កញ្ចក់ស្ពាន់ និងដាវសម្រាប់​បណ្តេញខ្មោច​បិសាច​រក​ឃើញ​ក្នុង​ផ្នូរ​បុរាណ​ជប៉ុន

កញ្ចក់​ស្ពាន់មានរាងដូចជាខែល និងដាវដែកប្រវែង ២,៣៧ ម៉ែត្រត្រូវបានគេរកឃើញនៅក្បែរមឈូសឈើដែលមានអាយុកាលប្រហែល​ក្នុង​សតវត្សទី ៤ ។

កញ្ចក់ស្ពាន់មានរាងខែលត្រូវ​បាន​រក​ឃើញ​នៅ​កន្លែង​បញ្ចុះ​សព Tomiomaruyama ។ រូបភាព៖ ក្រុមប្រឹក្សាអប់រំក្រុង Nara 

មជ្ឈមណ្ឌលស្រាវជ្រាវទ្រព្យសម្បត្តិវប្បធម៌ទីក្រុង Nara និងវិទ្យាស្ថានបុរាណ Kashihara ខេត្ត Nara បានប្រកាសពីការរកឃើញថ្មី និងមិនធ្លាប់មានពីមុនមកកាលពីថ្ងៃទី ២៥ ខែមករា។ ការរកឃើញទាំងនេះរួមមានកញ្ចក់​ស្ពាន់​រាង​ខែល និង​ដាវ​ដែក​ធំ​មួយ​ដែល​បាន​រក​ឃើញនៅទីបញ្ចុះសព kofun Tomiomaruyama ។ នេះជាកន្លែងបញ្ចុះសព kofun មាន​រាង​មូល​ធំ​ជាង​គេ​នៅ​ជប៉ុន ដែលមានអាយុកាលតាំងពីពាក់កណ្តាលសតវត្សទី ៤ មកម្ល៉េះ។

មជ្ឈមណ្ឌលស្រាវជ្រាវទ្រព្យសម្បត្តិវប្បធម៌ទីក្រុង Nara ចាប់ផ្តើមជីក Tomiomaruyama ពីឆ្នាំ ២០១៨ ។ នៅឆ្នាំនេះ ក្រុមការងារបានរកឃើញមួយផ្នែកនៃ kofun ដែល​ហៅ​ថា “tsukuridashi” ចំណែកដែលលេចចេញនៅ​កណ្តាល​កន្លែងបញ្ចុះ​​សព រីឯមឈូស​ឈើមាន​ប្រវែង ៥ ម៉ែត្រ។

ពួកគេ​ក៏​បាន​រក​ឃើញ​ដាវ​ដែក និង​កញ្ចក់ស្ពាន់ក្នុងស្រទាប់ដីឥដ្ឋដែលគ្រប​លើ​មឈូស។ នេះ​ជា​លើក​ទី​មួយ​ហើយ​ដែល​កញ្ចក់ស្ពាន់រាង​ខែល​​ត្រូវ​​បាន​រកឃើញនៅកន្លែងបុរាណវិទ្យាក្នុងប្រទេសជប៉ុន។

កញ្ចក់មានឆ្លាក់ក្បាច់ស្មុគស្មាញលើផ្ទៃខាងក្រោយ ហើយត្រូវបានអ្នកជំនាញសរសើរថា ជាស្នាដៃស្ពាន់ពីសម័យ Kofun (សតវត្សទី ៣-៧) មានប្រវែងប្រហែល ៦៤ សង់ទីម៉ែត្រ។ កញ្ចក់​​ស្ពាន់​នៅ​កន្លែងបុរាណវិទ្យាជាធម្មតាមានរាងមូល ប៉ុន្តែកញ្ចក់នេះមានរាងខែលទៅវិញ។

នៅកណ្តាលផ្ទៃខាងក្រោយកញ្ចក់ត្រូវ​បាន​រចនា​ឡើងអាចកាន់បាន។ ផ្នែកទាំងសងខាងនេះមានក្បាច់រចនារាងមូល ក្បាច់រចនាទាំងនេះស្រដៀងទៅនឹងរូបឆ្លាក់លើ Daryukyo ជាកញ្ចក់បុរាណដែលផលិតនៅប្រជុំកោះជប៉ុនក្នុងកំឡុងសម័យ Kofun ។

ដោយសារមូលហេតុ​នេះ អ្នកជំនាញបានដាក់ឈ្មោះការរកឃើញថ្មីនេះថា “កញ្ចក់ស្ពាន់រាងខែល Daryumon” ។ វា​មាន​ផ្ទៃ​ធំ​ជាងគេ​ក្នុង​ចំណោមកញ្ចក់​​ស្ពាន់ដែល​បានរកឃើញនៅ​កន្លែង​បុរាណ​វិទ្យា​ជប៉ុន។ មុននោះ កំណត់ត្រានេះបានទៅលើកញ្ចក់នៅ Hirabaru ខេត្ត Fukuoka ដែលមានអង្កត់ផ្ចិត ៤៦,៥ សង់ទីម៉ែត្រ។

រូបភាពថតកាំរស្មីអ៊ិចបង្ហាញពីទំហំប្រហាក់ប្រហែលដាវ។ រូបភាព៖ វិទ្យាស្ថានបុរាណវិទ្យា Kashihara ខេត្ត Nara ។

ដាវដែលជីកបាននៅ kofun Tomiomaruyama មានប្រវែង ២,៣៧ ម៉ែត្រ និងទទឹង ៦ សង់ទីម៉ែត្រ។ ជាប្រភេទដាវ dakoken មានរាងកោងស្រដៀងនឹង​ពស់។ នេះជាដាវដែលធំបំផុត​ត្រូវ​បាន​រក​ឃើញ​នៅ​កន្លែង​បុរាណវិទ្យារបស់ជប៉ុន។ បើតាមអ្នកជំនាញ ដាវជា​ឧបករណ៍​ធ្វើ​ពិធីបណ្តេញខ្មោចបិសាច មិនមែនជាអាវុធពិតនោះទេ ដោយ​សារ​តែ​វា​មាន​ទំហំ​ធំ។

ក្រុមការងារជឿជាក់ថា មិនទាន់មានចោរបើកមឈូសឈើយកវត្ថុខាងក្នុងនោះទេ ព្រោះមឈូសមានសភាពល្អនៅ​ឡើយ។ ក្រុម​ប្រឹក្សា​​អប់រំ​​ក្រុង Nara គ្រោង​នឹង​ស្រាវជ្រាវមឈូសក្នុងឆ្នាំនេះ ឬតាមក្រោយ។ ក្រុមប្រឹក្សាបើកទ្វារកន្លែង​ជីក​យក​កញ្ចក់ និង​ដាវ​ជា​សាធារណៈនៅថ្ងៃទី ២៨-២៩ ខែមករា ប៉ុន្តែវត្ថុបុរាណទាំងពីរនេះមិនទាន់បង្ហាញទេ ព្រោះ​កំពុង​ជួស​ជុល​ឡើង​វិញ។

ប្រភព៖ Asahi Shimbun