ស្រ្តីប្រុងប្រយ័ត្ន ករណីលួចថត​​នារី​​ជាង​ ១​ ម៉ឺន​​នាក់​​ដែល​ទៅ​ងូត​ទឹក​​ក្តៅ​​នៅ​​ជប៉ុន

បុគ្គលឈ្មោះ Karin Saito អាយុ ៥០ ឆ្នាំ បានសារភាពថាជាមេដឹកនាំបណ្តាញលួចថត និងចែករំលែករូបភាពស្រ្តីជាង ១ ម៉ឺន​នាក់ ដែល​ទៅ​ងូត​ជ្រោះ​ទឹក​ក្តៅ​នៅ​ទូទាំង​ប្រទេស​ជប៉ុន​អំឡុង​ពេល​ជាង ៣០ ឆ្នាំកន្លងមកនេះ។

ក្នុង​ចំណោម​បុរស​ ១៦ នាក់​ដែល​ប៉ូលិស​ចាប់​ខ្លួន​ដើម្បី​ស៊ើប​អង្កេត មាន​ទាំង​មន្ត្រី​មូលដ្ឋាន និង​កណ្តាល។ បុគ្គលទាំង​នេះបានប្រើកាមេរ៉ា​លាក់​ក្នុង​គុម្ពឈើ ដើម្បីថតរូបភាពដែលមិនដឹងខ្លួនរបស់ជនរងគ្រោះ ហើយបន្ទាប់​មក​រៀប​ចំ​ពិធី​ជប់​លៀង​មើល​វីដេអូ​ដែល​បាន​លួច​ថត។

បើតាម Asahi Shimbun បុគ្គលឈ្មោះ Saito ត្រូវប៉ូលិសខេត្ត Hyogo ចាប់ខ្លួនកាលពីខែធ្នូ ឆ្នាំ ២០២១ ដោយចោទប្រកាន់​ពី​បទ​បំពាន​​បទ​ប្បញ្ញត្តិ​ប្រឆាំង​​​នឹង​​ទង្វើបង្កការរំខាន។ ករណី​របស់ Saito កំពុង​ត្រូវ​បាន​តុលាការ​បើក​សវនាការ។

ក្នុងអំឡុងពេលមួយឆ្នាំដែល Saito ជាប់ឃុំ ប៉ូលិសបានចាប់ខ្លួនជនសង្ស័យចំនួន ១៦ នាក់ដែលរស់នៅ ១១ ខេត្តផ្សេងៗ​ទៀត។

កាលពីដើមខែនេះ ប៉ូលិសខណ្ឌ Shizuoka ក៏​បាន​បញ្ជូន​ឯកសារទៅ​កាន់​ការិយាល័យព្រះរាជអាជ្ញាចំពោះជនសង្ស័យ ៣ នាក់​​ក្នុង​ចំណោម​ជន​សង្ស័យ​ ១៦ នាក់ខាងលើ។ ក្នុង​នោះ​មាន​វេជ្ជបណ្ឌិត​ម្នាក់ អាយុ ៣១ ឆ្នាំ នៅ Tokyo ត្រូវ​ចោទ​ប្រកាន់​ពីបទបំពានច្បាប់ប្រឆាំងនឹងរូបភាពអាសអាភាស និងពេស្យាចារលើកុមារ។ យោងទៅ​តាម​​អ្នក​​ស៊ើប​​អង្កេត បុគ្គលទាំង ៣ នៅខណ្ឌ Shizuoka រៀនជំនាញលួចថតដែលមិនត្រូវគេប្រទះឃើញពី Saito ។

នៅពេលសាកសួរ Saito ក៏បានសារភាពថា ខ្លួនចាប់ផ្តើមចំណូលចិត្តនេះតាំងពីអាយុ ២០ ឆ្នាំ ហើយបានទៅកាន់កន្លែង​ងូត​ទឹកក្តៅយ៉ាងហោចណាស់ ១០០ កន្លែងនៅប្រទេសជប៉ុន។ មុខសញ្ញារបស់ជននេះជាស្រ្តីដែលងូតទឹកក្តៅ ចំណែក Saito លាក់ខ្លួនលើភ្នំដែលមានចម្ងាយប្រមាណពីរបីរយម៉ែត្រ បន្ទាប់មកថតរូប ឬថតវីដេអូដោយកាមេរ៉ាដែល​បំពាក់​កែវថតតេឡេ។

ប៉ូលិសបានបន្ថែមថា បុគ្គលទាំងនេះលួចថតរូបភាព និងវីដេអូស្រ្តីម្នាក់ពេលកំពុងស្លៀកពាក់ និងពេលដោះសម្លៀក​​បំពាក់​​ទៅ​​ងូត​ទឹក​ក្តៅ ដើម្បីប្រៀបធៀបរូបភាពទាំងពីរ។ ជនទាំងនេះបង្កើតវីដេអូ និងកែសម្រួលដោយបន្ថែម​ចំណង​ជើងសម្រាប់ចូលរួមពិធីជប់លៀងមើលរួមគ្នា។

មិនត្រឹម​តែប៉ុណ្ណឹង បុគ្គលទាំងនេះក៏បានដាក់ថ្នាំងងុយដេកលើនារីជាច្រើននាក់ដើម្បីប្រព្រឹត្តអំពើ​ថោកទាប បន្ទាប់​​មក​ថត​ទុក។

តាមសម្តីរបស់ Saito ខ្សែបណ្តាញរបស់ជននេះមានសមាជិកយ៉ាងហោចណាស់ ១០០ នាក់។ ដូច្នេះហើយ​ប៉ូលិស​ជប៉ុននៅ​តែ​​បន្ត​​ស៊ើប​អង្កេត​​ដើម្បី​​ចាប់​ខ្លួន​ជនសង្ស័យ​បន្ថែមទៀត​។

ប្រភព៖ Asahi Shimbun