ស្រ្តីអ្នកទោសប្រហារជីវិតជប៉ុនស្លាប់ដោយសារស្លាក់អាហារ

ក្រសួងយុត្តិធម៌ជប៉ុនបានចេញសេចក្តីប្រកាសស្ត្រីអ្នកទោសប្រហារជីវិតម្នាក់ស្លាក់អាហារស្លាប់កាលពីថ្ងៃទី ១៤ ខែមករា ឆ្នាំ ២០២៣ កន្លង​ទៅ​នេះ។

ស្រ្តីអ្នកទោសប្រហារជីវិត Miyuki Ueta ។ រូបភាព៖ Mainichi

Kyodo បានរាយការណ៍ថា ស្រ្តីអ្នកទោសប្រហារជីវិតឈ្មោះ Miyuki Ueta អាយុ ៤៩​ ឆ្នាំដែលកំពុងត្រូវឃុំខ្លួននៅមណ្ឌល​មួយក្នុងខេត្ត Hiroshima ។ ក្រសួងយុត្តិធម៌បានបន្ថែមថា មូលហេតុនៃការស្លាប់របស់អ្នកទោសស្រី Ueta ត្រូវ​បាន​បញ្ជាក់​ដោយ​វេជ្ជបណ្ឌិត​នៅ​ខាង​ក្រៅពន្ធនាគារក្រោយពេលធ្វើកោសល្យវិច័យ។

បើតាម Nippon ករណីនេះបានកើតឡើងនៅវេលាម៉ោង ១៦ៈ២០ នាទី ថ្ងៃទី ១៤ ខែមករា (ម៉ោងក្នុងតំបន់)។ បន្ទាប់​​ពី​​ហូប និងថប់ដង្ហើម Ueta ធ្លាក់ក្នុងស្ថានភាពបាត់បង់ស្មារតី។ បុគ្គលិកពន្ធនាគារបានព្យាយាមយកអាហារ​​ចេញ​​ពី​​មាត់​​របស់ Ueta និងអនុវត្តវិធីសាស្រ្តមួយចំនួនទៀត ប៉ុន្តែអ្នកទោសរូបនេះត្រូវបានបញ្ជាក់ថាស្លាប់នៅ​​ម៉ោង ១៨ៈ៥៥ នាទី​​ថ្ងៃ​​ដដែល។

ស្រ្តីអ្នកទោសធ្លាប់ជាបុគ្គលិកក្នុងបារ ដែលត្រូវបានចោទប្រកាន់ពីបទសម្លាប់មនុស្សពីរនាក់នៅខេត្ត Tottori ភាគ​​ខាង​​លិច​​ប្រទេស​​ជប៉ុនកាលពីខែវិច្ឆិកា ឆ្នាំ ២០០៩ ។ ក្នុង​ករណី​ទាំង​ពីរ​នេះ Ueta បាន​បោក​បញ្ឆោត​ជន​រង​គ្រោះ​​ឱ្យ​​ប្រើ​ប្រាស់​គ្រឿងញៀន មុន​ពេលពន្លិចទឹក​សម្លាប់ជន​រង​គ្រោះ​ក្នុង​ទន្លេ ឬ​សមុទ្រ។

សេចក្តីសម្រេចកាត់ទោសប្រហារជីវិតចំពោះ Ueta ប្រកាសក្នុង ២០១៧ ។ យោងតាមច្បាប់របស់ជប៉ុន ការព្យួរកជាទម្រង់​​តែ​មួយ​គត់​ដែលអនុវត្តចំពោះអ្នកទោសប្រហារជីវិត។

ក្រោយពេលអ្នកទោស Ueta ស្លាប់ ជប៉ុននៅមានអ្នកទោសប្រហារជីវិតចំនួន ១០៥ នាក់ដែលកំពុងរង់ចាំថ្ងៃអនុវត្ត​ទោស។ នៅប្រទេសជប៉ុនភាគច្រើនអ្នកទោសត្រូវរង់ចាំរយៈពេលជាច្រើនឆ្នាំ ទើបដល់វេនអនុវត្តទោសប្រហារ​ជីវិត។

ក្នុងឆ្នាំ ២០២២ ជប៉ុនអនុវត្តទោសប្រហារជីវិតតែមួយប៉ុណ្ណោះ។ អ្នកទោស Tomohiro Kato ដែលជាអតីតបុគ្គលិកការិយាល័យអាយុ ៣៩ ឆ្នាំ ត្រូវកាត់ទោសប្រហារជីវិតដោយសារសម្លាប់មនុស្ស ៧ នាក់ និងធ្វើអោយរបួស ១០ នាក់នៅ​សង្កាត់ Akihabara ទីក្រុង​តូក្យូ​ក្នុង​ឆ្នាំ ២០០៨ ។

ប្រភព៖ Skydoor