រឿងតំណាលនិយាយអំពី “ប្រាសាទលែងលះ” ក្នុងប្រទេសជប៉ុន

អំឡុងពេលជាង ៦០០ ឆ្នាំមកហើយ ដែលប្រាសាទ Matsugaoka Tōkei-ji នៅទីក្រុង Kamakura ខេត្ត Kanagawa ប្រទេសជប៉ុន ធ្លាប់ជាទីជ្រកកោនសម្រាប់ស្រ្តីដែលរងអំពើហិង្សារបស់ស្វាមី។

នៅសម័យនោះ ស្រ្តីជប៉ុនគ្មានសិទ្ធិលែងលះប្តីនោះទេ ដូច្នេះហើយ មធ្យោបាយតែមួយគត់​សម្រាប់ស្រ្តីដែលត្រូវប្តីប្រើអំពើ​ហិង្សា​គឺ​ទៅ​ជ្រក​កោន​នៅ​​​ប្រា​សាទ​​​ព្រះ​ពុទ្ធ​​​សាសនា​​​នេះ​។ ក្រោយពេលបម្រើក្នុងវត្តអារាមបានប៉ុន្មានឆ្នាំ ស្ត្រីដែលមក Tōkei-ji ត្រូវ​បាន​ជួយ​ឲ្យ​លែងលះប្តី។ ដូច្នេះអំឡុងពេលនោះ ប្រាសាទត្រូវបានគេហៅថា Enkiri-dera (ប្រាសាទ​កាត់​ផ្តាច់​ចំណង) Kakekomi-dera (ប្រាសាទជាទីជ្រកកោន) ឬ (ប្រាសាទ​លែង​លះ) ។

ច្រកទ្វារធំប្រាសាទ Tokeiji, Kamakura ។ រូបភាព៖ Toshihiro Gamo

ប្រាសាទ Matsugaoka Tōkei-ji ត្រូវបានកសាងឡើងក្នុងឆ្នាំ ១២៨៥ ដោយ Horiuchi ដែលជាភរិយារបស់ Hōjō Tokimune ជា​ប្រឹក្សា​ទី ៨ របស់ Bakufu Kamakura ។ Horiuchi កើតនៅឆ្នាំ ១២៥២ ក្នុងត្រកូល Adachi មាន​អំណាច និង​សម្ព័ន្ធ​មិត្តរបស់ Hōjō ។ បន្ទាប់ពីឪពុករបស់នាងបានស្លាប់ នៅពេលដែល Horiuchi មាន​អាយុ​ទើប​តែ ១ ឆ្នាំ នាងត្រូវបានបងប្រុសឈ្មោះ Adachi Yasumori ជាអ្នកស្នងតំណែង Yoshikage ក្នុងនាមជាអ្នក​នាំមុខត្រកូល​​ចិញ្ចឹម​​បី​បាច់។

អនាគតស្វាមីរបស់ Horiuchi ឈ្មោះ Tokimune កើតនៅឆ្នាំ ១២៥១ ហើយធំឡើងក្នុងវិមាន Adachi នៅ Kamakura ។ អ្នក​​ទាំង​​ពីរ​​ស្គាល់​​គ្នា​តាំង​ពី​ក្មេង Horiuchi បានរៀបការជាមួយ Tokimune តាំងពីអាយុ ៩ ឆ្នាំ។ ក្រោយ​​​ពេល​​រៀប​​ការ ពួកគេផ្លាស់ពី Adachi ទៅនៅផ្ទះរបស់ Tokimune ។ ជិត ៧ ឆ្នាំក្រោយមក Tokimune ក្លាយជា​អ្នក​ប្រឹក្សា​របស់ Shōgun ជាបុរសដែលខ្លាំងជាងគេក្នុងប្រទេស។

ទាំង Horiuchi និង Hōjō Tokimune សុទ្ធតែជាអ្នកខ្នះខ្នែងខាងសមាធិ Zen ។ នៅពេលនោះ Tokimune ស្រាប់​តែធ្លាក់ខ្លួនឈឺក្នុងឆ្នាំ ១២៨៤ គាត់ និងប្រពន្ធ Horiuchi កោរសក់ ស្លៀកស្បង់ចីពរ។ Tokimune យកឈ្មោះថា Hokoji-dono Doko ចំណែកភរិយាយកឈ្មោះ Kakusan Shidō ។ មិនយូរប៉ុន្មាន Tokimune បានទទួលមរណភាព ចំណែកប្រពន្ធ​របស់​លោក​បាន​ប្តេជ្ញាចិត្តកសាងប្រាសាទទីសក្ការៈបូជាដើម្បីជាកិត្តិយសសម្រាប់លោក។

សាលធំប្រាសាទ Tokeiji, Kamakura ។ រូបភាព៖ Toshihiro Gamo

ដំបូងឡើយ Horiuchi គ្មានបំណងធ្វើឲ្យ​ Tōkei-ji ក្លាយជាកន្លែងជ្រកកោនសម្រាប់ស្រ្តីដែលត្រូវប្តីធ្វើបាបឡើយ។ ទោះ​ជាយ៉ាងណា ក្នុងអំឡុងពេល ២ សតវត្សចុងក្រោយនៃសម័យ Tokugawa ប្រាសាទ Tōkei-ji បានក្លាយជាកន្លែង​​​ផ្តល់​​សេរី​​ភាពដល់​ស្រ្តី​ដែល​អភ័ព្វ។

យោងតាមកំណត់ត្រាប្រវត្តិសាស្ត្រ Horiuchi ថែមទាំងបានសុំឲ្យ​កូនប្រុសរបស់ខ្លួន Sadatoki អនុម័តច្បាប់ Tōkei-ji ដើម្បីជួយស្ត្រីដែលចង់​​លែង​​លះ​​ប្តី​​ផង​ដែរ។ Sadatoki ដាក់សំណើទៅកាន់ស្តេច ដែលជាអ្នកសម្រេចចុងក្រោយ។ ដំបូង អំឡុង​ពេល​បម្រើ​នៅប្រាសាទត្រូវបានកំណត់ ៣ ឆ្នាំ ប៉ុន្តែក្រោយមកកាត់បន្ថយមកត្រឹម ២ ឆ្នាំ។

ការលែងលះមាន ២០០០ ករណីត្រូវបានដោះស្រាយនៅ Tōkei-ji ក្នុងសម័យ Tokugawa ។ ទោះជាយ៉ាងណា ចាប់តាំង​​ពី​ឆ្នាំ ១៨៧៣ ករណីលែងលះទាំងអស់ត្រូវបានដោះស្រាយដោយតុលាការយុត្តិធម៌ជប៉ុន។

បន្ទាប់ពីពេលនោះ ប្រាសាទនៅតែជាកន្លែងសម្រាប់ស្ត្រី ចំណែកបុរសមិនអាចចូលរហូតដល់ឆ្នាំ ១៩០២ នៅ​ពេល​ដែល​ប្រាសាទ​មាន​ចៅ​អធិការ​ជា​បុរស ហើយ Tōkei-ji បានក្លាយជាផ្នែកមួយនៃទីសក្ការៈបូជា Engaku-ji ។

ប្រភព៖ AP