មនុស្សជាច្រើន​ឆ្លង​ប៉ារ៉ាស៊ីត​ដោយសារបរិភោគត្រីមួយប្រភេទនេះ

នៅខេត្ត Aomori បានប្រកាសមានមនុស្ស ១៣០ នាក់ឆ្លងពពួក Gnathostoma spinigerum ព្រោះតែបរិភោគ​ត្រីដំរីស​​ដែល​​មិន​​ទាន់​ចម្អិន​អោយ​បាន​ត្រឹម​ត្រូវ។ ប្រភេទ​ប៉ារ៉ាស៊ីត​​នេះ​​ច្រើន​​តែ​នៅ​​ក្រោម​​ស្បែក ដែល​បណ្តាល​ឱ្យ​រមាស់ និង​ហើម។

ក្នុងករណីមួយចំនួន អ្នកជំងឺអាចនឹងខ្វាក់ ឬស្លាប់ដោយសារកូនញាស់ចូលភ្នែក ថ្លើម ខួរក្បាល និង​ខួរ​ឆ្អឹងខ្នង។

សាស្ត្រាចារ្យរងផ្នែកពេទ្យសត្វនៃសាកលវិទ្យាល័យ Kitasato លោក Kadei Hiromi បាននិយាយថា៖ “នៅពេលដែល Gnathostoma spinigerum ចូល​ក្នុង​ខ្លួន​មនុស្ស វា​នឹង​ធ្វើ​ចលនា​តាម​ក្រពះពោះវៀន និងនៅគ្រប់កន្លែងក្នុងរាងកាយ។ បន្ទាប់មកវាទៅដល់ស្រទាប់ស្បែកក្រោមគេបង្អស់ក្នុងទម្រង់ជាកូនញាស់ និងបណ្តាលឱ្យមានរោគសញ្ញាដូចជារមាស់ និង​ហើម​លើ​ស្បែក” ។

ដើម្បីពន្យល់ពីមូលហេតុដែល Gnathostoma spinigerum ត្រូវបានរកឃើញក្នុងត្រីដំរីស សាស្ត្រាចារ្យ​រង Kadei បាននិយាយថា ដោយសារភ្លៀងធ្លាក់ច្រើនក្នុងឆ្នាំនេះ ដូច្នេះប្រហែលជាពងរបស់ពពួកប៉ារ៉ាស៊ីតរសាត់ទៅកន្លែងដែលត្រីដំរីស​រស់​នៅ។

អ្នក​ដែល​ឆ្លង​ប៉ារ៉ាស៊ីតនឹងឈឺក្រោយពេលបរិភោគ​បាន ២ សប្តាហ៍ ដូច្នេះហើយអាជ្ញាធរខេត្ត Aomori បានអំពាវ​នាវ​ដល់​ប្រជា​ពល​​រដ្ឋ​​ដែល​បរិភោគត្រីដំរីសមិនទាន់់ចម្អិន ប្រសិនបើរាងកាយមានរោគសញ្ញាចម្លែក សូមប្រញាប់ទៅ​កាន់មណ្ឌលសុខ​ភាព​ដើម្បី​ពិនិត្យ​អោយ​បាន​ទាន់​ពេល​វេលា។

hinhin