ស្វែងរកអ្នកដែល​បានបាត់​ខ្លួន​ដោយសារ​ករណីផ្ទាំងទឹកកកធ្លាក់នៅខេត្ត Nagano

ប៉ូលិសជប៉ុនបានអោយដឹងថា នៅថ្ងៃទី ៣០ ខែមករានេះ កម្លាំង​សង្គ្រោះ​បានចាប់ផ្តើមស្វែងរកបុរសពីរនាក់ដែល​កំពុង​បាត់​ខ្លួន​នៅ​លើ​ភ្នំដែលមានកម្ពស់ប្រហែល ២.១០០ ម៉ែត្រនៅខេត្ត Nagano ភាគកណ្តាលប្រទេសជប៉ុន បន្ទាប់​ពី​ពួក​គេ​ជាប់​គាំង​ក្នុងករណីផ្ទាំងទឹកកកធ្លាក់កាលពីម្សិលមិញ។

កម្លាំងជួយ​សង្គ្រោះ (ក្នុង​រថយន្ត​ខ្សែកាប) ស្វែងរក​មនុស្ស​បាត់​ខ្លួន​ក្នុង​ករណីផ្ទាំងទឹកកធ្លាក់នៅខេត្ត Nagano​ ប្រទេសជប៉ុន នៅថ្ងៃទី ៣០ ខែមករា ឆ្នាំ២០២៣ ។ រូបភាព៖ Kyodo

យោងទៅតាមប្រភពព័ត៌មានខាងលើ អ្នក​បាត់​ខ្លួន​ទាំង​ពីរ​នាក់​ស្ថិត​ក្នុង​ចំណោម​អ្នក​ជិះ​ស្គី​ចំនួន ១៣ នាក់ ដោយចែកចេញជា ៣ ក្រុម និងជាជនបរទេសទាំងអស់។ អ្នកទាំងនេះស្ថិតនៅខាងក្រៅតំបន់ល្បាតក្បែររមណីយដ្ឋានភ្នំ Tsugaike ក្នុងភូមិ Otari ពេលកើតមានករណីផ្ទាំងទឹកកធ្លាក់កាលពីថ្ងៃទី ២៩ ខែមករា។ បច្ចុប្បន្នមនុស្ស ១១ នាក់ បានចុះពីលើភ្នំដោយសុវត្ថិភាព។

ប៉ូលិសបានអោយដឹងបន្ថែមថា សរុបមានមនុស្សចំនួន ៥ នាក់ជាប់គាំងបន្ទាប់ពីករណីព្រិលធ្លាក់ ក្នុងនោះ ៣ នាក់រួចផុតពីគ្រោះថ្នាក់ អ្នកជិះស្គីម្នាក់រងរបួសស្មា។ ប៉ូលិស​មិន​អាច​ធ្វើ​ការ​ស្វែង​រក​អ្នក​បាត់​ខ្លួន​នៅថ្ងៃទី ២៩ ខែ​មករា ដោយ​សារ​​អាកាស​ធាតុ​​អាក្រក់ និង​​កត្តា​​ផ្សេង​​ទៀត។

ករណីផ្ទាំងទឹកកកធ្លាក់នៅម៉ោងប្រហែល ១៤ៈ៣០ នាទី​ថ្ងៃ​ទី ២៩ ខែ​មករា នៅ​តំបន់​ជនបទ​ដែល​មាន​ប្រជាជន​តិច​​តួច។ ទីតាំងដែលកើតមានឧបទ្ទវហេតុនេះស្ថិតនៅកន្លែងជិះស្គីភាគខាងកើតភ្នំ Norikura ដែលមានកម្ពស់ជាង ២.១០០ ម៉ែត្រ។ អាជ្ញាធរ​ជប៉ុន​បាន​ចេញ​សេចក្តីប្រកាសផ្ទាំងទឹកកកធ្លាក់នៅតំបន់ភាគខាងជើង Nagano ក្នុង​នោះ​មាន​ទាំង​ភូមិ Otari ។ បើតាមទីភ្នាក់ងារឧតុនិយមជប៉ុន​ តំបន់នេះមានព្រិលធ្លាក់ខ្លាំងអំឡុងពេលប៉ុន្មាន​ថ្ងៃ​នេះ និង​ព្រមាន​អំ​ពី​ហានិភ័យ​ផ្ទាំង​ទឹក​កក​ធ្លាក់។

ប្រភព៖ Skydoor