ហេតុអ្វីអ្នកអាចនឹងផ្តាសាយពេលដេកដាក់ខ្លួនទាំងមូលក្រោម Kotatsu ដែលជាតុកំដៅបែបជប៉ុន?

Kotatsu (តុកម្តៅបែបជប៉ុន) ជាផ្នែកមួយនៃវប្បធម៌ធ្វើឲ្យ​កក់ក្តៅនារដូវរងានៅជប៉ុន។ Kotatsu រួមមានតុ និងម៉ាស៊ីនកំដៅខាងក្រោម ដោយ​គ្រប​ភួយ​ពី​លើ។ ពេលរដូវរងាមកដល់ អង្គុយជិត Kotatsu ហូបក្រូចឃ្វិចជាអ្វីដែល​គ្រប់​គ្នា​ប្រាថ្នា។

ទោះជាយ៉ាងណា ប្រជាជនជប៉ុនយល់ថាដេកលក់ក្រោម Kotatsu នឹងធ្វើឲ្យ​អ្នកផ្តាសាយ។ តើអាចពន្យល់តាមបែប​វិទ្យាសាស្ត្រចំពោះគំនិតនេះដែរទេ?

តាមទស្សនៈវេជ្ជសាស្រ្ត វេជ្ជបណ្ឌិត Yumie Ichihara បានបញ្ចេញមតិចំពោះបញ្ហានេះ។

បច្ចុប្បន្ននេះមិនទាន់មានការស្រាវជ្រាវផ្នែកវេជ្ជសាស្រ្តទាក់ទងនឹង Kotatsu និងជំងឺផ្តាសាយនោះទេ ប៉ុន្តែយ៉ាង​ណា​ខ្ញុំ​គិត​ថា​អាច​នឹង​មាន​ទំនាក់​ទំនង​គ្នា។ គេងក្រោម Kotatsu នឹង​ធ្វើឲ្យ​អ្នក​ខ្សោះ​ជាតិ​ទឹក​បណ្តាលឲ្យ​មាន​បញ្ហា​សុខ​ភាព​​ដូច​​ជា ស្ងួត​​ច្រមុះ ស្ងួត​​បំពង់​ក ​ដែល​ជា​​មូល​ហេតុ​​បង្កជំងឺ​ផ្តាសាយ។

វេជ្ជបណ្ឌិតក៏បានពន្យល់អំពីប្រព័ន្ធជួយឲ្យ​ត្រជាក់ធម្មជាតិរបស់រាងកាយផងដែរ។ នៅពេលដែលសីតុណ្ហភាពរាងកាយកើនឡើង អ្នកនឹងបែកញើសដោយស្វ័យប្រវត្តិដើម្បីកាត់បន្ថយកំដៅ។ ប៉ុន្តែប្រសិនបើអ្នកកំដៅខ្លួនក្រោម Kotatsu រយៈ​ពេល​យូរ សីតុណ្ហភាពរាងកាយរបស់អ្នកមិនអាចកាត់បន្ថយបានទេ មិនថាអ្នកបែកញើសក៏ដោយ។ ចំណុច​នេះ​អាចរំខានដល់ប្រព័ន្ធសរសៃប្រសាទរបស់អ្នក។

ទាក់ទងនឹង Kotatsu វេជ្ជបណ្ឌិតបានពន្យល់បន្ថែមថា៖ “តើល្អទេដែលអ្នកគ្រាន់តែរក្សាកំដៅជើង? ហើយទុកឲ្យ​រាង​កាយ​ផ្នែក​ខាង​លើ​ត្រជាក់?”

“ពិតណាស់ រក្សាឲ្យ​ជើងកក់ក្តៅអាចធ្វើឲ្យ​រាងកាយទាំងមូលកក់ក្តៅ ប៉ុន្តែអ្នកដាក់តែជើងក្រោម Kotatsu បានហើយ។ នៅពេលដែលអ្នកដេក ហើយដាក់ខ្លួនទាំងមូលក្រោម Kotatsu សីតុណ្ហភាពនឹងកើនឡើង ហើយ​មិន​ល្អ​សម្រាប់​​សុខ​ភាព​​ឡើយ” ។

សុរបទៅ ក្រោយពេលបានពន្យល់ពីរបៀបប្រើ Kotatsu ដែលត្រឹមត្រូវគឺអង្គុយ គ្រាន់តែដាក់ជើងក្នុងភួយប៉ុណ្ណោះ។ ថ្វីត្បិតតែ អង្គុយដាក់ជើងក្រោម Kotatsu យើងងាយនឹងងងុយគេង ប៉ុន្តែត្រូវដឹងថាដេកក្រោម Kotatsu អាចនឹងធ្វើឲ្យ​អ្នក​ផ្តាសាយ។ រដូវ​រងា​ត្រជាក់​ណាស់​ទៅ​ហើយ ​ផ្តា​សាយ​ទៀតកាន់តែពិបាក។

Sacchan