សោកនាដកម្ម​ជីវិតតារា​សម្ដែង​ជប៉ុនដែលទទួលរងការបំពានផ្លូវភេទ

តារា​សម្ដែង​ជប៉ុន Milla Chiba បានទទួលមរណភាពបន្ទាប់ពី​រង​ការ​ប្រមាថ​ព្រោះតែចោទ​ប្រកាន់​អ្នក​ដឹក​នាំ​រឿង Sono Sion ពី​​បទ​​ចាប់​​រំលោភ។ 

បើតាម Shūkan Bunshun កាលពីថ្ងៃទី ២៧ ខែមករា តារាស្រីបានធ្វើអត្តឃាតនៅផ្ទះនៅចុងខែធ្នូ ឆ្នាំ ២០២២ រហូត​មក​ដល់​ពេល​នេះ​ទើប​សាច់​ញាតិ​ប្រាប់​ដំណឹង​ដ៏​ក្រៀម​ក្រំ​នេះ។ Milla Chiba មិនបានបន្សល់ទុកសំបុត្រឡើយ នាង​មាន​កូន​ប្រុស​អាយុ ៣ ឆ្នាំម្នាក់។

តារាសម្តែង Milla Chiba ។ រូបភាព៖ Oricon News

មិត្តភក្តិរបស់ Milla Chiba បាននិយាយថា “ប្រសិនបើមិនបញ្ជាក់ព័ត៌មានដែលថានាងបានទទួលមរណភាពដូចជាបដិសេធវត្តមានរបស់នាង។ បន្ទាប់​ពី​ចោទ​ប្រកាន់​ករណី​​រំលោភ​សេពសន្ថវៈ Milla Chiba ទទួល​រង​សម្តី​អាក្រក់ជា​ច្រើន ធ្វើឱ្យនាងឈឺចាប់យ៉ាងខ្លាំង។ ប៉ុន្តែខ្ញុំគិតថា មូលហេតុ​ដែល​នាង​ស្លាប់​មិនត្រឹម​តែប៉ុណ្ណឹងទេ។ នាងមានជំងឺ​ធ្ងន់​យូរ​មក​ហើយ ថែម​ទាំង​ពិបាក​ចិត្ត​រឿង​គ្រួសារ” ។

មិត្តរួមការងាររបស់ Milla Chiba ឈ្មោះ Yuki Matsuzaki ដែលជាអ្នកតស៊ូដើម្បីចលនា Me Too ក្នុងគោលបំណងប្រឆាំងនឹងការបៀតបៀនផ្លូវភេទ និងការរំលោភបំពានបាននិយាយថា គាត់មានការភ្ញាក់ផ្អើលយ៉ាងខ្លាំងចំពោះដំណឹងនេះ។ Yuki Matsuzaki បានសរសេរនៅលើទំព័រផ្ទាល់ខ្លួនថា “Milla Chiba ស្រ្តីដែលខំប្រឹងលុបបំបាត់អំពើហិង្សាផ្លូវភេទក្នុងវិស័យភាពយន្តជប៉ុន បានទទួលមរណភាពហើយ” ។ កាល​ពី​ឆ្នាំ​មុន Yuki Matsuzaki ធ្លាប់ណែនាំមេធាវីឱ្យ Milla Chiba ជួយនាងប្តឹង Sono Sion ។

មរណភាពរបស់តារាស្រីរូបនេះបានបង្កការភ្ញាក់ផ្អើលយ៉ាងខ្លាំងក្នុងវិស័យភាពយន្តជប៉ុន។ ហេតុការណ៍​រវាង​នាង និងលោក Sono Sion ក៏​ត្រូវ​បាន​​ទស្សនិក​ជន​​មើល​ឡើងវិញផងដែរ។ កាលពីខែមេសា ឆ្នាំ ២០២២ នៅពេលដែលអ្នកដឹកនាំរឿង Sono Sion ត្រូវតារាស្រីមួយចំនួនមិនបញ្ចេញ​ឈ្មោះ​ចោទ​ប្រកាន់​ពីបទរំលោភសេពសន្ថវៈ Milla Chiba បានទម្លាយរឿងខ្លួនធ្លាប់ក្លាយជាជនរងគ្រោះរបស់លោក Sono Sion ។

ដឹកនាំសម្តែង Tak Sakaguchi (ខាងស្តាំ) និងអ្នកដឹកនាំរឿង Sono Sion ។ រូបភាព៖ Twitter/Tak Sakaguchi

នៅ​ពេល​នោះតារាស្រីបានអោយដឹងថា នាងធ្លាប់ត្រូវបានតារា​សម្ដែង និង​ជា​អ្នក​ដឹក​សម្តែងលោក Tak Sakaguchi ជូនទៅផ្ទះរបស់លោក Sono Sion ។ ពេលចូលបន្ទប់ លោក Tak Sakaguchi យកលេសចេញ​ទៅ​លើក​ទូរស័ព្ទ​មិន​បាន​ត្រឡប់​មក​វិញ។ លោក Sono Sion ស្ទាប Milla Chiba តែនាង​មិន​ព្រម។ អ្នកដឹកនាំរឿងបង្ខំ​នាងឱ្យឡើងគ្រែ ក្នុងពេលលោកកំពុងដោះសម្លៀកបំពាក់​នាង​បាន​រត់​ចេញពី​បន្ទប់។

បន្ទាប់ពីត្រូវ Milla Chiba ប្តឹង លោក Sono Sion បានប្តឹងនាងពីបទបរិហាកេរ្តិ៍អ្នកដទៃ ចំណែកទស្សនិកជនជាច្រើនបានវាយប្រហារ និងចំអកឱ្យតារាស្រីរូបនេះ។ ប៉ុន្តែជនរងគ្រោះមួយចំនួនបានបញ្ចេញមិត រួមជាមួយនឹងអ្នកដឹកនាំរឿងផ្សេងទៀតចុះហត្ថលេខាគាំទ្រពួកគេ លោក Sono Sion ត្រូវសរសេរលិខិតសុំទោសជនរងគ្រោះ។

អំឡុងពេលចុងក្រោយនៃជីវិត Milla Chiba ទ្រាំនឹងជំងឺធ្វើអោយខ្លួនធ្លាក់ក្នុងស្ថានភាពសោកសៅ។ តារាស្រីបង្ហាញ​ពី​អារម្មណ៍របស់ខ្លួនលើកចុង​ក្រោយ​នា​ខែឧសភា ឆ្នាំ ២០២២ នៅ​ពេល​នោះ នាង​បាន​បង្ហើប​ថា មិត្ត​សម្លាញ់​​របស់ខ្ញុំ​ត្រូវ​គេ​រំលោភ​រហូត​មាន​ផ្ទៃ​ពោះ ​ត្រូវ​រំលូត​កូន​ចោល។ នាង​សរសេរ​ថា “ខ្ញុំកំពុងគិត ហេតុ​អ្វីបានជាពិភព​លោក​នេះឆ្កួតម្ល៉េះ។ នាងមិនប្រឡូកក្នុងវិស័យសិល្បៈតែក៏ក្លាយជាជនរងគ្រោះ។ ខ្ញុំសង្ឃឹមថាអាចធ្វើអ្វីម្យ៉ាង ទោះ​តូច​តាច​បំផុត ដើម្បី​រួម​ចំណែក​ផ្លាស់​ប្តូរ​បញ្ហា​នេះ។ ការតស៊ូទើបចាប់ផ្តើម ប៉ុន្តែ​ខ្ញុំ​មិន​បោះបង់​ឡើយ” ។

Milla Chiba កើតនៅឆ្នាំ ១៩៨៦ ចូលប្រឡូកវិស័យសិល្បៈឆ្នាំ ២០០៥ ក្នុងនាមជាតារាចម្រៀង។ នាងធ្លាប់ជាអ្នកច្រៀង​នាំ​មុខ​នៃ​ក្រុម​រ៉ុក Scarlet Diva ។ ចាប់ពីឆ្នាំ ២០០៨ Milla Chiba ប្រឡូកខាងវិស័យសម្តែង និងសម្ដែងក្នុងខ្សែ​ភាព​យន្ត Hikinzoku no yoru, Yoru dakara ។ល។ ប៉ុន្មានឆ្នាំចុងក្រោយនេះ នាងចេញពីវិស័យសិល្បៈប្តូរទៅវិស័យ​រចនា​ម៉ូដ​វិញ។

យោងតាមគេហទំព័រ Ettoday កាលពីឆ្នាំមុន វិស័យសិល្បៈជប៉ុនពេញទៅដោយរឿងអាស្រូវផ្លូវភេទ។ ក្រៅពីលោក Sion Sono អ្នកដឹកនាំរឿង និងតារាសម្តែងល្បីៗដូចជា Hideo Sakaki, Houka Kinoshita ។ល។ ត្រូវតារាសម្តែងមិន​បញ្ចេញ​ឈ្មោះរាប់សិបនាក់ចោទប្រកាន់ពីបទរំលោភផ្លូវភេទ ដោយស្នើឱ្យពួកគេយកស្នេហាមកប្តូរយកការសម្តែង។

រឿង​អាស្រូវ​ជា​បន្តបន្ទាប់​បានបង្កការភ្ញាក់ផ្អើលលើវិស័យភាពយន្តជប៉ុន។ ផលិតករភាពយន្តជាច្រើនបានរិះគន់ទង្វើមិនត្រឹម​ត្រូវរបស់ Hideo Sakaki, Sion Sono រួមទាំងអ្នកដឹកនាំ ផលិតករ និងអ្នកនិពន្ធរឿងល្បីៗដូចជា Kore-eda Hirokazu, Nobuhiro Suwa, Yukiko Sode, Miwa Nishikawa, Kōji Fukada, Atsushi Funahashi ។ល។ ផលិត​ករ​ភាព​យន្ត​ទាំង​នេះ​ចេញសេចក្តីប្រកាសរួម ដោយអំពាវនាវ​ឱ្យអ្នកដឹកនាំ​រឿងមិន​យកការងាររបស់ខ្លួនបម្រើ​គោល​បំណង​ផ្ទាល់​ខ្លួន បំពុលវិស័យភាពយន្ត និង​បំផ្លាញ​បរិយាកាស​ច្នៃប្រឌិត​សិល្បៈ។ ផលិតករសន្យាថានឹងបង្កើតបរិយាកាស​សុវត្ថិភាព​សម្រាប់​អ្នក​ផលិត​ភាព​យន្ត។

ប្រភព៖ Skydoor