បើ​ផ្តោត​លើ​ទី​តាំង របៀប​រុំ និង​ការ​ដាក់​សាកសព មិនអាចចោទប្រកាន់ទោស​បោះ​បង់​ចោល​សាក​សព​​នោះ​​ទេ” ។

ចំពោះករណីរបស់ Linh អំឡុងពេលធ្វើការក្នុងនាមជាសិក្ខាកាម នាងធ្លាប់ត្រូវព្រមានមិនឱ្យមានផ្ទៃពោះ ទោះ​បីជា​ច្បាប់​ស្តង់​ដារ​ការ​ងារ​ហាមឃាត់មានភាពអយុត្តិធម៌ចំពោះសិក្ខាកាមក៏ដោយ។ ដូច្នេះហើយ ទើបនាងមានការភ័យខ្លាចថា ប្រសិនបើរឿងខ្លួនមានផ្ទៃពោះ និងសម្រាលកូនត្រូវគេប្រទះឃើញ នាងត្រូវ​បង្ខំ​ឱ្យ​ត្រឡប់​ទៅប្រទេស​វិញ ហើយគ្មានប្រាក់សងបំណុលអោយគ្រួសារ។ រឿងនេះត្រូវមនុស្សជាច្រើនរិះគន់ចាត់ទុកដូចជា “របបទាសករ​សម័យ​ទំនើប” ក្នុង​ប្រទេស​ជប៉ុន។

ប្រភព៖ Yahoo News

JAPO