Komuro Kei ស្វាមីរបស់អតីតព្រះនាង Mako បាន​ក្លាយ​ជា​មេ​ធាវី​​នៅ​ញូវ​យ៉ក​ជា​ផ្លូវ​ការ

យោងទៅតាមប្រព័ន្ធតុលាការបង្រួបបង្រួមនៃរដ្ឋញូវយ៉ក ពាក្យស្នើសុំធ្វើជាមេធាវីរបស់លោក Komuro Kei ដែលជាស្វាមីរបស់អតីតព្រះនាង Mako ត្រូវបានអនុម័តកាលពីថ្ងៃចន្ទ។

លោក Komuro Kei បានខិតខំប្រឹងប្រែងប្រឡងជាប់នៅលើកទី ៣ កាលពីខែកក្កដាឆ្នាំមុន។ មុខតំណែងរបស់លោក Kei ក្នុង​ក្រុម​ហ៊ុន​ច្បាប់​ដែល​គាត់កំពុងធ្វើការត្រូវបានផ្លាស់ប្តូរពី “លេខាធិការច្បាប់” ទៅជា “សហការីផ្នែកច្បាប់” ។

លោក Komuro Kei អាយុ ៣១ ឆ្នាំ បានបញ្ចប់ការសិក្សានៅមហាវិទ្យាល័យច្បាប់ Fordham, New York ដោយទទួលបានសញ្ញាបត្របណ្ឌិតច្បាប់កាលពីខែឧសភា ឆ្នាំ ២០២១ ។ គាត់បានរៀបការជាមួយក្មួយស្រីរបស់អធិរាជ Naruhito កាល​ពី​ខែ​តុលា ឆ្នាំ ២០២១ ។ ទោះ​ជា​យ៉ាង​ណា អាពាហ៍ពិពាហ៍នេះមិនត្រូវបានសាធារណជនគាំទ្រនោះទេ ដោយសារជម្លោះ​ហិរញ្ញវត្ថុ​ដែល​ពាក់ព័ន្ធ​នឹង​ម្តាយ​របស់លោក Kei និងអតីត​ស្វាមី។

បើតាមច្បាប់រាជវង្សក្នុងឆ្នាំ ១៩៤៧ របស់ជប៉ុន ស្រ្តីក្នុងគ្រួសាររាជវង្សមិនអាចឡើងគ្រងរាជ្យបានឡើយ និងត្រូវចាក​ចេញ​ពី​គ្រួសារ​បើ​ចង់​រៀប​ការ​ជា​មួយ​ប្រជាជន​សាមញ្ញ។

ប្រភព៖ Kyodo News

JAPO