ព្រឹត្តិការណ៍ដេញថ្លៃត្រីធូណាខៀវទម្ងន់ ២១២ គីឡូក្រាមក្នុងតម្លៃ ២៧៥,០០០ ដុល្លារ

យោងតាមសារព័ត៌មាន Kyodo News កាលពីម្សិលមិញ ថ្ងៃទី ៥ ខែមករា ព្រឹត្តិការណ៍ដេញថ្លៃដើមឆ្នាំនៅផ្សារត្រី Toyosu ត្រូវ​បាន​រៀបចំធ្វើឡើងវិញ បន្ទាប់ពីបានផ្អាកអស់រយៈពេល ៣ ឆ្នាំ ដោយសារជំងឺរាតត្បាតកូវីដ ១៩ ។ 

ត្រីធូណាខៀវមានទម្ងន់ ២១២ គីឡូក្រាម ដែលគេចាប់បាននៅតំបន់សមុទ្រ Oma ភាគខាងជើងខេត្ត Aomori ។ ហើយ​ត្រី​ធូណា​ខៀវ​នេះ​គេ​ចាត់​ទុក​ជា “ពេជ្រខ្មៅ” ដោយសារតែមានតម្លៃខ្ពស់។

បើតាមអ្នកនាំពាក្យរបស់ Onodera ក្រុមហ៊ុនលក់អាហារសមុទ្រ Yamayuki បានសហការជាមួយប្រតិបត្តិករខ្សែសង្វាក់​ហាង​ស៊ូស៊ី​ដែល​មាន​ផ្កាយ Michelin នៃ Onodera Group បានយកឈ្នះការដេញថ្លៃនេះ។

ត្រីធូណានឹងបែងចែកជាចំណែកៗ ដើម្បីបម្រើជាអាហារនៅភោជនីយដ្ឋាន Onodera និងតំបន់ផ្សារទំនើប Omotesando ទីក្រុង​តូក្យូ។

រូបភាព៖ Kyodo

សារព័ត៌មាន Kyodo News បានដកស្រង់សម្តីលោក Yukitaka Yamaguchi ដែលជាប្រធានក្រុមហ៊ុន Yamayuki ថា “ខ្ញុំចង់បង្កើត​ព័ត៌មាន​វិជ្ជមាន​មួយ​ចំនួន នៅពេលដែលឥទ្ធិពលនៃជំងឺរាតត្បាតកូវីដ ១៩ ថយចុះបណ្តើរៗ” ។

ទន្ទឹមនឹងនេះ លោក Akifumi Sakagami ជាមេចុងភៅរបស់ Ginza Onodera បានចែករំលែកថា “ខ្ញុំចង់អរគុណអ្នក​គ្រប់​គ្នា​ដែលបាននាំយកត្រីធូណាពិសេសនេះមក អ្នកបរិភោគប្រាកដជាពេញចិត្ត” ។

តម្លៃដេញថ្លៃខាងលើជាការបង្ហាញថាជប៉ុនកំពុងតែដំណើរការឡើងវិញ។ ទោះជាយ៉ាងណា តម្លៃនៅឆ្នាំនេះនៅតែទាប​ជាង​កំណត់​ត្រា​ ២,៥ លានដុល្លារនៅឆ្នាំ ២០១៩ ដោយម្ចាស់ហាងស៊ូស៊ី Kiyoshi Kimura ។

នៅជប៉ុនការដេញថ្លៃដើមឆ្នាំតែងតែខ្ពស់ជាងធម្មតា ដោយសារអ្នកដេញថ្លៃចង់ឆ្លៀតឳកាសនេះអបអរឆ្នាំថ្មី និងផ្សព្វ​ផ្សាយ​ម៉ាក​យី​ហោ។

ប្រភព៖ Skydoor