អស្ចារ្យណាស់!!! ពិធីបុណ្យរាប់ថយក្រោយទទួលឆ្នាំថ្មី ២០២៣ នៅ Universal Osaka

ថ្ងៃពុធ 21/12/2022 | 6:00 ព្រឹក

Universal Studios Japan នឹងរៀបចំកម្មវិធីពិសេស NO LIMIT! カウントダウン2023 (គ្មានដែនកំណត់! ពិធីបុណ្យរាប់ថយក្រោយទទួលឆ្នាំថ្មី ២០២៣) នៅម៉ោង ១៩ៈ០០ ថ្ងៃទី ៣១ ខែធ្នូ ដល់ម៉ោង ២១ៈ០០ ថ្ងៃទី ១ ខែមករា។

នៅទីនេះ អ្នកអាចរីករាយនឹងការសម្តែងលើឆាកយ៉ាងសប្បាយអ៊ូអរ ពិសេសប្លែកជាមួយនឹង Minion, Super Mario តួអង្គ Disney ឬកំពូលវីរបុរសផ្សេងទៀត។ កាន់តែអស្ចារ្យជាងនេះទៅទៀតគឺព្រឹត្តិការណ៍បាញ់កាំជ្រួចទទួលឆ្នាំថ្មី។

ក្រៅពីនេះ អ្នកក៏អាចមកមើលដើមគ្រីស្មាស់ដែលកំពុងរក្សាកំណត់ត្រាពិភពលោកហ្គីណេស “ដើមគ្រីស្មាស់សិប្បនិម្មិតដែលមានអំពូលច្រើនជាងគេ” ដោយត្រូវបានប្រកាសនៅថ្ងៃទី ១០ ខែវិច្ឆិកាឆ្នាំនេះ។

ដើមគ្រីស្មាស់ដែលមានកម្ពស់ជាង ៣០ ម៉ែត្រត្រូវបានតុបតែងភ្លើងប្រមាណ ៦១ ម៉ឺនអំពូល ដោយបំបែកកំណត់ត្រាមុននោះរបស់វាក្នុងឆ្នាំ ២០១៩ មានប្រហែល ៥៩ ម៉ឺនអំពូល។ ពិធីបើកសម្ភោធដើមគ្រីស្មាស់ និងព្រឹត្តិការណ៍រដូវរងាផ្សេងទៀតនឹងប្រព្រឹត្តទៅរហូតដល់ថ្ងៃទី ៩ ខែមករា ឆ្នាំ ២០២៣ ។