សិស្សប្រុសចាក់គ្រូបង្រៀនជាច្រើនកាំបិត និងជាអ្នកបំបែកសាកសព​ឆ្មា​យក​ទៅ​ចោលគ្រប់កន្លែង

បើតាម Japan Times ជនសង្ស័យត្រូវចាប់ខ្លួនកាលពីថ្ងៃពុធ បន្ទាប់ពីកាន់កាំបិតសម្រុកចូលវិទ្យាល័យ Misasa ទីក្រុង Toda ខេត្ត Saitama ប្រទេស​ជប៉ុន។ នៅពេលនោះ សាលាកំពុងរៀបចំការប្រឡង។

គ្រូបង្រៀនអាយុ ៦០ ឆ្នាំ ដែលកំពុងត្រួតពិនិត្យការប្រឡងបានកត់សម្គាល់ឃើញសិស្សប្រុសម្នាក់ និងព្យាយាមបញ្ឈប់ជននេះ ប៉ុន្តែ​ភ្លាមៗ​នោះ​ត្រូវ​សិស្ស​ប្រុស​ចាក់​ជា​ច្រើន​កាំបិត។ ក្រោយមកជនសង្ស័យត្រូវគ្រូ និងបុគ្គលិកសាលាឃាត់ខ្លួន។

រូបភាព៖ Japan Times

យោងតាមក្រុមប្រឹក្សាអប់រំក្រុង ជនរងគ្រោះនៅតែដឹងខ្លួនពេលបញ្ជូនទៅសង្គ្រោះបន្ទាន់ និងរបួសដែលមិនគ្រោះថ្នាក់​ដល់​ជីវិត ក្នុង​សាលា​មិនមានសិស្សរបួសឡើយ។

ប៉ូលិសបានប្រាប់ប្រព័ន្ធផ្សព្វផ្សាយជប៉ុនថា ជនសង្ស័យបានសារភាពទង្វើ ដោយនិយាយថា ខ្លួនចង់សម្លាប់មនុស្ស ហើយ​មិន​ខ្វល់​ថា​ជា​នរណា​នោះ​ទេ។

ចំណុចដែលគួរអោយកត់សម្គាល់ យុវជនរូបនេះក៏ធ្លាប់សារភាពថាបានសម្លាប់ឆ្មាបំបែកសាកសព ហើយ​បោះ​ចោល​​នៅ​​គ្រប់​​ទី​​កន្លែង។

មុននោះ យ៉ាងហោចណាស់មាន ៥ ករណីរកឃើញសាកសពឆ្មានៅទីធ្លា និងឧទ្យាទីក្រុង ខេត្ត Saitama ត្រូវបានរាយការណ៍កាលពីខែកុម្ភៈ។ ករណីដំបូងត្រូវបានរាយការណ៍នៅថ្ងៃទី ១៣ ខែកុម្ភៈ នៅពេលដែលជើងខាងមុខរបស់ឆ្មា​ពណ៌​ស​ត្រូវ​បាន​ប្រទះ​ឃើញ​នៅ​លើកៅអីថ្មក្នុងឧទ្យាន។

ប៉ុន្មានថ្ងៃជាបន្តបន្ទាប់ ក្បាល និងជើងរបស់ឆ្មាត្រូវបានគេរកឃើញតាមផ្លូវ។ ឆ្អឹងលលាដ៍ក្បាលឆ្មាមួយផ្នែកត្រូវគេប្រទះ​ឃើញ​ព្យួរ​នៅសាលាបឋម។

ដោយបាម្ភខ្លាច “ឃាតករឆ្មា” បង្កគ្រោះថ្នាក់ដល់កុមារ ប៉ូលិស ឪពុកម្តាយ និងសាលាបឋមសិក្សាបានពង្រឹងការដើរ​ល្បាត​តាម​កន្លែង​ប្រទះ​​ឃើញ​​​​សព​​ឆ្មា ជូន​ដំណើរ​កុមារត្រឡប់ទៅផ្ទះ ឬនាំកុមារដើរជាក្រុម។

នៅប្រទេសជប៉ុន អ្នកដែលត្រូវកាត់ទោសសម្លាប់ ឬធ្វើបាបសត្វត្រូវប្រឈមនឹងទោសជាប់ពន្ធនាគាររហូតដល់ទៅ ៥ ឆ្នាំ ឬពិន័យជាប្រាក់រហូតដល់ ៥ លានយ៉េន។

ធ្លាប់មានករណីស្រដៀងគ្នានេះកើតឡើងកាលពីមុន ក្នុងឆ្នាំ ១៩៩៧ ជនរងគ្រោះពីរនាក់ដែលមានអាយុ ១០ ឆ្នាំ និង ១១ ឆ្នាំ ត្រូវ​សម្លាប់​នៅ Kobe ដោយសិស្សប្រុសអាយុ ១៤ ឆ្នាំក៏ធ្លាប់សម្លាប់ឆ្មាផងដែរ។

ប្រភព៖ Skydoor