ថ្មីទៀតហើយ ត្រាំជ្រោះទឹកក្តៅ និងសូណាពេលកំពុងមើលការប្រកួតកីឡាបេស្បល

ថ្ងៃសុក្រ 10/03/2023 | 11:21 ព្រឹក

កាលពីថ្ងៃទី ៧ ខែមីនា កីឡដ្ឋាន ES CON Field Hokkaido បានបើកទ្វារអនុញ្ញាតអោយប្រព័ន្ធផ្សព្វផ្សាយចូលមើលកន្លែងដែលទើបសាងសង់ថ្មីរបស់ពួកគេ។ ចំណុចដែលគួរកត់សម្គាល់បំផុតគឺប្រព័ន្ធត្រាំជ្រោះទឹកក្តៅ និងសូណាក្នុងកីឡដ្ឋានផ្ទាល់។

នេះជាបន្ទប់ងូតជ្រោះទឹកក្តៅ និងសូណាដំបូងគេលើពិភពលោក អាចមើលការប្រកួតកីឡាបេស្បលពីជាន់ទី ៣ នៃកីឡដ្ឋាន។ ទឹកក្តៅដែលត្រូវបានបូមឡើងពីជម្រៅ ១៣០០ ម៉ែត្រក្រោមដីជួយឱ្យស្បែករបស់អ្នកទន់រលោង។

ទាំងបន្ទប់ងូតជ្រោះទឹកក្តៅ និងសូណាសុទ្ធតែអាចមើលឃើញទិដ្ឋភាពកីឡដ្ឋានទាំងមូលដូចជាផ្ទាំងអេក្រង់ LED ដ៏ធំ។

ក្នុងបន្ទប់សូណាត្រូវបានរចនាឡើងដូចជាដំបងបេស្បល ដើម្បីអោយអ្នករាល់គ្នាអាចឈរមើល និងគាំទ្រក្រុមដែលពួកគេចូលចិត្ត។ ប្រហែលជាអ្នកធ្លាប់មើលការប្រកួតកីឡាបេស្បលតាមទូរទស្សន៍ក្នុងបន្ទប់សូណា យ៉ាងណាអ្នកប្រាកដជាមិនធ្លាប់មើលការប្រកួតកីឡាបេស្បលដោយផ្ទាល់ក្នុងបន្ទប់សូណាឡើយ។

សរុបមានចំនួន ២៤ កៅអីដែលគេដាក់លក់សម្រាប់ថ្ងៃប្រារព្ធការប្រកួត។ សំបុត្រចូលងូតទឹកក្តៅក្នុងតម្លៃ ៥០០០ យ៉េន ចំណែកសំបុត្រអង្គុយក្នុងបន្ទប់ក្នុងតម្លៃ ៨០០០ យ៉េន។

តម្លៃសំបុត្រចូលងូតនៅថ្ងៃដែលមិនមានការប្រកួតក្នុងតម្លៃ ២៥០០ យ៉េន ហើយអ្នកអាចអង្គុយនៅកន្លែងទំនេរតាមចិត្តដោយមិនគិតថ្លៃ។

ក្រៅពីនេះ មានកន្លែងគួរឱ្យចាប់អារម្មណ៍ជាច្រើនទៀតក្នុងកីឡដ្ឋាន។ ត្រង់ថាអ្នកអាចទទួលទានមុខម្ហូបជប៉ុន កូរ៉េ និងចិននៅលើបន្ទប់ទទួលភ្ញៀវជាន់ទី ២ ដែលមានហាងអាហារ Hokkaido ល្បីៗទាំង ១០ ហាង។

នៅជាន់ទី ១ ជាភោជនីយដ្ឋានដែលគ្រប់គ្រងដោយ Nippon Ham ដែលមានម៉ឺនុយមុខម្ហូបជាច្រើនភ្ជាប់ជាមួយនឹងរូបភាពរបស់គ្រូបង្វឹកក្រុម។ ទោះជាយ៉ាងណា ផលិតផលទាំងអស់ដែលមានលក់ក្នុងកីឡដ្ឋានមិនអាចទូទាត់ជាសាច់ប្រាក់បានទេ។ ដូច្នេះមុននឹងមកដល់ទីនេះ ចូរកត់សម្គាល់ចំណុចនេះ។

ប្រភព៖ TBS News

JAPO