ខ្ពស់មិនមែនជាកំហុសនោះទេ “នារីជនជាតិជប៉ុនកម្ពស់ ១៧០ សង់ទីម៉ែត្រ” ម្នាក់រៀបរាប់រឿងក្នុងចិត្ត

នៅជប៉ុនអ្នកដែលមានកម្ពស់ល្អតែងតែទទួលបានការសរសើរដូចជា “ដូចតារាម៉ូដែល” ឬ “ទាន់សម័យណាស់” ប៉ុន្តែ​មិន​មែន​គ្រប់​យ៉ាងសុទ្ធតែល្អនោះទេ។ ជាពិសេសសម្រាប់ស្រ្តី ខ្ពស់ពេកអាចជាបញ្ហាមួយដែរ។ យោងតាមការស្ទង់​មតិ​សុខ​ភាព និង​អាហារូបត្ថម្ភជាតិនៃក្រសួងសុខាភិបាល ការងារ និងសុខុមាលភាព (២០១៨) កម្ពស់ជាមធ្យម​របស់​នារី​វ័យ ២០ ឆ្នាំគឺ ១៥៨,៧ សង់ទីម៉ែត្រ វ័យ ៣០ ឆ្នាំគឺ ១៥៨, ៣ សង់ទីម៉ែត្រ និងក្នុងវ័យ ៤០ ឆ្នាំគឺ ១៥៨,៧ សង់ទីម៉ែត្រ។

នារីជនជាតិជប៉ុនម្នាក់ដែលមានអាយុ ៣០ ឆ្នាំកម្ពស់ ១៧៥ សង់ទីម៉ែត្រ។ នាងខ្ពស់តាំងពីកំណើត ព្រោះកាលនៅរៀននាង​មាន​កម្ពស់ ១៦១ សង់ទីម៉ែត្រទៅហើយ។ ថ្វីត្បិតតែមនុស្សជាច្រើនគិតថា ខ្ពស់អញ្ចឹងជួយឱ្យនាងមានរូបរាងស្អាត និងធ្វើឱ្យមនុស្សជាច្រើនច្រណែន ប៉ុន្តែផ្ទុយទៅវិញ កម្ពស់របស់នាងបានធ្វើឱ្យនាងអាក់អន់ស្រពន់ចិត្តណាស់។

“កាលនៅរៀនវិទ្យាល័យ ខ្ញុំតែងតែត្រូវគេចាត់ទុកថាជាមនុស្សធំ។ ខ្ញុំយល់ថាជាការរំខានខ្លាំងណាស់ ម្យ៉ាងវិញទៀតទំហំជើងរបស់ខ្ញុំប្រហែល ២៦-២៧ សង់ទីម៉ែត្រ មិនមានទំហំស្បែកជើងសម្រាប់ស្រ្តីទេ ដូច្នេះខ្ញុំត្រូវពាក់ស្បែកជើងប៉ាតារបស់បុរស។

ពិតជាល្អខ្លាំងណាស់បើអ្នកខ្ពស់ដូចជាខ្ញុំចាប់អារម្មណ៍លើបាល់ទះ បាល់បោះ ឬរាំរបាំបាឡេ ព្រោះខ្ញុំអាចប្រើប្រាស់​កម្ពស់​របស់​ខ្លួន ប៉ុន្តែខ្ញុំមិនមែនជាមនុស្សពូកែកីឡាឡើយ។ នៅពេលចូលសកលវិទ្យាល័យ មនុស្សជាច្រើនលើក​ទឹក​ចិត្ត​ខ្ញុំ​ឱ្យសាកល្បង ព្រោះបើមិនដូច្នេះខ្ជះខ្ជាយណាស់។ ខ្ញុំមិនសប្បាយចិត្តទេពេលគិតរឿង ពួកគេចាត់ទុក​អ្នក​ខ្ពស់​មិន​​​ចេះ​​លេង​​កីឡា​​ថា​​គ្មាន​​តម្លៃ” ។

អារម្មណ៍ចង់ពាក់ស្បែកជើងកែង

បុគ្គលិកស្រីអាយុ ២០ ឆ្នាំមានកម្ពស់ ១៧១ សង់ទីម៉ែត្របានអោយដឹងថា នាងចូលចិត្តស្បែកជើងកែងខ្ពស់ទាន់សម័យ ប៉ុន្តែមិនអាចពាក់បានដោយសារកម្ពស់របស់ខ្លួន។

“ខ្ញុំតែងតែចង់ទាបបន្តិច ដូច្នេះខ្ញុំអាចឈរស្មើមិត្តភក្តិរបស់ខ្លួន។ ខ្ញុំស្អប់ត្រូវគេចំអកថាមាឌធំ យូរណាស់​មក​ហើយ​ខ្ញុំ​មិន​បាន​ពាក់​ស្បែក​ជើង​កែង។ ស្បែកជើងកែងដែលខ្ពស់បំផុតរបស់ខ្ញុំប្រហែល ៣ សង់ទីម៉ែត្រប៉ុណ្ណោះ។ បុរស​ជាច្រើនចូលចិត្តនារីទាប យ៉ាងហោចណាស់ទាបជាងបុរសនោះ ដូច្នេះហើយខ្ញុំពិតជាច្រណែននឹងមនុស្សស្រីដែល​អាច​ពាក់​ស្បែក​ជើង​កែង​ចោត​ដោយមិនចាំបាច់ខ្វល់ខ្វាយអ្វីទាំងអស់ណាស់” ។

ត្រូវគេនិយាយថា “ឬក” ព្រោះតែខ្ពស់

នារីកម្ពស់ ១៧៧ សង់ទីម៉ែត្រម្នាក់បានចែករំលែកបទពិសោធន៍ការរស់នៅមិនបានសុខដោយសារកម្ពស់របស់នាង។

“កាលនៅក្មេង ខ្ញុំជាប្រភេទមនុស្សមានភាពខ្មាស់អៀនច្រើន ប៉ុន្តែដោយសារខ្ពស់ ដូច្នេះតែងតែត្រូវបង្ខំអោយធ្វើជា​ប្រធាន​​ថ្នាក់ ឬ​ប្រធាន​ក្រុម” ។

នៅពេលក្លាយជានិស្សិត នាងធ្វើការក្រៅម៉ោងនៅហាងកាហ្វេមួយ ហើយត្រូវអតិថិជនរិះគន់ថា “ឬក” ទាំងមិនបានធ្វើអ្វីសោះ។ កាល​នោះ​អ្នក​​គ្រប់​គ្រង​ហាង​បាន​ប្រាប់នាងថា ដោយសារតែនាង “សម្លឹងមើលអតិថិជន” ដូច្នេះ​គួរ​អោយ​ស្អប់ ។

“ខ្ញុំមិនបាននិយាយអ្វីហួសហេតុ​ចំពោះអតិថិជននោះទេ ហើយវាពិតជាមិនសមហេតុ​ផលទេ គ្រាន់តែឈរក៏ខុសដែរ” ។

ប្រសិនបើអ្នកធ្លាប់សម្លឹងមើលនារីដែលខ្ពស់ រាងស្លីមដូចតារាបង្ហាញម៉ូត ហើយលួចសរសើរពួកគេ សូមគិតថាពេល​ខ្លះ​ពួក​គេ​ត្រូវ​​​គេ​មើល​ងាយ ហើយត្រូវស៊ូទ្រាំនឹងភាពមិនសមហេតុផល ព្រោះតែរូបរាងខ្ពស់របស់ខ្លួន។

ដូច្នេះ​មិន​ថា​អ្នក​មើល​ទៅ​បែប​ណា​នោះទេ ចូរស្រលាញ់ខ្លួនឯង ហើយមានភាពជឿជាក់លើ​អ្វី​ដែល​ខ្លួន​មាន កុំទទួលឥទ្ធិពល​លើ​សម្តី​របស់​អ្នក​ដទៃ។

Sacchan