អាមេរិក​បដិសេធ​ផលិតផល​ដែល​ផលិត​នៅ​ចិន ដូចដែលជប៉ុន​ធ្លាប់​រង​ការ​គាប​សង្កត់កាល​ពី​អតីត​កាល

ការប្រឈមមុខដាក់គ្នារវាងសហរដ្ឋអាមេរិក និងចិនកាន់តែតានតឹងខ្លាំងឡើង សហរដ្ឋអាមេរិកមិនត្រឹម​តែ​បដិសេធ​កុំព្យូទ័រ និង​ស្មាត​ហ្វូន​ដែលផលិតនៅប្រទេសចិនប៉ុណ្ណោះទេ រួមទាំងផ្នែកឧបករណ៍ និងគ្រឿងបន្លាស់អេឡិច​ត្រូនិក​ទៀត​ផង។

ជាមូលដ្ឋានដូចដែលសហរដ្ឋអាមេរិកធ្លាប់ធ្វើដាក់ជប៉ុនក្នុងឆ្នាំ ១៩៨៨ ។ ដូច្នេះតើយុត្តិធម៌នៅឯណា?

ខ្ញុំគិតថាគ្រប់គ្នាប្រហែលជានៅចាំ Huawei, ZTE និងក្រុមហ៊ុនផលិតរបស់ចិនត្រូវបណ្តាប្រទេសលោកខាង​លិច​គាប​សង្កាត់ ដែល​ភាគ​ច្រើន​ដោយ​រដ្ឋាភិបាលសហរដ្ឋអាមេរិក។

ក្រៅពីនេះ ការដែលក្រុមហ៊ុនផលិតកុំព្យូទ័រ DELL របស់អាមេរិកមានគោលបំណងកាត់បន្ថយការប្រើប្រាស់បន្ទះ​ឈីប​របស់​ចិន​មក​ត្រឹម​សូន្យនៅឆ្នាំ ២០២៤ បានបង្កឱ្យមានការភ្ញាក់ផ្អើល។ នៅឆ្នាំ ២០២៥ ក្រុមហ៊ុនដាក់គោល​ដៅ​​កាត់​បន្ថយ ៥០% បរិមាណ​ផលិត​ផល​ដែលផលិតនៅរោងចក្រចិន។

រឿងនេះផ្តើមចេញដោយពាក្យចចាមអារ៉ាមថា “បន្ទះឈីបរបស់ចិនអាចបណ្តាលឱ្យបែកធ្លាយព័ត៌មាន” ។ តើនេះជារឿងពិតដែរទេ?

ព្រោះតែខ្ញុំមិនដឹងថារឿង​នេះយ៉ាងណា ដូច្នេះខ្ញុំគិតថាប្រហែលបន្ទះឈីបដែលផលិតនៅចិនពិតជាគួរឱ្យសង្ស័យ ហើយក៏ប្រហែលនោះជាការបង្កាច់បង្ខូចរបស់សហរដ្ឋអាមេរិកផងដែរ។

ម៉្យាងវិញទៀត ខ្ញុំក៏ចង់សួរថា តើផលិតផលដែលផលិតនៅសហរដ្ឋអាមេរិក ពិតជាមានសុវត្ថិភាពដែរឬទេ?

តើអ្នកដឹងទេថាមានប្រព័ន្ធរារាំងទំនាក់ទំនងទិន្នន័យមានឈ្មោះថា Echelon ដែលកំពុងដំណើរនៅបណ្តាប្រទេសទាំង ៥ រួម​មាន​អង់​គ្លេស អូស្ត្រាលី កាណាដា នូវែលសេឡង់ និងភាគច្រើននៅសហរដ្ឋអាមេរិកដែរអត់?

រដ្ឋាភិបាលសហរដ្ឋអាមេរិកបានបដិសេធចំពោះវត្តមានរបស់ Echelon ដូច្នេះគ្មាននរណាម្នាក់សង្ស័យវត្តមានរបស់​វា​ទៀត​ឡើយ។

ខ្ញុំយល់ត្រូវបញ្ឈប់ឧក្រិដ្ឋកម្មលើពិភពលោក ប៉ុន្តែអ្នកដែលកំពុងរារាំងទំនាក់ទំនងទិន្នន័យនៅជុំវិញពិភពលោកដោយប្រព័ន្ធបែបនេះ ដោយសារគិតថា​មាន​ហានិភ័យ​បែកលេចធ្លាយព័ត៌មានពីបន្ទះឈីប ហើយផលិតផលដែលផលិតនៅប្រទេសចិនមិនគួរឱ្យជឿទុកចិត្ត។ ព្រោះតែអាមេរិក​ធ្លាប់​មាន​ការ​ចោទ​ប្រកាន់ជា​​ច្រើនដូច​​​នេះ​​កន្លង​មក។

សង្គ្រាមអុីរ៉ាក់បានផ្ទុះឡើងក្នុងឆ្នាំ ២០០៣ ដែលពេលនោះមានសហរដ្ឋអាមេរិក អង់គ្លេស អូស្រា្តលី និងប៉ូឡូញចូលរួមសង្រ្គាមដោយយកលេសថាអុីរ៉ាក់មានអាវុធប្រល័យលោក។ ទោះជាយ៉ាងណា នៅចុងសង្រ្គាមឆ្នាំ ២០១១ ពុំបាន​រក​ឃើញ​អាវុធ​ប្រល័យ​លោក​ឡើយ។ ដូច្នេះតើ​អ្នក​ណា​គួរ​ទទួល​ខុស​ត្រូវ​ចំពោះ​រឿង​នេះ?

ជាងនេះទៅទៀត ជប៉ុន​ក៏​ធ្លាប់​រង​ការខូចខាត​ជាច្រើន​ដែល​បង្កឡើង​ដោយ​សហរដ្ឋអាមេរិក​ផងដែរ។ បទប្បញ្ញត្តិជាពិសេស​​មួយ​​ហៅ​​ថា Super 301 ដែលអនុម័តដោយគណៈរដ្ឋមន្ត្រីសហរដ្ឋអាមេរិក សំដៅលើប្រទេស​ដែលកំពុង​រីក​ចម្រើន​​ខ្លាំង​​នា​​ពេល​​នោះ គឺប្រទេសជប៉ុន។

Semiconductor ជាសារធាតុដែលប្រើសម្រាប់ផលិតគ្រឿងបន្លាស់កុំព្យូទ័រ ឧបករណ៍អេឡិចត្រូនិក។ល។ នៅ​ពេល​នោះ Semiconductor របស់​ជប៉ុនត្រូវគេចាត់ទុកថាល្អជាងគេលើពិភពលោកទាំងតម្លៃ និងដំណើរការ។

ក្រៅពីនេះ ផលិតផលជប៉ុនដូចជាវាយនភណ្ឌ ដែក យានយន្ត និងទូរទស្សន៍ពណ៌ចាប់ផ្តើមលក់ដាច់ខ្លាំងនៅលើពិភព​លោក ដែល​ធ្វើ​ឱ្យ​​សមតុល្យ​​​ពាណិជ្ជកម្ម​​របស់​​សហរដ្ឋ​អាមេរិក​ត្រូវបំផ្លាញយ៉ាងធ្ងន់ធ្ងរ បណ្តាលឱ្យសេដ្ឋកិច្ចធ្លាក់ចុះ។

ជាលទ្ធផលនៅឆ្នាំ ១៩៧៤ បទប្បញ្ញត្តិ Super 301 ត្រូវបានអនុម័ត ហើយប្រទេសជប៉ុនធ្លាក់ក្នុងវិបត្តិសេដ្ឋកិច្ច។

វិស័យឧស្សាហកម្ម Semiconductor របស់ជប៉ុនមានចំនួន ៥០% នៃទីផ្សារពិភពលោកពេលនោះ បានបន្តធ្លាក់រហូត​មក​ដល់​សព្វ​ថ្ងៃ​ក្រោម ១០% ។ គេលើកឡើងថា នឹងធ្លាក់ចុះស្ទើរតែស្មើសូន្យក្នុងឆ្នាំ ២០៣០។

ដោយយកលេសថាជប៉ុនចាប់ផ្តើមសង្រ្គាមពាណិជ្ជកម្មមិនស្មើភាព បទប្បញ្ញត្តិនេះត្រូវបានអនុម័ត ប៉ុន្តែមិនមានមូលដ្ឋានណាមួយសម្រាប់បញ្ជាក់ការចោទប្រកាន់នោះទេ។

បន្ទាប់ពីគាបសង្កត់ជប៉ុន ឥឡូវនេះសហរដ្ឋ​អាមេរិក​ក៏​ចាប់​ផ្ដើមគាបសង្កត់វិស័យឧស្សាហកម្មចិនដែលរីក​ចម្រើន។

ការបែកធ្លាយព័ត៌មានដោយសារតែបន្ទះឈីបដែលផលិតនៅចិន ធ្លាប់ត្រូវគេលើកឡើងកាលពី ១០ ឆ្នាំមុន។

ខណៈដែលការពិតមិនទាន់បានបញ្ជាក់ ក្រុមហ៊ុនផលិតត្រូវគោរពតាមបំណងរបស់រដ្ឋាភិបាលសហរដ្ឋអាមេរិក។ គ្រប់​គ្នា​ពេល​​ឮ​​ការ​​ចោទ​​​ប្រកាន់​​​នេះ​​សុទ្ធ​តែ​សន្និដ្ឋាន​ថា​ចិន​អាក្រក់ខ្លាំង។

បើមិនមានភ័ស្តុតាង យើងមិនអាចនិយាយបានថា ចិនល្អ ឬអាក្រក់នោះទេ ប៉ុន្តែយើងមានប្រវត្តិ និងភស្តុតាងគ្រប់​គ្រាន់ ដើម្បី​​សន្និដ្ឋាន​​ថា​មិន​មាន​យុត្តិធម៌​ពី​ភាគី​សហរដ្ឋ​​អាមេរិក​ឡើយ។

មានសុភាសិតជប៉ុនមួយបកប្រែថា “ដែកគោលដែលលេចឡើង ញញួរ​នឹងវាយចុះ” ។

មាន​ន័យ​ថា​ប្រសិន​បើ​អ្នក​លេចធ្លោ ​អ្នក​នឹង​ត្រូវ​បង្ខូច​ឈ្មោះ​ និងការ​វាយ​ប្រហារ​ពី​មនុស្ស​ជុំវិញ​ខ្លួន​។

រឿងពិតមិនមាននៅលើព័ត៌មាន​តាម​ទូរទស្សន៍ ឬអុីនធឺណេតឡើយ។

ខ្ញុំ​គិត​ថា​យើងកំពុងស្ថិតក្នុងសម័យដែលត្រូវសង្កេតមើលដោយភ្នែករបស់ខ្លួន ពិចារណាថាអ្នកណាទទួលបានប្រយោជន៍ ហើយ​អ្នក​ណា​ធ្វើ​ត្រូវ​តាម​ទស្សនៈ​ផ្ទាល់​របស់​ខ្លួន។

Kengo Abe