ពិធីបុណ្យ Hina Matsuri ប្រារព្ធឡើងសម្រាប់កុមារីនៅជប៉ុន

Hina Matsuri ជាពិធីបុណ្យសម្រាប់កុមារីនៅជប៉ុន ក្រុមគ្រួសារនីមួយតុបតែងតុក្កតាប្រពៃណីដើម្បីអបអរសាទរ។ ពិធីបុណ្យតុក្កតា Hina ត្រូវបានប្រារព្ធធ្វើឡើងទូទាំងប្រទេស ដែលប្រព្រឹត្តទៅនៅថ្ងៃទី ៣ ខែមីនា ជា​រៀង​រាល់ឆ្នាំ។

រូបភាព៖ T&T

ពិធីបុណ្យនេះបានក្លាយជាលក្ខណៈវប្បធម៌របស់ប្រជាជនជប៉ុន ជាថ្ងៃដែលសមាជិកគ្រួសារបួងសួងសុំសេចក្តីសុខ សំណាងល្អ និងសុខភាពសម្រាប់កុមារី ក៏ដូចជា​ជូនពរ​ឱ្យ​មាន​សុភមង្គលក្នុងអាពាហ៍ពិពាហ៍ និងគ្រួសាររុងរឿងសម្រាប់​កូន​ស្រី​របស់​ពួក​គេ។

Hina ជាប្រភេទតុក្កតាដែលប្រើក្នុងពិធីបុណ្យតុក្កតាប្រចាំឆ្នាំ។ សព្វថ្ងៃនេះ តុក្កតា Hina ផលិតចេញពីវត្ថុធាតុដើម​ខុសៗ​គ្នា។ ទោះ​ជា​យ៉ាង​ណា តុក្កតា Hina ពីដើមធ្វើពីឈើ ឬក្រណាត់ញាត់ចំបើងជាមួយនឹងសំលៀកបំពាក់ច្រើន​​ស្រទាប់​ក្បូរ​ក្បាច់។ ជាទូទៅ តុក្កតា Hina យ៉ាងហោចណាស់មានចំនួន ១៥ តុក្កតា ដែលតំណាងឱ្យតួអង្គចម្រុះ ក្នុង​នោះ​មាន​តុក្កតា​បុរស និង​ស្រ្តីយ៉ាងហោចណាស់មួយគូតំណាងឱ្យស្តេច និងមហេសី។

រូបភាព៖ T&T

កាលពីថ្ងៃអាទិត្យ មនុស្សប្រមាណ ៦០ នាក់ស្លៀកសម្លៀកបំពាក់តុក្កតា Hina ចម្រុះពណ៌ចូលរួមដង្ហែទូកនៅទីក្រុង Katori ខេត្ត Chiba ភាគខាងកើតតូក្យូ។

ក្នុងចំណោមអ្នកចូលរួមជិះទូកចំនួន ៥ ដែលធ្វើដំណើរតាម​ដង​ទន្លេ Onogawa កាត់​ទីប្រជុំជនខណ្ឌ Sawara ទី​ក្រុង Katori ជា​កន្លែងដែលថែរក្សាផ្ទះចាស់តាំងពីសម័យ Edo ចន្លោះសតវត្សទី ១៧ ដល់ ១៩ ។

អ្នកមើលឈរតាមបណ្តោយមាត់ទន្លេទស្សនាក្បួនដង្ហែ និងតន្រ្តីរាជវង្ស ដែល​សម្តែង​ដោយ​តន្ត្រីករក្នុងស្រុក។

ចូលរួមពិធីបុណ្យជាមួយឪពុកម្តាយ កុមារីម្នាក់បាននិយាយថា ប្អូនចូលចិត្តចូលតួជាតុក្កតាព្រះនាង។

ប្រភព៖ NHK