រឿងរ៉ាវស្នេហាដ៏ឈឺចាប់រវាងសាមូរ៉ៃ និងស្រ្តីពេស្យា

មានរឿងរ៉ាវស្នេហាដ៏ឈឺចាប់ជាច្រើន នៅពេលដែលអ្នកទាំងពីរមិនអាចនៅជាមួយគ្នាបាន។ ក្នុងនោះល្បីបំផុតរឿង Romeo និង Juliet របស់ Shakespeare ។ ស្រដៀងគ្នាដែរ ជប៉ុនក៏មានរឿងរ៉ាវស្នេហាពិត និងឈឺចាប់ខ្លាំងរបស់សាមូរ៉ៃផងដែរ។

រឿងនេះមានឈ្មោះថា Fujieda Shinju ពាក្យ Shinju មានន័យថាស្លាប់ជាមួយគ្នា។ មានរឿងជាច្រើននិយាយពីការធ្វើ​អត្តឃាត​រួម​គ្នា ប៉ុន្តែរឿងនេះល្បីដោយសារតែឋានៈរបស់តួអង្គ និងដំណើររឿង។

ជាដំបូងខ្ញុំសូមណែនាំតួអង្គសំខាន់ៗក្នុងរឿងនេះ។

តួឯកប្រុសមានឈ្មោះថា Fujieda Norinari ជាសាមូរ៉ៃដែលមានទ្រព្យសម្បត្តិស្តុកស្តម្ភ មានប្រពន្ធ និងកូន ៤ នាក់ (ប្រុស ៣ នាក់ និងស្រីម្នាក់) ។ ចំណែកតួឯកស្រីមានឈ្មោះថា Ayaginu ធ្វើការជាស្រ្តី​ពេស្យា នៅពេលនោះនាងមានអាយុ ១៩ ឆ្នាំ ស្មើ​អាយុ​ប្រពន្ធ​របស់​សាមូរ៉ៃ Fujieda ។

សង្ខេបសាច់រឿង

ទំនាក់ទំនងរបស់ពួកគេបានចាប់ផ្តើមនៅពេលដែល Fujieda ទៅកាន់់កន្លែងស្រ្តីពេស្យា ជាកន្លែងដែល Ayaginu កំពុង​នៅ។ នៅ​ទី​នោះ​មិនមែនជាកន្លែងសម្រាប់អ្នកដែលមានឋានៈ​ខ្ពង់ខ្ពស់​ដូចជា Fujieda មកឡើយ។

ទំនាក់ទំនង​របស់​ពួកគេ​រីកចម្រើននៅពេល​ដែល Fujieda មក​កន្លែង​នេះ​ញឹកញាប់។ ទោះជាយ៉ាងណា នៅពេលនោះ Ayaginu មានប្រជាប្រិយភាពខ្លាំង ដូច្នេះត្រូវទទួលភ្ញៀវជាច្រើនផ្សេងទៀត។ ម្នាក់ក្នុងចំណោមនោះជាឈ្មួញមានទ្រព្យសម្បត្តិ គាត់និយាយថាចង់លោះ​ខ្លួនឲ្យនាង។

តម្លៃលោះខ្លួនត្រូវបានប្រគល់ទៅឲ្យម្ចាស់ហាង ចំណែក Ayaginu ត្រូវទៅនៅជាមួយនឹងម្ចាស់ថ្មី។ នៅពេលដែល Fujieda ដឹងដំណឹងនេះបានភ្ញាក់ផ្អើលយ៉ាងខ្លាំង។ ថ្វីត្បិតតែ Fujieda ជាសាមូរ៉ៃដែលមានទ្រព្យសម្បត្តិច្រើន ប៉ុន្តែគាត់​បែរ​ជា​មិន​មាន​ប្រាក់​គ្រប់​គ្រាន់​សម្រាប់លោះខ្លួន Ayaginu ទៅ​វិញ។

Fujieda គិតយ៉ាងច្រើន ហើយរត់ទៅរក Ayaginu ប៉ុន្តែគាត់ត្រូវអ្នកបម្រើរបស់ឈ្មួយម្នាក់នោះដេញចេញ។ ក្រោយ​មក Fujieda បានរត់ទៅចាក់សម្លាប់ Ayaginu ហើយបញ្ចប់ជីវិតខ្លួនឯង។ នៅពេលនោះ Fujieda មានអាយុ ២៨ ឆ្នាំ ចំណែក Ayaki អាយុ ១៩ ឆ្នាំ។

ទោះបីជាអ្នកទាំងពីរបានស្លាប់ទៅហើយក្តី ប៉ុន្តែម្តាយ និងប្រពន្ធរបស់ Fujieda ត្រូវគេយកទៅកាត់ទោស។ ត្រូវហើយ ក្នុងករណីសាមូរ៉ៃប្រព្រឹត្តបទល្មើស មិនត្រឹមតែបុគ្គលនោះ សូម្បីតែសមាជិកគ្រួសារក៏ទទួលរងការផ្តន្ទាទោសផងដែរ។

ក្នុងរឿង Romeo និង Juliet បញ្ចប់ដោយឈុតឆាកសាច់ញាតិពេលដឹងដំណឹងអ្នកទាំងពីរស្លាប់ មានការសោកស្តាយ​យ៉ាង​ខ្លាំង​ដែល​បាន​ជំទាស់​ស្នេហា​របស់​ពួក​គេ។ ចំណែកក្នុងរឿងរបស់ Fujieda បញ្ចប់រឿងគ្រួសាររបស់គាត់ត្រូវ​ទទួល​រង​ការ​ដាក់​ទណ្ឌកម្ម​យ៉ាង​ធ្ងន់ធ្ងរ។

ខ្ញុំគិតថា ប្រហែលជាម្តាយរបស់ Fujieda សោកស្ដាយយ៉ាងខ្លាំង ព្រោះតែបានចិញ្ចឹម​កូន​ប្រុស​បែប​នេះ ចំណែកប្រពន្ធ​​របស់​​គាត់​​ក៏​​ពោរ​​ពេញ​​ទៅ​​ដោយ​​កំហឹង​ដែរ។ ក្រៅពីនេះ បើនិយាយពីទង្វើផិត​ក្បត់​របស់​តួឯក​ប្រុស វាមិន​មែន​ជា​រឿង​​រ៉ាវ​​ស្នេហា​បរិសុទ្ធ​ដូច​ជា Romeo និង Juliet នោះ​ទេ។ Fujieda បានប្រព្រឹត្តិខុសទាំងស្រុងនឹងការបង្រៀន​នៃស្មារតី​សាមូរ៉ៃ​ត្រូវ​រក្សា​ភាព​ស្ងប់​ស្ងាត់។

យើងគ្រប់គ្នាដឹងថា ឥទ្ធិពលស្នេហាអាចជម្រុញឲ្យ​មនុស្សឆ្កួតបាន។ ទោះជាយ៉ាងណា នៅពេលដែលខ្ញុំគិតដល់អារម្មណ៍​របស់ Fujieda ពេល​គាត់​ចាក់​មនុស្ស​ដែល​គាត់​ស្រលាញ់ បេះដូងកាន់តែឈឺចាប់ជាងនេះ។

Kengo Abe