មិនដែលធ្លាប់ឮទេថាមាន “ក្រុមហ៊ុនប្រមូលទិញកម្រង​សៀវ​ភៅ DVD អាស​អាភាស​យក​ទៅ​បំផ្លាញ​ចោល​ជំនួស​អតិថិជន”

ថ្មីៗនេះ ហាងលក់សៀវភៅមួយកន្លែងដាក់ចេញយុទ្ធនាការជួយលុបបំបាត់ “អាថ៌កំបាំងមិនល្អ” របស់មនុស្សចាស់ ដោយប្រមូលទិញ និងបំផ្លាញកម្រងសៀវភៅ DVD អាសអាភាសដែលពួកគាត់ធ្លាប់ទិញ។

ក្រុមហ៊ុនដែលផ្តើមគំនិតនេះគឺ Tone Shoten មានលក់ឧបករណ៍ផ្លូវភេទបានអោយដឹងថា ពួកគេប្រមូល​ទិញ​ប្រហែល ៧០ ម៉ឺន DVD ក្នុងឆ្នាំ ២០២០ និង ២០២១ ពីមនុស្សចាស់ដែលមានអាយុចាប់ពី ៦៥ ឆ្នាំឡើងទៅ។

អតិថិជនចាស់ៗទាំងនេះមានតម្រូវការយក DVD ដែលផ្ទុកនូវអតីតកាលមិនល្អដែល​ពួក​គាត់​មិន​ចង់​ឱ្យ​គ្រួសារ​ដឹង​យក​​​ទៅ​​​បំផ្លាញ​​​ចោល។

ក្រុមហ៊ុន Tone Shoten បានចាប់ផ្តើមសេវាកម្មខាងលើក្រោមទ្រង់ទ្រាយធំតាំងពីឆ្នាំ ២០១៥ ។ ក្រុមហ៊ុនទទួលយកការបញ្ជាទិញតាមអនឡាញពីអតិថិជនតាមរយៈសេវាកម្មដឹកជញ្ជូន។ តម្រូវការសេវាកម្មកាន់តែច្រើនឡើងពីមួយឆ្នាំទៅមួយឆ្នាំ។

អតិថិជនអាចដាក់របស់របរក្នុងប្រអប់ក្រដាសរួចបិទស្កុត ប្រសិនបើខ្លាចត្រូវគេមើលឃើញ ហើយក៏មិនចាំបាច់ចរចារ​តម្លៃ​ទិញ​ជា​មួយ​ក្រុម​ហ៊ុន​ដែរ ព្រោះក្រុមហ៊ុនគិតថា ចំណុចនេះគ្រាន់តែធ្វើអោយយ៉ាប់​យ៉ឺនឡើងប៉ុណ្ណោះ។

ធ្លាប់មានអតិថិជនម្នាក់ស្នើសុំឱ្យក្រុមហ៊ុនចាត់ចែងរាប់ពាន់ DVD មុនពេលគាត់ចូលមណ្ឌលថែទាំមនុស្សចាស់។ រីឯអតិថិជនម្នាក់ទៀតត្រៀមផ្លាស់​​ទៅ​​នៅ​ជា​មួយ​​នឹង​ក្រុមគ្រួសារកូនរបស់គាត់។

ហាងនឹងថែមប្រាក់ចំនួន ១០០០ យ៉េនសម្រាប់អ្នកដែលយកយ៉ាងហោចណាស់ ១០ DVD មកវាយតម្លៃ។ ពួកគេក៏ទទួលបានប័ណ្ណអំណោយពី Amazon ចំនួន ៥០០ យ៉េនផងដែរ ប្រសិនបើពួកគេបំពេញកម្រងសំណួរចំពោះការព្រួយ​បារម្ភ និង​សំណើ​ក្នុង​ការ​បំផ្លាញ DVD អាសអាភាសដែលពួកគេបានផ្ញើទៅ។

បុគ្គលិក PR របស់ក្រុមហ៊ុនបាននិយាយថា “យើងក៏ទទួលបានសំណើពីសមាជិកគ្រួសាររបស់អ្នកស្លាប់ផងដែរ ដោយចាត់ចែង DVD ក្រោយពេលពួកគេទទួលមរណភាព។ យើង​សង្ឃឹម​ថាអាចកាត់​បន្ថយ​បន្ទុកស្មារតីដល់គ្រួសារអ្នកស្លាប់ ព្រោះ​របស់​ទាំង​នេះ​មាន​​លក្ខណៈ​​រសើបខ្លាំង” ។

Sacchan