សាមូរ៉ៃ Takeda Shingen ធ្លាប់ចាត់់ទុកបង្គន់ដូចជាការិយាល័យ

តើអ្នករាល់គ្នាមានទម្លាប់យកទូរស័ព្ទតាមពេលចូលបន្ទប់ទឹកដែរទេ? មួយរយៈពេលមុន មនុស្សជាច្រើនមានទម្លាប់​យក​កាសែត សៀវភៅរឿងចូលបង្គន់។ ព្រោះតែពួកគេគ្មានអ្វីធ្វើ ឬដោយសារបង្គន់​ជា​កន្លែង​ឯកជន មិនខ្លាច​ត្រូវអ្នកផ្សេងមើលឃើញ។ មិនថាមកពីមូលហេតុ​អ្វីក៏ដោយ តើអ្នកយល់ថាបង្គន់ជាកន្លែងពិសេសមួយដែរទេ?

មានសាមូរ៉ៃមួយរូបឈ្មោះថា Takeda Shingen ចាត់ទុកបង្គន់ដូចជាកន្លែងធ្វើការ។

ក្នុងសម័យសង្រ្គាមរដ្ឋជាអំឡុងពេលប្រយុទ្ធគ្នាយ៉ាងខ្លាំងក្លារវាងសាមូរ៉ៃទូទាំងប្រទេសជប៉ុន។ នៅសម័យកាលដែលចលាចលបែបនេះ Shingen ក៏ដូចជាសាមូរ៉ៃដទៃទៀត ចង់ប្រើអំណាចខ្លាំងក្លារបស់ខ្លួនដើម្បីបង្រួបបង្រួម​ជប៉ុន ប៉ុន្តែ​​ជា​​អកុសល​គាត់ទទួលមរណៈភាពដោយសារជំងឺ។ 

បង្គន់របស់លោកល្អប្រណិត របស់របរត្រូវបានរៀបចំយ៉ាងសមរម្យ និងទំនើបបំផុត។ ឥឡូវនេះយើងនឹងក្រឡេកមើលថាគាត់បានធ្វើអ្វីក្នុងបន្ទប់ទឹកបែបហ្នឹង។

មូលដ្ឋានរបស់លោក Shingen ស្ថិតនៅប្រទេស Kai ដែលសព្វថ្ងៃជាទីក្រុង Kofu ខេត្ត Yamanashi នៅទីនេះមានបង្គន់​ពិសេស​មួយ​សម្រាប់​លោក។

ជាដំបូងយើងមើលទៅលើទំហំបន្ទប់ មានទំហំប្រហែល ១១ ម៉ែត្រការ៉េ ដោយសព្វថ្ងៃបង្គន់ធម្មតាមានទំហំប្រហែល ១,៣ ម៉ែត្រ​ការ៉េ ដូច្នេះអ្នកអាចដឹងថាបន្ទប់មានទំហំធំប៉ុនណា។ 

ហេតុ​អ្វីបានជាធ្វើធំបែបនេះ? តាមពិតនេះជាវិធានការទប់ស្កាត់ការវាយប្រហាររបស់សត្រូវ។ ព្រោះបើដាក់បង្គន់នៅកណ្តាល​បន្ទប់​ធំ​ទូលាយ ទោះ​បី​ជា​មានលំពែង​ទម្លុះ​ជញ្ជាំង​ក៏​មិន​អាចបង្ករបួសបានដែរ។

ប៉ុន្តែខ្ញុំបែរជាគិតថា បើនៅក្នុងបន្ទប់ធំបែបនេះ ប្រាកដជាមានអារម្មណ៍ឯកោ​ណាស់។

ក្រៅពីនេះ លោកក៏បានប្រើបន្ទប់ទឹកតាមរបៀបមួយផ្សេង។ ចំពោះបន្ទប់ទឹកដែលមានទំហំធំបែបនេះ មនុស្សជាច្រើន​អាច​ចូល​ក្នុង​ពេល​តែ​មួយ។

ជា​ការ​ពិត​ណាស់ មនុស្សចង់ចូល ឬអត់ជារឿងមួយផ្សេង។

បន្ទប់ទឹកនេះមានច្រកចូលច្រើន និងមានច្រកចូលមួយទុកសម្រាប់ ninja ។ ដោយសារ ninja តែងតែធ្វើសកម្មភាពដោយសម្ងាត់ជានិច្ច ដូច្នេះពួកគេជៀសវាងត្រូវគេប្រទះឃើញតាមដែលអាចធ្វើទៅបាន មិនថាមិត្តរួមក្រុមក៏​ដោយ។ ដូច្នេះ​ហើយ ninja តែង​តែ​ចូល​បន្ទប់​ទឹកដោយសម្ងាត់ ដើម្បីពិភាក្សារឿងសម្ងាត់ជាមួយ Shingen ។

ប្រាកដជាមានអ្នកគិតថា “មិនខ្លាចធុំក្លិនទេឬ?”

តាមពិតបង្គន់នៅសម័យនោះត្រូវបានរចនាឡើងសម្រាប់ទុកលាមកក្នុងរណ្តៅធំមួយ ដូច្នេះមិនអាច​ជៀស​ផុត​ពីក្លិន​មិន​ល្អ​បាន​ឡើយ ប៉ុន្តែបង្គន់នេះប្រើបច្ចេកវិទ្យាថ្មីបំផុត។ ទឹកក្តៅដែលងូតរួចក្នុងអាងត្រូវគេប្រើជាទឹកសម្រាប់​លាង​បង្គន់។ ថ្វីត្បិតែមិនមានប្រព័ន្ធបង្ហូរទឹកដោយស្វ័យប្រវត្តិដូចសព្វថ្ងៃនេះ ប៉ុន្តែបន្ទាប់ពីប្រើបន្ទប់ទឹក​រួច លោក Shingen នឹងបន្លឺកណ្ដឹង ហើយអ្នកបម្រើដែលរង់ចាំនៅខាងក្រៅនឹងបង្ហូរទឹកដោយប្រើប្រព័ន្ធអនុវត្ត​ពី​ចម្ងាយ។

រហូតមកដល់សព្វថ្ងៃ នៅតាមតំបន់ជនបទជប៉ុន មានបន្ទប់ទឹកជាច្រើនគ្មានប្រព័ន្ធបង្ហូរទឹក ប៉ុន្តែអ្វីដែលគួរឱ្យភ្ញាក់ផ្អើលនោះគឺថាបង្គន់បង្ហូរទឹកត្រូវ​បាន​គេ​ប្រើ​ជាង ៤០០ ឆ្នាំមកហើយ។

ជាងនេះទៅទៀត ការការពារមិនអោយអ្នកដទៃមើលឃើញលាមកក៏សំខាន់ណាស់ដែរ។ ព្រោះមនុស្សសម័យមុន​ជឿ​ថា រាង​កាយ​​នឹង​​ទន់​ខ្សោយ​នៅ​ពេល​ត្រូវ​អ្នកដទៃមើលឃើញលាមក។ ដូច្នេះហើយ ពួកគេអោយត្រីគល់រាំង​សុីដើម្បីលាក់​បាំង​លាមក​របស់​ខ្លួន។

ក្រៅពីនេះ នៅតាមជ្រុងទាំង ៤ ក្នុងបន្ទប់ធំគេដាក់ធូបក្រអូប ដើម្បីធ្វើឱ្យបង្គន់របស់លោកមានក្លិនល្អ ដូច្នេះអាចចាត់ទុកជាកន្លែងសម្ងាត់ដែលមានផាសុកភាព។

លោក Shingen ធ្លាប់សម្រាកក្នុងបន្ទប់ទឹកនេះ ខណៈដែលកំពុងគ្រប់គ្រងប្រទេស ឬបង្កើតគំនិតយុទ្ធសាស្ត្រថ្មីៗ។ នៅ​ពេល​នោះ លោក Shingen ត្រូវគេចាត់ទុកថាបានយកឈ្នះស្ទើរតែគ្រប់សមរភូមិដែលគាត់ចូលរួម។ ដូច្នេះ​គាត់​ត្រូវ​បាន​ប្រជាជន​​ជឿ​​ទុក​​ចិត្ត ហើយ​​បាន​​ក្លាយ​​ជាអ្នកនាំមុខក្នុងចំណោមសាមូរ៉ៃដែលពូកែបំផុត។

ប្រហែលដោយសារតែមានបន្ទប់ទឹកបែបនេះ លោកបានក្លាយជា​មេ​ដឹក​នាំ​ដ៏​​ឆ្នើម​ម្នាក់។ អ្នកខ្លះនិយាយថា លោក​ធ្លាប់​ចូល​បន្ទប់​ទឹក​ជាង​កន្លះ​ថ្ងៃ។ ក្នុងសង្គមសព្វថ្ងៃ មិនសូវមានអ្នកទ្រាំនៅយូរក្នុងបន្ទប់ទឹកឡើយ។

ទោះជាយ៉ាងណា ប្រសិនបើម្ចាស់អាជីវកម្មអាចសាងសង់បង្គន់ដ៏ប្រណិតសម្រាប់ប្រើដូចជាការិយាល័យ ប្រហែលជាប្រសិទ្ធភាព​អាជីវកម្ម​របស់​ក្រុម​ហ៊ុន​អាច​នឹង​រីក​ចម្រើន​ក៏​ថា​បាន។

Kengo Abe