ស្កេន QR កូដដើម្បីចោលសំរាមនៅជប៉ុន???

ថ្ងៃសុក្រ 17/02/2023 | 13:47 ល្ងាច

អំឡុងពេលប៉ុន្មានឆ្នាំថ្មីៗនេះ ថ្លៃចំណាយសម្រាប់ចាត់ចែងកាកសំណល់របស់ភ្ញៀវទេសចរណ៍នៅផ្សារ Nishiki ក្នុងទីក្រុង Kyoto បានក្លាយជាបញ្ហាធំមួយ។ ដើម្បីដោះស្រាយបញ្ហានេះ ការពិសោធន៍មួយត្រូវបានធ្វើឡើង គឺថាអ្នកចោលសំរាមត្រូវរួមចំណែកលើការចាត់ចែងសំរាម។ នេះជាការពិសោធន៍លើកទី ២ ព្រោះលើកទី ១ មិនសូវមានអ្នកស្គាល់ច្រើននោះទេ ដូច្នេះហើយលើកនេះផ្សារបានសម្រេចចិត្តប្តូររបៀបពិសោធន៍។

ផ្សារ Nishiki ខណ្ឌ Nakagyo ខេត្ត Kyoto មានជាង ១៣០ ហាងលក់អាហារដោតចង្កាក់ និងគ្រឿងស្មូន។ មុនពេលជំងឺរាតត្បាតជំងឺកូវីដ ១៩ កើតឡើង កន្លែងនេះមានភ្ញៀវទេសចរណ៍មកច្រើន។ ភ្ញៀវទេសចរណ៍ច្រើនតែទិញអាហារនៅតាមតូប ហូបបណ្តើរ ដើរមើលជុំវិញផ្សារបណ្តើរ។ ដូច្នេះការចំណាយសម្រាប់ចាត់ចែងកាកសំណល់ក្នុងតំបន់នេះបានក្លាយជាបញ្ហាគួរអោយបារម្ភ។

ដោយសារចំនួនភ្ញៀវទេសចរណ៍ត្រូវគេរំពឹងថានឹងកើនឡើង ដូច្នេះកាលពីថ្ងៃទី ១០ ខែកុម្ភៈ តំបន់ផ្សារបានសហការជាមួយនឹងក្រុមហ៊ុនទេសចរណ៍ធំ ហើយចាប់ផ្តើមការពិសោធន៍ប្រមូលថ្លៃពេលចោលសំរាម។ លេខកូដ QR ត្រូវបានបោះពុម្ពនៅលើគម្របធុងសំរាម អ្នកអាចប្រើស្មាតហ្វូនសម្រាប់ស្កេនទូទាត់ប្រាក់ ១០០ យ៉េនលើថ្លៃចោលសំរាមដោយមិនចាំបាច់ប្រើសាច់ប្រាក់។ មានចំនួន ៨ ធុងសំរាមត្រូវបានបែងចែកតាមតំបន់ដើរទិញទំនិញ។

ការពិសោធន៍ស្រដៀងគ្នាដែលមានរយៈពេលប្រហែលមួយខែត្រូវបានធ្វើឡើងកាលពីឆ្នាំមុន ប៉ុន្តែវាមិនត្រូវបានគេស្គាល់ច្រើននោះទេ ហើយទទួលបានមកវិញជាង ១.១០០ យ៉េនប៉ុណ្ណោះ។ លើកនេះគោលដៅដាក់ចេញគឺ ១ ម៉ឺនយ៉េន និងផ្សព្វផ្សាយទៅកាន់មនុស្សកាន់តែច្រើនកាន់តែល្អ។ ដោយមានជំនួយពីសាលាឯកទេស ធុងសំរាមមានរូបគំនូររបស់ maiko កំពុងចោលសំរាម បង្កើតបានជាការរចនាដែលទាក់ទាញភ្នែកបំផុត។