នារីជនជាតិជប៉ុនម្នាក់ស្លៀកគីម៉ូណូពណ៌ក្រហមជិះស្គីផ្ទុះការចាប់អារម្មណ៍

វីដេអូនារីជនជាតិជប៉ុនម្នាក់ស្លៀកឈុតគីម៉ូណូពណ៌ក្រហមជិះស្គីដើម្បីអបអរសាទរពិធីបុណ្យពេញវ័យដែលកំពុងល្បី​លើ​បណ្តាញ​សង្គម។

កាលពីថ្ងៃទី ៩ ខែមករាកន្លងទៅនេះ កញ្ញា Sumire Morino អាយុ ២០ ឆ្នាំ បានចែករំលែកវីដេអូដែលមានរយៈពេល ២២ វិនាទី​របស់​ខ្លួន នាងស្លៀកឈុតគីម៉ូណូពណ៌ក្រហមជិះស្គីនៅរមណីយដ្ឋាន Banshogahara ខេត្ត Nagano ភាគ​កណ្តាល​ប្រទេស​ជប៉ុន។ គិតត្រឹមថ្ងៃទី ២៦ ខែមករា វីដេអូនេះមានអ្នកចូលមើលជាង ៥,១ លាន។

កញ្ញា Morino បាននិយាយថា នាងស្លៀកគីម៉ូណូ furisode ទិញក្នុងតម្លៃ ២ ម៉ឺនយ៉េន (១៥៣ ដុល្លារ) ។ Furisode ដែល​មាន​ដៃ​អាវ​ធំ វែង ជា​ទូទៅ​នារី​មិន​ទាន់រៀបការស្លៀកក្នុងឳកាសពិធីបុណ្យធំដូចជាពិធីមង្គលការ ពិធីបុណ្យពេញ​វ័យ។

នាងបានចែករំលែកថា “បើតាមវប្បធម៌ជប៉ុន នារីស្លៀកឈុតគីម៉ូណូពិសេសហៅថា furisode សម្រាប់ពិធីបុណ្យពេញ​វ័យ ហើយ​ខ្ញុំ​ចង់​ស្លៀក​ឈុត​នេះយ៉ាងហោចណាស់ម្តងក្នុងជីវិត” ។

Sumire Morino ស្លៀកគីម៉ូណូ​ពណ៌​ក្រហម​ជិះ​ស្គី​នៅ​រមណីយដ្ឋានខេត្ត Nagano កាល​ពី​ថ្ងៃ​ទី​ ៩ ខែមករា។ រូបភាព៖ @Katorisenkou_ks 

នៅជប៉ុនពិធីបុណ្យពេញវ័យប្រារព្ធធ្វើឡើងដើម្បីអបអរសាទរយុវជនឈានចូលអាយុ ២០ ឆ្នាំ ប៉ុន្តែ Morino មិនចង់ចូលរួមពិធីបុណ្យប្រពៃណីដូចជាជួបជុំមិត្តរួមថ្នាក់ពីបឋមរហូតដល់វិទ្យាល័យទេ។ ផ្ទុយទៅវិញ នាងទៅរមណីយ​ដ្ឋាន​ជិះ​ស្គី Banshogahara ដើម្បីអបអរសាទរ ដោយរួមបញ្ចូលចំណូលចិត្តកាលនៅវិទ្យាល័យជាមួយនឹងប្រពៃណី។

បច្ចុប្បន្ន Morino ជានិស្សិតសាកលវិទ្យាល័យនៅទីក្រុងក្យូតូដែលជំនាញខាងផ្នែកសិប្បកម្មប្រពៃណី ដំបូងឡើយនាងបារម្ភខ្លាចដៃអាវ furisode វែងពេកអាចនឹងជាប់បន្ទះក្តារស្គី។ ទោះជាយ៉ាងណា អ្វីដែលកើតឡើងជាបន្តបន្ទាប់​មិន​គួរ​អោយ​ព្រួយ​បារម្ភ​ឡើយ។ ក្នុងវីដេអូពេលនាងជិះស្គីដៃអាវរសាត់តាមខ្យល់។

មនុស្សម្នាក់បានបញ្ចេញមតិខាងក្រោមវីដេអូរបស់ Morino ថា “ឈុតគីម៉ូណូមើលទៅសមនឹងនាងណាស់ សូមចូល​រួម​អប​អរ​សាទរ​ដែលអ្នកពេញវ័យ” ។

ម្នាក់ទៀតនិយាយថា “ពិតជាអស្ចារ្យណាស់ សូមរៀបការនឹងខ្ញុំ” ។

Morino ក៏​បាន​បង្ហោះ​រូបភាពស្លៀក​គីម៉ូណូ​ឈរ​នៅ​លើ​ភ្នំ និងព្រិលរបស់ខ្លួន។ នាងត្រូវកែសម្រួលសម្លៀកបំពាក់ជាច្រើនដងព្រោះខ្យល់បក់យ៉ាងខ្លាំងធ្វើឱ្យវារញ៉េរញ៉ៃ។

Morino និយាយថា “សម្រាប់ខ្ញុំ ថ្ងៃដែលពេញវ័យគ្រាន់តែជាថ្ងៃធម្មតាប៉ុណ្ណោះ។ ប៉ុន្តែមនុស្សជាច្រើនបានជប់លៀងជាមួយខ្ញុំ ហើយវាក្លាយជាថ្ងៃដែលមិនអាចបំភ្លេចបាន” ។

Sumire Morino ស្លៀកគីម៉ូណូ​ពណ៌​ក្រហម​នៅ​រមណីយដ្ឋានខេត្ត Nagano កាល​ពី​ថ្ងៃ​ទី ៩ ខែ​មករា។ រូបភាព៖ @SinPictures

ប្រជាជនជប៉ុនយ៉ាងហោចណាស់មួយលាននាក់ប្រារព្ធពិធីបុណ្យពេញវ័យនៅថ្ងៃទី ៩ ខែមករា។ ទំនៀមទម្លាប់ស្លៀកសម្លៀកបំពាក់ថ្មីតាមបែប “មនុស្សពេញវ័យ” មានតាំងពីសតវត្សទី ៨ មកម្ល៉េះ។

ជាទូទៅស្រ្តីស្លៀកឈុតគីម៉ូណូ furisode ខណៈដែលបុរសពាក់អាវធំ ឬខោជើងខ្លី hakama ។ ក្នុង​ឱកាស​នេះ យុវជន​ជប៉ុន​ទៅកាន់ប្រាសាទ​នានា ដើម្បី​សុំ​ពរជ័យ​សម្រាប់​ក្រុម​គ្រួសារ និង​មិត្តភ័ក្តិ ឬ​ចូលរួម​ seijinshiki ជា​ពិធី​ដែល​ប្រារព្ធ​​ធ្វើ​​ឡើង​នៅ​​សាលា​​ស្រុក។ ហើយក៏ជាថ្ងៃដំបូងដែល​យុវជន​ជាច្រើនមានសិទ្ធិផឹកស្រា និង​ជក់​បារី​ដោយ​ស្របច្បាប់ ដូច្នេះ​​ពិធីបុណ្យ​​អាច​នឹង​មាន​សំឡេង​រំខាន​។

ពិធីបុណ្យពេញវ័យបន្ទាប់នឹងធ្វើឡើងនៅថ្ងៃទី ៨ ខែមករា ឆ្នាំ ២០២៤ ។

ប្រភព៖ Skydoor