បុរសជនជាតិជប៉ុនម្នាក់បកស្រាយពីមូលហេតុ​ទុកសាកសពម្តាយក្នុងផ្ទះ

ប៉ូលិសបានចាប់ខ្លួនបុរសម្នាក់ទុកសាកសពម្តាយ​​ក្នុង​ផ្ទះរយៈពេលមួយសប្តាហ៍ ចំណែកមូលហេតុ​នៃការស្លាប់កំពុង​ស្ថិត​ក្រោម​ការ​ស៊ើប​អង្កេត។

ផ្ទះដែលរកឃើញសាកសព។ រូបភាព៖ Sun TV

ប៉ូលិសនៅ Kato ខេត្ត Hyogo បានចាប់ខ្លួនបុរសអាយុ ៥៩ ឆ្នាំម្នាក់ ព្រោះតែរក្សាទុកសាកសពម្តាយអាយុ ៨៧ ឆ្នាំក្នុងផ្ទះ។ លោកក៏មិន​បាន​ជូន​ដំណឹង​ដល់​អាជ្ញាធរ​មូល​ដ្ឋានចំពោះការស្លាប់របស់ម្តាយផងដែរ។

បើតាមប៉ូលិស បុរសនោះឈ្មោះ Shinichi Higashijima គ្មានការងារធ្វើ។ លោក Higashijima បានសារភាពថា ម្តាយ​ខ្លួន​ទទួល​មរណភាព​ដោយ​មិនដឹងពីមូលហេតុកាលពីថ្ងៃទី ១៦ ខែកុម្ភៈ។ គាត់តក់ស្លុត និងពិបាកចិត្តយ៉ាងខ្លាំង ហើយ​មិន​ដឹង​ថា​ត្រូវ​រៀប​ចំ​ពិធីបុណ្យ​សព​ម្តាយ​យ៉ាងណានោះទេ ដូច្នេះបានជាទុកសាកសពក្នុងបន្ទប់គេងរបស់ម្តាយ។

យោងតាមសារព័ត៌មាន Kyodo News លោក Higashijima រស់នៅជាមួយម្តាយរបស់គាត់។ សាកសពរបស់ស្រ្តីជាម្តាយ​ត្រូវ​​បាន​រក​ឃើញ​នៅ​ថ្ងៃទី ២៣ ខែកុម្ភៈ នៅពេលដែលបងស្រីរបស់លោក Higashijima អាយុ ៦៣ ឆ្នាំ ពី Kobe មកលេងម្តាយ។

ប៉ូលីសបានអោយដឹងនឹងធ្វើកោសល្យវិច័យដើម្បីកំណត់ពីមូលហេតុនៃការស្លាប់របស់ម្តាយលោក Higashijima ។ ហេតុ​​ការណ៍​​នេះ​​កំពុង​​ត្រូវ​​បាន​​ស៊ើប​អង្កេត​​នៅ​ឡើយ​។

ប្រភព៖ Kyodo News