ក្រុមហ៊ុនជប៉ុនអនុញ្ញាតឱ្យបុគ្គលិកធ្វើការក្រៅម៉ោង​រក​ចំណូល​បាន​រាប់​លាន​ក្នុង​មួយឆ្នាំ

ដើម្បីរក្សាបុគ្គលិកវ័យក្មេងដែលចង់បានបរិយាកាសការងារដែលអាចបត់បែនបាន ក្រុមហ៊ុនធំៗនៅជប៉ុនកំពុងចាប់​ផ្តើម​ទទួល​យក​ការ​ងារ​ក្រៅ​ម៉ោង។

បច្ចុប្បន្នសាជីវកម្មជប៉ុនកំពុងបន្ធូរបន្ថយបទប្បញ្ញត្តិដើម្បីអនុញ្ញាតឱ្យបុគ្គលិកធ្វើការងារក្រៅម៉ោង ដូចជា YouTuber ឬខាងវិស័យសិល្បៈជាដើម។ គោលដៅរបស់ពួកគេគឺដើម្បីរក្សាបុគ្គលិកវ័យក្មេងដែលទាមទារបរិយា​កាស​ការ​ងារ​ដែល​អាច​បត់​បែន​បាន។

Mitsui & Co. ជាសាជីវកម្មមួយក្នុងចំណោមសាជីវកម្មធំលើពិភពលោក។ ថ្មីៗនេះ សាជីវកម្ម Mitsui បានដកចេញ​​បទ​​ប្បញ្ញត្តិ​​ហាម​​បុគ្គលិក​មិនឱ្យធ្វើការក្រៅម៉ោង។ នេះ​បើ​តាម​អ្នក​នាំ​ពាក្យ​ក្រុមហ៊ុន​ពាណិជ្ជកម្ម​ធំ​ទី​បី​របស់​ជប៉ុន​បាន​ឱ្យ​ដឹង​ថា Mitsui អនុញ្ញាត​ឱ្យ​បុគ្គលិក​របស់ខ្លួនរកប្រាក់បន្ថែមនៅ​កន្លែង​ផ្សេង។

ទីស្នាក់ការកណ្តាលរបស់ Mitsui & Co. នៅទីក្រុងតូក្យូ។ រូបភាព៖ Bloomberg

ការផ្លាស់ប្តូរនេះឆ្លុះបញ្ចាំងពីការខិតខំប្រឹងប្រែងរបស់ក្រុមហ៊ុន ដើម្បីទទួលយកបទប្បញ្ញត្តិការងារដែលអាច​បត់​បែន​បាន។ ដោយផ្អែកលើវិធីនេះ ពួកគេអាចទាក់ទាញកម្មករវ័យក្មេង ក្នុងបរិបទចំនួនប្រជាជនធ្លាក់ចុះ ជាពិសេស​អំឡុង​ពេល​កើត​មាន​ជំងឺ​រាត​ត្បាត។

ក្រុមហ៊ុនបានឱ្យដឹងថា “ក្រោយពេលអនុវត្តគោលនយោបាយធ្វើការពីចម្ងាយ និងម៉ោងធ្វើការអាចបត់បែនបាន។ យើងជឿជាក់ថា ដល់ពេលដែលត្រូវធ្វើបន្ថែមទៀត ដើម្បីឱ្យបុគ្គលិកអាចបន្តទាំងការអភិវឌ្ឍអាជីព និងទម្រង់​ការ​ងារ​ថ្មី” ។ ការងារក្រៅម៉ោងមានដូចជាគ្រូបង្វឹក ធ្វើការក្នុងក្រុមហ៊ុន​បច្ចេក​វិទ្យា​បើក​ដំបូង ចង់ក្លាយ YouTuber ឬ​វិស័យ​សិល្បៈ។

យោងទៅតាមរបាយការណ៍ប្រចាំឆ្នាំថ្មីបំផុត បុគ្គលិករបស់ Mitsui រកបានជាមធ្យមប្រហែល ១៤,៨ លានយ៉េន (១១៤.០០០ ដុល្លារ) ក្នុង​មួយ​ឆ្នាំ។

ក្រុមហ៊ុនជប៉ុនមួយចំនួនដូចជា ក្រុមហ៊ុនផលិតរថយន្ត Nissan Motor Co. និងក្រុមហ៊ុនអាកាសចរណ៍ ANA Holdings Inc. បាន​អនុញ្ញាត​ឱ្យ​បុគ្គលិក​ធ្វើ​ការ​ងារ​ក្រៅ​ម៉ោង។

ក្រុមហ៊ុនពាណិជ្ជកម្ម រួមទាំងសាជីវកម្មដូចជា Mitsubishi Corp. និង Sumitomo Corp., មានឥទ្ធិពលយ៉ាងខ្លាំងនៅ​ប្រទេស​ជប៉ុន ដោយសារសកម្មភាពអាជីវកម្មចម្រុះរបស់ពួកគេគ្របដណ្តប់លើវិស័យជាច្រើនដូចជាទំនិញ និងផលិត​ផល​ប្រើ​ប្រាស់។ ពួកគេក៏ទាក់ទាញអ្នកវិនិយោគបរទេសដូចជា Berkshire Hathaway Inc. របស់ Warren Buffett កាន់​កាប់ ៦,៦% ភាគ​ហ៊ុន​របស់ Mitsui ។

ក្រុមហ៊ុនទាំងនេះមានប្រជាប្រិយភាពខ្លាំងចំពោះនិស្សិតទើបបញ្ចប់ការសិក្សា ដោយសារតែប្រាក់ខែខ្ពស់ និងសុវត្ថិភាព​ការ​ងារ។ ហើយក៏ជាកន្លែង​សម្រាប់​សហគ្រិន​ជោគ​ជ័យមួយចំនួនផងដែរ។ ក្នុងចំណោមនោះមាន Takeshi Niinami អតីត​​បុគ្គលិក​របស់ Mitsubishi ដែល​​បច្ចុប្បន្ន​​ជា​​ប្រធាន​សាជីវកម្ម​ស្រា Suntory Holdings Ltd ។

ប្រភព៖ Bloomberg