ព្រិលធ្លាក់ខ្លាំងបណ្តាលឱ្យរថយន្តរាប់រយគ្រឿងកកស្ទះលើផ្លូវ​ល្បឿន​លឿន

នៅព្រឹកថ្ងៃអង្គារនេះព្រិលធ្លាក់ខ្លាំងបណ្តាលឱ្យយានជំនិះរាប់រយគ្រឿងជាប់គាំងលើផ្លូវល្បឿនលឿន​ដែលឆ្លងកាត់​ទី​ក្រុង Kashiwazaki ខេត្ត Niigata ក្បែរ​​ឆ្នេរសមុទ្រជប៉ុន។

វេលាម៉ោង ១០ ព្រឹក​ថ្ងៃ​អង្គារ ព្រិលបានបង្កឱ្យកកស្ទះចរាចរណ៍ចម្ងាយ ២០ គីឡូម៉ែត្រ​លើ​ផ្លូវ​ជាតិ​លេខ ៨ ។

ក្រុមមន្ត្រីបានអោយដឹងថា រថយន្តប្រមាណ ៨០០ គ្រឿងជាប់គាំងក្នុងតំបន់នេះនៅម៉ោង ១ ព្រឹក យ៉ាងណាចំនួននេះ​កាត់​បន្ថយ​សល់​ប្រហែល ៣០០ គ្រឿង ក្រោយ​ពេលសកម្មភាពសម្អាតព្រិលដំណើរការ។

ក្រុមជួយសង្គ្រោះបានបែងចែកអាហារ ទឹក និងសម្ភារៈចាំបាច់ដល់អ្នកបើកបរ។

នៅទីក្រុង Nagaoka ជិត​នោះ យានជំនិះក៏ជាប់គាំងលើបណ្តោយផ្លូវចម្ងាយ ២០ គីឡូម៉ែត្រផងដែរ។

ទន្ទឹមនឹងនេះ ក្រុមហ៊ុនអគ្គិសនី Tohoku Electric Power Network បានអោយដឹងថា ប្រមាណ ២១.០០០ គ្រួសារនៅ​ខេត្ត Niigata គ្មាន​ភ្លើង​ប្រើ​នៅ​ម៉ោង ១០ ព្រឹកថ្ងៃដដែល។

ក្រុមហ៊ុនបានអោយដឹងថា តំបន់មួយចំនួននឹងមានភ្លើងឡើងវិញនាថ្ងៃអង្គារនេះ ចំណែកតំបន់ផ្សេងទៀតមិនច្បាស់​ថា​ពេល​ណា​មាន​ភ្លើង​វិញ​ឡើយ។

ប្រភព៖ NHK