បន្ទប់ទឹកកញ្ចក់ថ្លាពិតជាមានសុវត្ថិភាពដូចដែលអ្នកគិតទេ?

លើកមុន JAPO ធ្លាប់ណែនាំពីបន្ទប់ទឹកកញ្ចក់ថ្លានៅ Shibuya អោយអ្នករាល់គ្នាស្គាល់។ នេះជាគំនិតសាងសង់បង្គន់ជួយការពារសុវត្ថិភាព ជា​ពិសេស​សម្រាប់​ស្រ្តី។ នៅពេលដែលបន្ទប់ទឹកគ្មានមនុស្ស បង្គន់មើលទៅកញ្ចក់ថ្លា ដែលមានន័យថាមនុស្ស​នៅ​ក្រៅ​អាច​មើលទៅក្នុង និងផ្ទុយមកវិញ។ ប៉ុន្តែពេលមានអ្នកណាម្នាក់ប្រើបន្ទប់ទឹក ហើយ​ចាក់​សោនោះនៅក្រៅ​មិន​អាច​មើលឃើញខាងក្នុងទៀតទេ។ ដោយផ្អែកលើប្រព័ន្ធនេះ មនុស្សគ្រប់គ្នាអាចដឹងថាមានអ្នកកំពុងប្រើបង្គន់​។

មើលវីដេអូពីនាទី ០ៈ១៨ ដល់ ១ៈ០៩

ប៉ុន្តែថ្មីៗនេះ YouTuber ជនជាតិជប៉ុនម្នាក់បានរកឃើញ “ចំណុចខ្វះខាត” របស់បន្ទប់ទឹកនេះ។

ក្នុងវីដេអូនេះ Youtuber បានបង្ហាញអោយឃើញថា ទោះបីជាចាក់សោរទ្វារក៏ខាងក្រៅនៅតែអាចមើលឃើញស្រអាប់​ដដែល មិន​មែន​មិន​ឃើញអ្វីទាំងអស់ដូចផ្សាយពាណិជ្ជកម្មនោះទេ។

ស្ថានភាពបែបនេះពិតជាមានគ្រោះថ្នាក់ខ្លាំងណាស់ ព្រោះបើដឹងថាខាងក្នុងជាមនុស្សស្រីដោយសារកញ្ចក់ថ្លារបស់បង្គន់ ព្រាននារីអាចនឹងធ្វើសកម្មភាព ហើយរឿងអាក្រក់អាចកើតឡើង។

អ្នកគ្រប់គ្រងឧទ្យាននៅ Shibuya បានអោយដឹងថា “មូលហេតុ​មិន​ទាន់​ច្បាស់​នៅ​ឡើយ​ទេ ប៉ុន្តែប្រហែលដោយ​សារ​អាកាស​ធាតុត្រជាក់ប៉ះពាល់ដល់ល្បឿនអគ្គិសនី។ រឿងស្រដៀងគ្នានេះធ្លាប់កើតឡើងកាលពីឆ្នាំមុន ដូច្នេះ​យើង​​សាក​ល្បង​ធ្វើ​​ឱ្យ​​បង្គន់​មាន​សភាព​ស្រអាប់​គ្រប់ពេលជាជាងថ្លា” ។

មនុស្សជាច្រើនបានបញ្ជាក់ថា បង្គន់មានសភាពស្រអាប់ ប៉ុន្តែពេលខ្លះថ្លាប៉ុន្មានវិនាទីដែរ។ បច្ចុប្បន្នមិនមានផ្លាក​សញ្ញា​ផ្អាក​ប្រើ​ប្រាស់​នោះ​ទេ ហើយ​ជួន​កាល​នៅ​តែ​មាន​អ្នក​ចូល ដូច្នេះអ្នកគួរតែយកចិត្តទុកដាក់ចំពោះបញ្ហានេះ។

Sacchan