ជ័រលុប​មាន​ទម្ងន់​ជាង ​២​ គីឡូក្រាម តម្លៃខ្ពស់មិននឹកស្មាន

ក្រុមហ៊ុនផលិតជ័រលុបជប៉ុន Seed ត្រូវបានបង្កើតឡើងក្នុងឆ្នាំ ១៩១៥ ដែលជាក្រុមហ៊ុនមួយក្នុងចំណោមក្រុមហ៊ុនមានអាយុកាលយូរ។ ខ្សែសង្វាក់ផលិតផលដែលល្បីរបស់ Radar បានដាក់ចេញនៅឆ្នាំ ១៩៦៨ ហើយបានក្លាយជាការ​ពេញ​និយម​យ៉ាង​ឆាប់រហ័សនៅលើទីផ្សារជប៉ុន។

ការរចនាល្អ និងប្រសិទ្ធភាពគួរឱ្យចាប់អារម្មណ៍ពេលប្រើបានធ្វើឱ្យ Radar ទទួលបានភាពជោគជ័យខាងផ្នែកពាណិជ្ជកម្ម តម្លៃ​ចាប់​ពី ២០ ទៅ ៥០ យ៉េន ខណៈដែលជ័រលុបស្តង់ដារមានតម្លៃត្រឹម​ ១០ យ៉េន។

ផលិតផលរបស់ Radar បានអភិវឌ្ឍយ៉ាងខ្លាំងចាប់ពេលនោះ ជាមួយនឹងជ័រលុបមានច្រើនប្រភេទ គ្រប់ទំហំ រួមទាំង​ជ័រ​លុប​ធំ​មាន​ទម្ងន់ ២,២៨៥ គីឡូក្រាម ដែលមានតម្លៃ ១៣,២០០ យ៉េន (ជាង ១០០ ដុល្លារ) ។

ជ័រលុបធំជាងគេលើពិភពលោកមានទម្ងន់ ២.២ គីឡូក្រាម។ រូបភាព៖ Oddity Central

បច្ចុប្បន្ន Radar S-10000 គឺជាជ័រលុបធំជាងគេក្នុងចំណោមផលិតផលរបស់ Radar ហើយប្រហែលជាធំជាងគេនៅលើពិភពលោកផងដែរ។ ទម្ងន់របស់វាធ្ងន់ជាង ២០០ ដងជ័រលុប Radar S-60 ស្តង់ដារ ។ ទោះជាយ៉ាងណា ជ័រលុប​ទាំង​ពីរ​ផលិត​ពី​វត្ថុ​ធាតុ​ដើមដូចគ្នា ដូច្នេះប្រសិទ្ធភាពគ្មានអ្វីខុសគ្នាឡើយ។

ហេតុអ្វីបានជាគេផលិតជ័រលុបធំដូចនេះ? ព្រោះមិនមែនគ្រប់គ្នាសុទ្ធតែមានតម្រូវការនោះទេ។ បើតាមប្រភពព័ត៌មានខាងផ្នែកអភិវឌ្ឍផលិតផលរបស់ Seed ដំបូងឡើយជាគំនិតជូនអំណោយ giveaway (ទម្រង់ផ្សព្វផ្សាយដើម្បីទាក់ទាញអតិថិជនថ្មីតាមរយៈការផ្តល់រង្វាន់)។ Seed មានគំរូជ័រលុបធំចំនួនពីរគឺ S-1000 (130 x 66 x 27 mm) និង S-JUMBO (160 x 75 x 27 mm) ដូច្នេះ​ហើយ​ពួក​គេ​បាន​សម្រេចចិត្តបង្កើតអ្វីមួយដែលធំជាងនេះ។

ដំបូង Radar S-10000 ត្រូវគេចាត់ទុកជាទំនិញផលិតតែម្តងប៉ុណ្ណោះ ដូចជារង្វាន់សម្រាប់ការប្រកួត “Eraser Quick Eraser Contest” ដែលប្រារព្ធឡើងក្នុងហាងធំរបស់ក្រុមហ៊ុន។ ទោះជាយ៉ាងណា រង្វាន់ទទួលបានប្រជាប្រិយភាព​យ៉ាង​ខ្លាំង រហូត​ដល់​ថ្នាក់ Seed សម្រេចចិត្តផលិតជា​ផលិត​ផល​ពាណិជ្ជកម្ម។

Radar S-10000 កំពុងត្រូវបានលក់នៅលើទីផ្សារជាមួយនឹងផលិតផលផ្សេងទៀតរបស់ក្រុមហ៊ុន។ រូបភាព៖ Oddity Central

ជ័រលុប S-10000 ផលិតបានមួយរយៈពេលមកហើយ ប៉ុន្តែថ្មីៗនេះវាល្បីយ៉ាងខ្លាំងលើបណ្តាញសង្គម បន្ទាប់ពីមានអ្នក​បង្ហោះ​​រូប​ភាព​​លើ Twitter ។

ជាក់ស្តែង ការផលិតជ័រលុបធំបែបនេះមិនមែនជាការងាយនោះទេ ប៉ុន្តែ Seed បានទទួលជោគជ័យក្នុងដំណើរការ​ផលិត ដើម្បី​ធានា​ថា S-10000 មិនអន់ជាងផលិតផលដែលមានទំហំតូចរបស់ Radar ។

ប្រភព៖ Oddity Central