ជឿសម្តីមិត្តភក្តិពេក ស្រ្តីជាម្តាយបង្អត់​អាហារ​កូនប្រុស​រហូត​ដល់​ស្លាប់

កាលពីថ្ងៃទី ៩ ខែមីនា ក្នុងសេចក្តីសម្រេចបដិសេធបណ្តឹងឧទ្ធរណ៍របស់ចុងចោទ Emiko Akahori អាយុ ៥០ ឆ្នាំ តុលាការជាន់ខ្ពស់ Fukuoka ខេត្ត Fukuoka ប្រទេសជប៉ុនបានយល់ស្របនឹងសេចក្តីសម្រេចរបស់តុលាការថ្នាក់ក្រោម​ដោយ​លើក​ឡើង​ថា ចុងចោទបានអូសទាញ និងគ្រប់គ្រងផ្លូវចិត្តមិត្តរបស់ខ្លួនឈ្មោះ Rie Ikari អាយុ ៤១ ឆ្នាំ។ បន្ទាប់​មក​អ្នក​ទាំង​ពីរ​បាន​ឃុប​ឃិតគ្នា ដើម្បីកាត់បន្ថយរបបអាហារភាគច្រើនរបស់កុមារា Shojiro ដែលជាកូន​ប្រុស​របស់ Ikari ប្រហែល​ចាប់ពីខែសីហា ឆ្នាំ ២០១៩ ។

រហូតដល់ចុងខែមីនា ឆ្នាំ ២០២០ កុមារា Shojiro រងកង្វះអាហារូបត្ថម្ភធ្ងន់ធ្ងរ។ ដោយសារត្រូវទុកអោយអត់ឃ្លានជា​ច្រើន​ថ្ងៃ ដូច្នេះ​បាន​បណ្តាល​អោយ​ក្មេងប្រុសស្លាប់នៅថ្ងៃទី ១៨ ខែមេសាឆ្នាំដដែល។

Rie Ikari ស្រ្តីជាម្តាយដែលទុកអោយកូនអត់ឃ្លានរហូតដល់ស្លាប់តាមការញុះញុងរបស់មិត្តភក្តិ។ រូបភាព៖ Kyodo News

យោងតាមសារព័ត៌មាន Kyodo News ក្រុមមេធាវីការពារជនជាប់ចោទ Akahori ធ្លាប់អះអាងថា កូនក្តីគ្មានកំហុស ហើយ​បាន​និយាយ​ថា ការកាត់ទោសដាក់ពន្ធនាគារ ១៥ ឆ្នាំធ្ងន់ធ្ងរ និងអយុត្តិធម៌ពេកហើយ បើធៀបនឹង Ikari ដែល​ត្រូវ​បាន​កាត់​ទោស​ឱ្យ​ជាប់​ពន្ធនាគារ ៥ ពីបទធ្វេសប្រហែសក្នុងនាមជាអាណាព្យាបាល

មុននោះ ក្នុងសវនាការដែលធ្វើឡើងនៅតុលាការខណ្ឌ Fukuoka កាលពីខែកញ្ញា ឆ្នាំ ២០២២ ប្រធានចៅក្រម Atsushi Tomita បានកំណត់ថា ស្រ្តីឈ្មោះ Ikari អាចចាត់ទុកជាជនរងគ្រោះរបស់ Akahori ដូច្នេះទើបត្រូវកាត់ទោស​​ជាប់​​​ពន្ធនា​គារ ៥ ឆ្នាំ ទាបជាងបើធៀបនឹងការកំណត់ទោស ១០ ឆ្នាំតាមសំណើរបស់ព្រះរាជអាជ្ញា។

ទន្ទឹមនឹងនេះ ជនជាប់ចោទ Akahori ត្រូវគេបញ្ជាក់ថាជាមនុស្ស “លោភលន់ប្រាក់” ព្រោះតែងតែបោកបញ្ឆោត Ikari អោយប្រគល់ប្រាក់។ ក្រៅពីនេះ ថ្វីត្បិត​តែ​មាន​បំណង​អាក្រក់​ចំពោះ Ikari និងក្រុមគ្រួសាររបស់នាងដោយកុហក ប៉ុន្តែនៅចំពោះមុខតុលាការ Akahori តែងតែបដិសេធកំហុស។

បើតាមការដឹង ស្រ្តីទាំងពីរស្គាល់គ្នាតាំងពីឆ្នាំ ២០១៦ តាមរយៈកូន។ ជនជាប់ចោទ Akahori ធ្លាប់និយាយកុហកជាច្រើន​ដងធ្វើឱ្យស្រ្តីឈ្មោះ Ikari ផ្តាច់ទំនាក់ទំនងជាមួយមនុស្សនៅជុំវិញ។ មិនត្រឹម​តែប៉ុណ្ណឹង Akahori ថែមទាំង​ប្រឌិត​រឿង​​ស្វាមី​​របស់​ Ikari ផិតក្បត់ផងដែរ។ នៅទីបំផុត Ikari បាន​លែង​លះ​ប្តី។

ក្រៅពីនេះ ចុងចោទ Akahori ថែមទាំងត្រូវចោទប្រកាន់ពីបទយក​ប្រាក់​សរុប​ប្រហែល ១,៩៨ លាន​យ៉េន (១៤.០០០ ដុល្លារ) របស់ Ikari ដោយ​និយាយ​កុហក​ជួយ​នាង​ស៊ើប​អង្កេត​ករណី​ប្តី​ផិតក្បត់។

ប្រភព៖ Kyodo News

មើលព័ត៏មានដែលទាក់ទង ដ៏គួរអោយចាប់អារម្មណ៏បន្ថែមទៀត។
មើលបន្ថែម: