ចំណុចដែលអ្នកត្រូវកត់សម្គាល់ដើម្បីកុំអោយបាត់​ប្រាក់​កក់​ពេល​ប្រគល់​សង​ផ្ទះ

នៅជប៉ុនពេលបញ្ចប់កិច្ចសន្យាជួលផ្ទះ ប្រសិនបើប្រាក់កក់មិនបានប្រគល់សងវិញ អាចនឹងមានបញ្ហាអ្វីម្យ៉ាង។ ដូច្នេះ ចូរយើងស្វែងយល់ជាមួយនឹងមេធាវី Akihiro Morimoto ចំណុចដែលត្រូវកត់សម្គាល់ពេលរើផ្ទះ ឬចំណុចដែល​ទាក់​ទង​នឹង​ប្រាក់​កក់។

ជាដំបូងយើងនឹងស្វែងយល់ តើប្រាក់កក់ជាអ្វី?

មេធាវី Morimoto បានអោយដឹងថា៖ “ប្រាក់កក់ ឬគេហៅថាប្រាក់ធានា ជាចំនួនទឹកប្រាក់ដែលភាគីជួលកក់មុន​ជា​មួយ​នឹង​ម្ចាស់​ផ្ទះ ដើម្បីជៀសវាងករណីមិនបង់ថ្លៃជួល ឬធ្វើអោយខូចខាតដោយចៃដន្យ។ ជាគោលការណ៍ ប្រាក់​កក់​ត្រូវ​ប្រគល់​ជូន​ភាគី​ជួល​ពេល​បញ្ចប់​កិច្ច​សន្យា ហើយរើចេញ” ។

ទោះជាយ៉ាងណា មានករណីជាច្រើនប្រាក់កក់មិនត្រូវបានប្រគល់សងវិញ ដោយសារទាក់ទងនឹងថ្លៃចំណាយលើ​ការ​​ជួស​​ជុល បន្ទាប់​​ពី​​ភាគី​​ជួល​​ចាក​​ចេញ។

ថ្លៃសេវាកម្មនេះប្រើសម្រាប់ “ជួសជុលបន្ទប់” អោយទៅជាសភាពដើមវិញ ប៉ុន្តែទំនួលខុសត្រូវចំពោះស្នាមកោស ឬ​ស្នាម​ប្រឡាក់ នៅ​តែ​ស្រពេចស្រពិលណាស់។ គ្មាននរណាកត់សម្គាល់ឃើញវាមានតាំងពីពេលណា ឬពេលភាគី​ជួល​មក​នៅ​មាន​ដែរអត់?

ដូចឧទាហរណ៍ខាងក្រោម ចំណុចដែលងាយនឹងបង្កការយល់ច្រឡំចំពោះទំនួលខុសត្រូវស្ថិតលើភាគីអោយជួល ឬអ្នក​ជួល​មាន​ដូច​ជា៖

១. រុំកន្ទេល tatami និងទ្វាររុញ

២. បោសសម្អាតផ្ទះ

៣. ជួសជុលស្នាមកោសលើជញ្ជាំង និងឥដ្ឋ

ក្នុងករណីនេះ ប្រការ ១ និង ២ ជាបន្ទុករបស់ភាគីអោយជួល ប៉ុន្តែប្រសិនបើកើតឡើងដោយសារការធ្វេសប្រហែស នោះ​ភាគី​អ្នក​ជួល​ត្រូវ​ទទួល​ខុស​ត្រូវ​ការ​ខូច​ខាតជញ្ជាំង ឬឥដ្ឋ។

ជាគោលការណ៍ ភាគីម្ចាស់ផ្ទះត្រូវទទួលខុសត្រូវជួសជុលស្នាមប្រេះ និងស្នាមប្រឡាក់ដែលកើតចេញពីហេដ្ឋារចនាសម្ព័ន្ធ​ធ្លាក់​ចុះ ឬខូចខាតដោយសារការរស់នៅប្រចាំថ្ងៃ។ ទោះជាយ៉ាងណា ភាគីជួលត្រូវទទួលបន្ទុកលើការខូចខាតដែល​កើត​ចេញ​ពី​ការ​ធ្វេស​ប្រហែស ដូចជាស្ថានភាពដុះផ្សិតដោយសារមិនសម្អាត ស្នាមប្រឡាក់ដោយសារភេសជ្ជៈកំពប់ ឬ​មិន​លាង​សម្អាត​អោយ​បាន​ត្រឹម​​ត្រូវ។

តើធ្វើយ៉ាងណាអាចជៀស​វាង​បញ្ហា​ទាំង​នេះ?

បើតាមមេធាវី Morimoto មានបញ្ហាសំខាន់ពីរដែលត្រូវយកចិត្តទុកដាក់៖

ចំណុចទី ១ ជាការល្អភាគីម្ចាស់ផ្ទះមានវត្តមានទាំងពេលអ្នកជួលផ្លាស់មក និងផ្លាស់ចេញ ដើម្បីបញ្ជាក់អំពីស្នាមប្រេះ ឬ​កខ្វក់។ បើ​សិនជាអាចត្រូវថតទុកជាភស្តុតាង។

ចំណុចទី ២ ត្រួតពិនិត្យកិច្ចសន្យា​ឱ្យ​បាន​ហ្មត់ចត់​មុន​នឹង​ជួល ជា​ពិសេសពិនិត្យចំណុច “ជួសជុលបន្ទប់ទៅជាសភាព​​ដើម​វិញ​ពេល​​ភាគី​​ជួល​​រើ​​ចេញ” ។

ក្រៅពីនេះ ដើម្បីការពារបញ្ហាទាក់ទងនឹងបញ្ហានេះ ក្រសួងដឹកជញ្ជូនជប៉ុនបានរៀបចំតារាង “ត្រួតពិនិត្យ” សម្រាប់​អ្នក​ជួល។ តារាងនេះជួយអោយអ្នកដឹងថាត្រូវត្រួតពិនិត្យកន្លែងណាខ្លះក្នុងបន្ទប់។ ដើម្បីជៀសវាងបញ្ហានេះ អ្នក​គួរ​តែ​ពិគ្រោះ​​នឹង​ការណែនាំនៅលើគេហទំព័ររបស់ក្រសួងដឹកជញ្ជូនមុនពេលជួល។ សង្ឃឹមថាអត្ថបទ​នេះអាចជួយអោយអ្នកជៀសវាងការបាត់បង់ប្រាក់កក់ពេលផ្លាស់ចេញពីផ្ទះជួលនៅជប៉ុន។

ប្រភព៖ TBS News Dig

hinhin