ជប៉ុនផ្តល់ជំនួយផ្នែកហិរញ្ញវត្ថុដើម្បីលើកទឹកចិត្តប្រជាជននៅទីប្រជុំជនផ្លាស់ទៅតំបន់ជាយក្រុង ឬជនបទ

ជាក់ស្តែង រដ្ឋាភិបាលផ្តល់ប្រាក់ ១ លានយ៉េនសម្រាប់កុមារម្នាក់ក្នុងគ្រួសារនីមួយៗដែលរស់នៅទីក្រុងតូក្យូ ដើម្បីលើក​ទឹក​ចិត្ត​ពួក​គេ​ឱ្យផ្លាស់ទៅរស់នៅតំបន់ជាយក្រុង និងទីជនបទ។ 

ជាការពិតណាស់ កញ្ចប់ជំនួយហិរញ្ញវត្ថុនេះត្រូវបានដាក់ឱ្យដំណើរការក្នុងឆ្នាំ ២០១៩ ដើម្បីលើកទឹកចិត្តអ្នកដែលចិញ្ចឹម​កូន​តូច​ឱ្យ​ផ្លាស់​ទៅ​តំបន់ដែលមានអត្រាកំណើតធ្លាក់ចុះ និងចំនួនប្រជាជនចាស់។ បុគ្គលដែលទទួលជំនួយ​​គ្រាន់​តែ​បំពេញ​លក្ខខណ្ឌ​មួយ​ក្នុងចំណោមលក្ខខណ្ឌទាំងបីគឺ៖ ធ្វើការនៅក្រុមហ៊ុនខ្នាតតូច ឬមធ្យមក្នុងតំបន់​ដែល​ពួក​គេ​ផ្លាស់​ទៅ បន្តការងារពីមុនដោយធ្វើការពីចម្ងាយ ឬចាប់ផ្តើមអាជីវកម្មក្នុងតំបន់ដែលស្នាក់នៅថ្មី។

តារាងបញ្ជីតំបន់ដែលមានលក្ខណៈគ្រប់គ្រាន់ក្នុងការទទួលជំនួយ (ជាភាសាជប៉ុន)

កម្មវិធីនេះបង្កើនជំនួយផ្នែកហិរញ្ញវត្ថុទៅតាមចំនួនកុមារក្នុងមួយគ្រួសារ។ បច្ចុប្បន្ននេះ ប្រាក់ឧបត្ថម្ភបន្ថែមមានចំនួន ៣០ ម៉ឺនយ៉េនសម្រាប់ម្នាក់។ យោងតាមបទ​ប្បញ្ញត្តិ​ថ្មី​ដែលចាប់ពី​ខែ​មេសាខាងមុខ គូស្វាមីភរិយាដែលមានកូន ២ នាក់នឹងទទួលបានរហូតទៅដល់ ៣ លានយ៉េន ដោយមិនរាប់បញ្ចូលការត្រួតពិនិត្យប្រាក់ចំណូលឡើយ។ អ្នកដាក់ពាក្យសុំជំនួយត្រូវតម្រូវឱ្យទៅកាន់អាជ្ញាធរមូលដ្ឋានថ្មីរបស់ពួកគេរយៈពេល ៣ ខែ ដល់ ១ ឆ្នាំបន្ទាប់​ពីផ្លាស់ទៅ ហើយប្រកាសគោលបំណងរស់នៅទីនោះយ៉ាងហោចណាស់ ៥ ឆ្នាំ។ ពួកគេនឹងត្រូវស្នើឱ្យប្រគល់ប្រាក់​វិញ ប្រសិន​បើ​ពួក​គេចាកចេញមិនដល់ ៥ ឆ្នាំ។

នៅជប៉ុនមានប្រមាណ ១៣០០ ក្រុងផ្តល់ជំនួយឧបត្ថម្ភនេះ ដែលស្មើនឹង ៨០% នៃចំនួនក្រុងសរុបក្នុងប្រទេស​ជប៉ុន។ យុទ្ធសាស្ត្រ​គ្រប់​ជ្រុងជ្រោយ​សម្រាប់​ផែនការ​ខាងលើ​ត្រូវ​បាន​រដ្ឋាភិបាល​អនុម័ត​ក្នុង​កិច្ចប្រជុំ​គណៈរដ្ឋមន្ត្រី ដែល​ខ្លឹម​សារ​រួម​មាន​ផែន​ការ ៥ ឆ្នាំចាប់ពីឆ្នាំសារពើពន្ធ ២០២៣ ដើម្បីបង្កើនចំនួនប្រជាជនរស់នៅទីប្រជុំជន​តូក្យូ​​ផ្លាស់​​ទៅ​​តំបន់​ជន​បទ​កើនឡើង ១ ម៉ឺននាក់ក្នុងឆ្នាំសារពើពន្ធ ២០២៧ ។

ទន្ទឹម​នឹង​នេះ រដ្ឋាភិបាល​នឹងជំរុញការអភិវឌ្ឍន៍បរិយាកាសរស់នៅតំបន់ជាយក្រុង និងជនបទ ដើម្បីធ្វើឱ្យជីវភាព​ថ្មី​របស់​ប្រជាពល​រដ្ឋ​កាន់​តែ​ងាយ​ស្រួល​ជាង​មុន។

គម្រោងនេះរួមទាំងជំនួយសម្រាប់កម្មវិធីរបស់អាជ្ញាធរមូលដ្ឋានដែលទាក់ទងនឹងការប្រើប្រាស់បច្ចេក​វិទ្យា​ឌីជីថល​ដូច​ជា​រថយន្ត​ក្រុង​បើក​ដោយ​ស្វ័យ​ប្រវត្តិ ឬ​ការ​ថែ​ទាំ​សុខភាពពី​ចម្ងាយ។

Sacchan