ទឹកភ្នែក និងភាពសោកស្តាយរបស់ប្អូនប្រុសដែលមាន​ជំងឺ​អូទីស្សឹម​​​សម្លាប់​​បង​​ប្រុស​មាន​ជំងឺ​វិកល​ចរិក

កាលពីខែវិច្ឆិកា ឆ្នាំ ២០២០ ចុងចោទ Takabatake Haruki អាយុ ២២ ឆ្នាំ បាន​សម្លាប់​បង​ប្រុស​ឈ្មោះ Joji អាយុ ២៥ ឆ្នាំ ដោយ​ប្រើ​ញញួរ​ក្នុង​ផ្ទះរបស់ពួកគេនៅទីក្រុង Toyama ។ បុរសជាបងពេលនោះមានជំងឺវិកលចរិក និងជំងឺអូទីសឹម (ASD) ។ បងប្រុស​ពេលខ្លះ​​ប្រើ​ហិង្សា​ដោយ​មិនអាច​គ្រប់គ្រង​ខ្លួនបាន និងធ្លាប់ត្រូវបញ្ជូនទៅមន្ទីរ​ពេទ្យ​ជា​​ច្រើន​​​ដង​។

តាំងពីកុមារភាពមក ទំនាក់ទំនងរវាងបងប្រុស និង​ចុង​ចោទ​តែង​តែ​កើតមាន​ជម្លោះ។ ក្នុងចិត្តរបស់ Haruki តែង​​តែ​​គិត​​ថា​៖ “បងប្រុស Joji មានជំងឺផ្លូវចិត្ត ចំណែកខ្លួនមានសុខភាពល្អធម្មតា” ។ ប៉ុន្តែក្រោយពេលឃាតកម្ម​កើត​ឡើង Haruki ក៏ត្រូវបានគេធ្វើរោគវិនិច្ឆ័យថាមានជំងឺអូទីសឹម (ASD) ដែរ។ Haruki និយាយថា ខ្លួន​ត្រូវ​គេ​ធ្វើ​បាប​នៅសាលាតាំងពីរៀនបឋមសិក្សាររហូតដល់វិទ្យាល័យ។

Haruki ឆ្លើយតបក្នុងសវនាការថា៖ “ដោយ​សារ​បង​ប្រុស​របស់​ខ្ញុំ​មាន​ជំងឺ​ផ្លូវ​ចិត្ត ដូច្នេះបានជាអ្នករាល់គ្នាមិនចូលចិត្តខ្ញុំ ហើយសូម្បីតែមនុស្សស្រីក៏មិនចាប់អារម្មណ៍នឹងខ្ញុំដែរ។ ខ្ញុំជាជំនាន់ Gen Z ប៉ុន្តែអ្នកជំនាន់ Gen Z ទាំងអស់សុទ្ធ​តែ​សើច​ចំអក និងចាត់ទុកខ្ញុំដូចជារបស់លេងសើច។ ខ្ញុំ​ពិត​ជា​មាន​អារម្មណ៍អាម៉ាស់​ខ្លាំងណាស់” ។

មានចំណុចមួយដែលបង្កម្រូងចម្រាសក្នុងការកាត់ក្តី តើ ASD អាចនឹងប៉ះពាល់ដល់ការប្រព្រឹត្តបទល្មើសរបស់ចុង​ចោទ Haruki ដែរ​ទេ?

Haruki និយាយនៅចំពោះមុខតុលាការថា ខ្លួនត្រូវបានបំផុសគំនិតដោយករណីសម្លាប់អ្នកស្រុកចំនួន ១៩ នាក់ក្នុងមណ្ឌលសម្រាប់ជនពិការនៅ Sagamihara ខេត្ត Kanagawa កាលពីឆ្នាំ ២០១៦ ។ ជននេះបានចាប់ផ្តើមគិត​ថា៖ “ជន​​ពិការ​​គួរ​​តែ​​ស្លាប់​” ។

ក្នុងសវនាការកាលពីថ្ងៃទី ១៩ ព្រះរាជអាជ្ញាបានអោយដឹងថា៖ “ចុងចោទតែងតែមើលងាយជនពិការរហូតមក បន្ទាប់​ពី​សម្លាប់​មនុស្ស និង​ចាត់​ចែង​សាក​សពដោយយកទៅកប់នៅលើភ្នំ។ ទង្វើទាំងនេះសុទ្ធតែមានការគ្រោងទុកមុន ដូច្នេះ​នេះ​ជា​អំពើ​ឃាតកម្ម​ដោយ​ចេតនា។ ទង្វើនេះគឺមានចេតនាប្រព្រឹត្តបទល្មើស និងមិនរងផលប៉ះពាល់ដោយសារ ASD ឡើយ ដូច្នេះហើយស្នើសុំតុលាការ​ផ្ដន្ទាទោសជន​ជាប់​ចោទ​ឱ្យជាប់ពន្ធនាគារ ១៥ ឆ្នាំ” ។

ផ្ទុយទៅវិញ មេធាវីការពារក្តីបាននិយាយថា៖ “ទង្វើរបស់ចុងចោទហាក់ដូចជាមានគម្រោងទុកមុន ប៉ុន្តែវាពិតជាបណ្តាលមកពីជំងឺ ASD ដែលធ្វើអោយអ្នកជំងឺមិនអាចកែប្រែ ឬបញ្ឈប់គម្រោងបាន។ ដូច្នេះហើយ កម្រិត​នៃ​ការ​កាត់​ទោស​ជន​ជាប់​ចោទគួរតែកាត់បន្ថយ។ ដោយ​សង្ឃឹម​ថា​អ្នក​ជំងឺ​អាច​ជា​សះស្បើយ​ដូច​មនុស្ស​ធម្មតា ការពិន័យ​ដាក់​គុក​រយៈ​ពេល​យូរ​មិន​ចាំ​បាច់​ឡើយ។ ខ្ញុំ​​គិត​​ថា ជាប់​ពន្ធនាគារ ៨ ឆ្នាំគឺ​ជា​ទោស​ដែល​សមរម្យ​សម្រាប់​ជន​ជាប់​ចោទ​” ។

នៅពេលដែលត្រូវបានចៅក្រមសួរ តើអ្នកមានពាក្យចុងក្រោយអ្វីត្រូវនិយាយដែរទេ? Haruki បាននិយាយ​យឺតៗ​ថា៖ “ប្រហែលជាបងប្រុសរបស់ខ្ញុំក៏ដឹងដែរថាខ្លួនមានជំងឺ ដូច្នេះបានជាគាត់ខំប្រឹងឱ្យ​ឆាប់​ជា​សះស្បើយ” ។ ក្រោយ​មក​គាត់​​អោន​​ក្បាល​​និយាយ​ទាំង​ក្តុក​ក្តួល​ថា៖ “តើត្រូវធ្វើយ៉ាងណា? នៅពេលនោះ ខ្ញុំគួរតែធ្វើអ្វីម្យ៉ាងកុំឱ្យ​មាន​រឿង​នេះ​កើត​​ឡើង?”

គ្រប់គ្នាកំពុងរង់ចាំសាលក្រមចុងក្រោយរបស់ Haruki ដែលគ្រោងនឹងចេញនៅថ្ងៃទី ៣១ ខែមីនា។

hinhin