តុលាការជាន់ខ្ពស់ Tokyo តម្កល់ទោសជាប់ពន្ធនាគារ ២០ ឆ្នាំចំពោះបុរសដែលបានតាមដាន និងសម្លាប់និស្សិតស្រី

ថ្ងៃព្រហស្បតិ៍ 23/03/2023 | 10:58 ព្រឹក

កាលពី ៣ ឆ្នាំមុន អតីតនិស្សិតសាកលវិទ្យាល័យឈ្មោះ Hori Ai អាយុ ២២ ឆ្នាំ បានចាក់សម្លាប់មិត្តរួមសាលាឈ្មោះ Yamada Miku (កាលនោះអាយុ ១៩ ឆ្នាំ) ដោយកាំបិតផ្ទះបាយ។ ជននេះត្រូវចោទប្រកាន់ពីបទមនុស្សឃាត និងរំលោភសិទ្ធិសេរីភាពបុគ្គលដោយសារតែងតែតាមដាន ឃ្លាំមើល និងផ្ញើសារទៅកាន់ជនរងគ្រោះតាមរយៈកម្មវិធី Line ។

ក្នុងសវនាការជំនុំជំរះដំបូង ឃាតករត្រូវបានតុលាការ Shizuoka កាត់ទោសឱ្យជាប់គុក ២០ ឆ្នាំ។ ទោះជាយ៉ាងណា ស្ថាប័នអយ្យការបានប្តឹងឧទ្ធរណ៍ ដោយសារយល់ថាតុលាការមិនយល់ពីទំនាក់ទំនងរវាងជនជាប់ចោទ និងជនរងគ្រោះ ក៏ដូចជាភាពព្រៃផ្សៃនៃអំពើឃាតកម្ម។

ចំពោះការកាត់ក្តីលើកទី ២ ដែលប្រព្រឹត្តទៅកាលពីថ្ងៃទី ១៥ ខែមីនាកន្លងមក តុលាការជាន់ខ្ពស់ Tokyo ក៏បានច្រានចោលសំណើរបស់អយ្យការសម្រាប់ការកាត់ទោសជាប់ពន្ធនាគារអស់មួយជីវិត ហើយប្រកាសថា៖ “នេះមិនមែនជាឧក្រិដ្ឋកម្មដែលធ្ងន់ធ្ងរបំផុតក្នុងចំណោមទោសតាមដាន និងឃាតកម្មនោះទេ ដូច្នេះមិនអាចនិយាយបានថា សាលក្រមរបស់តុលាការដំបូងស្រាលឡើយ” ។

ក្នុងសេចក្តីសម្រេចរបស់តុលាការលើកនេះ ប្រធានចៅក្រម Akira Ando បាននិយាយថា៖ “ព្រះរាជអាជ្ញានិយាយត្រូវដែលថាទំនាក់ទំនងរវាងអ្នកទាំងពីរស្រពិចស្រពិល ប៉ុន្តែតុលាការដំបូងក៏មិនបានខុសចំពោះការវាយតម្លៃស្ថានភាពជុំវិញករណីនេះដែរ។ ដូច្នេះកម្រិតទោសចុងក្រោយរបស់ជនជាប់ចោទ Hori Ai នៅដដែលគឺជាប់ពន្ធនាគារ ២០ ឆ្នាំ” ។

ប្រភព៖ NHK

JAPO