ពូកែខ្លាំងណាស់ Taiyo សត្វភេមួយក្បាលនៅ Aquarium Tokyo ទាយត្រូវលទ្ធផល “Samurai Blue” យកឈ្នះអាឡឺម៉ង់

សត្វភេមួយក្បាលនៅ Aquarium Tokyo បង្កការភ្ញាក់ផ្អើលយ៉ាងលើបណ្តាញសង្គមជប៉ុន ព្រោះតែបានទស្សន៍ទាយយ៉ាងត្រឹមត្រូវជ័យជម្នះរវាង “Samurai Blue” និងអាឡឺម៉ង់ក្នុងការប្រកួត World Cup ឆ្នាំ ២០២២ កន្លងទៅនេះ។

Taiyo ទាយត្រូវថាជប៉ុននឹងឈ្នះអាល្លឺម៉ង់។ រូបភាព៖ Kyodo News

ភេមួយក្បាលអាយុ ៨ ឆ្នាំមានឈ្មោះហៅថា Taiyo នៅ Aquarium Maxell Aqua Park Shinagawa បានព្យាករណ៍ជ័យជម្នះរបស់កីឡាករជប៉ុន តាមរយៈការបោះបាល់ចូលធុងពណ៌ខៀវដែលមានទង់ជាតិជប៉ុន។ ការទស្សន៍ទាយរបស់ Taiyo ធ្វើ​ឡើងនៅថ្ងៃទី ២២ ខែវិច្ឆិកាមួយថ្ងៃមុនពេល “Samurai Blue” ចេញប្រកួត។

ដោយសារទាយត្រូវលទ្ធផលការប្រកួតរវាងជប៉ុន និងអាឡឺម៉ង់បានធ្វើអោយ Taiyo ល្បីលើបណ្តាញសង្គម។ មនុស្សជាច្រើនហៅភេមួយក្បាលនេះថា “ហោរាដ៏អស្ចារ្យ” ។ អ្នកខ្លះថែមទាំងប្រៀបធៀប Taiyo និង Olivia ដែលជាសត្វ​សេក​នៅ​សួន Nasu ប្រទេស​ជប៉ុន​បាន​​ទាយ​​ក្រុម​​អាឡឺម៉ង់​​ឈ្នះ។

មតិសាធារណជនដូចតទៅ៖ “Taiyo ជាកំពូលហោរា ចំណែកសេក Olivia ជាអ្នកចាញ់ដែលឆោតល្ងង់” “ខ្ញុំមិនតាមដាន World Cup ទេ ប៉ុន្តែខ្ញុំតែងតែសង្កេតមើលលទ្ធផលទស្សន៍ទាយរបស់ Taiyo ធៀបទៅនឹង Olivia” “ពិតជាអស្ចារ្យ និងមានទេពកោសល្យណាស់” ។

កាលពីថ្ងៃទី ២៣ ខែវិច្ឆិកា ក្រុមជប៉ុនបានធ្វើឱ្យមានការភ្ញាក់ផ្អើលយ៉ាងខ្លាំងក្នុងការប្រកួត World Cup នៅ​ពេល​ដែល​ពួក​គេ​បាន​យក​ឈ្នះ​អាឡឺម៉ង់ដោយពិន្ទុ ២-១ ។ ក្រុមខាងគ្រូបង្វឹក Hajime Moriyasu ត្រូវគេស៊ុតចូល ១ គ្រាប់​នៅ​តង់ទីមួយ ប៉ុន្តែត្រឹមរយៈពេល​ ៩ នាទីចុងក្រោយក្នុងតង់ទីពីរបានបង្វែរការប្រកួតនេះឡើងវិញ ដោយ​សារ​ភាព​វៃ​ឆ្លាត​របស់ Ritsu Doan និង Takuma Asano ។

បន្ទាប់ពី Taiyo ល្បីលើបណ្តាញសង្គម Nozomi Arai អ្នកទទួលខុសត្រូវខាងទំនាក់ទំនងសាធារណៈនៅ Aquarium Maxell Aqua Park Shinagawa បាននិយាយថា៖ “យើងក៏ជឿជាក់លើការទស្សន៍ទាយរបស់ Taiyo ដែរ ដូច្នេះខ្ញុំសប្បាយ​ចិត្ត​ណាស់​ដែល​ការ​ទស្សន៍​ទាយ​បាន​ក្លាយ​ជា​ការ​ពិត” ។

អ្នក​ទទួល​ខុស​ត្រូវ​រូប​នេះ​បានអោយដឹងថា Taiyo មុននោះមានប្រជាប្រិយភាពខ្លាំងណាស់។ សត្វភេមួយក្បាលនេះតែងតែសម្តែងវគ្គខ្លីៗដូចជាបែងចែកសំរាមដាក់ចូលធុង។

អ្នក​គាំទ្រ​ជប៉ុន​សង្ឃឹម​ថា​ Taiyo នឹង​ធ្វើ​ការ​ទស្សន៍ទាយបន្តទៀតសម្រាប់ក្រុម​ម្ចាស់​ផ្ទះ​ក្នុងព្រឹត្តិការណ៍ World Cup ឆ្នាំ ២០២២ នេះ។

ប្រភព៖ Skydoor

មើលបន្ថែម: