វីដេអូចោលកន្ទុយបារីរបស់អភិបាលក្រុងត្រូវគេចែករំលែកលើបណ្តាញសង្គម

លោក Tanaka Akira អាយុ ៦១ ឆ្នាំជាអភិបាលក្រុង Takayama ខេត្ត Gifu ប្រទេសជប៉ុន បាន​​បោះ​ចោល​កន្ទុយ​បារី​​ផ្តេស​​ផ្តាស និងត្រូវបានប្រទះឃើញ​តាម​រយៈ​វីដេអូ​​ចែករំលែកលើបណ្តាញសង្គម។ ទីក្រុង Takayama ត្រូវបើកសន្និសីទ​កា​សែត​​សុំ​​ទោស​​ជា​​បន្ទាន់។

ក្នុងវីដេអូមួយឃើញថា អភិបាលក្រុងកំពុងជក់បារីនៅខាងក្រៅផ្ទះរបស់លោក បន្ទាប់មកបោះចោលកន្ទុយបារីចូលប្រឡាយតាមដងផ្លូវ។ វីដេអូនេះថតបាននៅចន្លោះថ្ងៃទី ១៣ និង ១៤ ខែវិច្ឆិកា ដែលត្រូវបានបង្ហោះលើបណ្តាញ​សង្គម TikTok នាដើមខែធ្នូ ហើយបង្កឱ្យមានមតិចម្រូងចម្រាសជាច្រើន។ មនុស្សគ្រប់គ្នាយល់ថា ទម្លាប់​ចោល​កន្ទុយ​បារី​ផ្តេស​ផ្តាស​ធ្វើអោយបាត់បង់​អនាម័យ​នៅទីសាធារណៈ និងកាន់តែអាក្រក់ជាងនេះគឺបង្កគ្រោះ​ថ្នាក់​អគ្គិភ័យ។

អភិបាលក្រុងលោក Tanaka បាននិយាយថា “ក្នុងនាមជាអភិបាលក្រុង បែរជាបោះបោលកន្ទុយបារីរបស់ខ្លួនផ្តេស​ផ្តាស ខ្ញុំ​ពិត​ជា​មាន​ការសោកស្ដាយយ៉ាងខ្លាំងដែលធ្វើអោយអ្នករាល់គ្នាបាត់បង់ជំនឿចិត្តលើអភិបាលក្រុង និង​រដ្ឋាភិបាល​ទី​ក្រុង” ។

JAPO